Unha ducia de citas imprescindibles no Carballo Interplay

Sección Oficial

23 webseries de todo o mundo compiten na sección oficial. Hai propostas de Arxentina, Chile, Ecuador, Canadá, Estados Unidos, Australia, Alemania e Israel, ademais de Galicia e do resto de España. A categoría de Versión orixinal en galego inclúe cinco títulos: Arrieiros Somos, Mataría MicroSerie, Pandemials e Dúo Vaguedades

Os e as 'masters' da Internet en Galicia

O Interplay reune aos "Masters da internet" de Galicia no "primeiro encontro transversal da creación galega online", que reunirá creadoras e creadores de series web do pasado, do presente e do futuro, de podcasts, de Youtube, de Tik Tok, de Twitter e de Twitch. Participarán Olaxonmario, Nee Barros, Isaac González, Samuel L. París, Jon Amil, Agos Reigosa, entre outros e outras.

O humor máis activista e disidente da Internet

O Interplay emprestará unha grande atención a propostas que se apoian no humor para abordar asuntos como as relacións de parella, a saúde mental, a loita contra o machismo ou polos dereitos do colectivo LGTBI.

Por Carballo pasarán Carolina Iglesias, Victoria Martín, Henar Álvarez, Perra de Satán, Esnórquel, Lorena Iglesias e David Pareja, entre outras. Tamén estarán as humoristas gráficas Monstruo Espagueti, Roberta Vázquez e La Prados e colectivos que traballan contidos sociais e políticos como Cuellilargo, Proyecto Una ou Ontologías Feministas

A Internet de mudar as cousas

Internet parece un espazo onde agroman os comportamentos tóxicos. Como se combaten os discursos de odio? Cales son as claves para xerar espazos de seguridade? O Carballo Interplay falará sobre Activismo na rede con Pol Andiñach, con Laura Tabarés, membro do colectivo de produción cultural especializado en virtualidade e programas educativos con perspectiva feminista Ontologías Feministas; e con parte da colectividade millennial Proyecto UNA, que investigan sobre as guerras culturais de poder nos medios, Internet e a realidade analóxica.

Obradoiro Kamikaze

Hai uns días o Obradoiro Kamikaze deu o pistoletazo de saída ao Carballo Interplay 2021. A praia de Baldaio e as rúas de Carballo acolleron a gravación dunha serie post-apocalíptica, cuxas primeiras imaxes poderán verse o próximo mércores, día 8, na estrea mundial dos dous "Dinosaurios" ideados por unha ducia de estudantes e de profesionais do sector audiovisual galego

Zona Pro: Portugal, país convidado

O venres 10 o Carballo Interplay recupera programación profesional con Portugal como país convidado. Ao longo de toda a xornada, haberá presentacións e debates e establecerase un punto de encontro para que creadoras/es, empresas produtoras e plataformas de Galicia, de España e de Portugal contacten e intercambien ideas para posibles proxectos e colaboracións futuras.

Estrea de Cacola

Despois de gañar o premio ao proxecto de serie en galego da pasada edición do festival, David Fidalgo Omil volve ao Carballo Interplay para amosar os tres primeiros capítulos de Cacola

Pitching no Carballo Interplay

Todos os anos o Interplay dá unha oportunidade a catro proxectos de webserie, cuxas creadoras e creadores teñen 10 minutos para defender a súa proposta perante un xurado. A serie gañadora estrearase na vindeira edición do Festival 

Café con creadoras

O xa habitual café con CREA reunirá a creadoras e creadores de proxectos fundamentais no panorama das series web en Galicia, dende Sonia Méndez e Irene Pin a Javi Camino, Óscar Cruz ou Lucía Estévez

"Ven polo chascarrillo, queda polos traumas"

O sábado pola mañá será a quenda de Esnórquel e Perra de Satán, que no seu podcast Puedo hablar! analizan co seu particular humor e sen censura temas importantes ou intranscendentes

E moitas máis actividades

Dende Código Fonte Audiovisual, un formato híbrido entre conferencia e proxección ata unha conversa sobre Humor, precariedade xeracional e ilustración ou a Pochosfera de David Pareja e Lorena Iglesias, moitas máis actividades que farán de Carballo a capital dos contidos dixitais a vindeira semana.

Gala de clausura

O sábado ás 21 horas o Auditorio do Pazo da Cultura de Carballo acollerá a gala de clausura na que se realizará á lectura do Palmarés e a posterior entrega de premios. Será conducida por Fernando Epelde e incluírá o concerto en directo de Rebel Garden.