Unha ducia de concertos (e máis) do festival Revenidas

De Ninghures

O festival arrincará o xoves 10 coas presenza nesta primeira xornada de Narco, Sara Hebe, De Ninghures, Sons of Aguirre & Scila, Nadie González, Süne, El Pony Pisador, Yaya Dj e A Duendeneta.

En marzo De Ninghures publicaron esta colabo con Galician Army: "Regueifa Maldita", tralla nova para as moitas persoas que teñen fame de novidades dunha banda que moito nos sorprendeu o pasado ano.

Aquí podes consultar toda a programación

Bob Vylan

O venres 11 será a quenda de Evaristo, Bob Vylan, Dakidarría, Ilan Amores, La Sra.Tomasa, Matah, Terrae, The Salsa Punk Orkestra, Arrhythmia e A Duendeneta.

Bob Vylan fusiona hardcore, hip hop e punk en cancións cargadas de contido antirracista, contra o establishment ou que denuncian o xenocidio israelí contra o pobo palestino.

Evaristo

O concerto máis destacado desta segunda xorada será probablemente o que ofreza Evaristo Páramos, vocalista de La Polla Records e que na actualidade integra tamén a formación Tropa do Carallo.

Dakidarría

Tamén actuarán o venres os Dakidarria, que levarán ao escenario a súa longa traxectoria de máis de vinte anos, con temas como este "Ate o abrente"

La Gossa Sorda

A terceira xornada do festival, a do sábado 12 reunirá a La Gossa Sorda, El Drogas, Fillas De Cassandra, The Rapants, Taqbir, Rebeliom do Inframundo, Kumbia Queers, Malifeta, 9Louro, Awakate, Maloa Brothers, Queen Rendi, Tapa De Orella e A Duendeneta.

Os cataláns La Gossa Sorda, tras dez anos retirados dos escenarios, reuníronse de novo para realizar unha única xira neste 2026, unha xira que terá a súa única escala en Galicia no Revenidas.

El Drogas

Despois da xira coa que celebrou o 40 aniversario da fundación de Barricada, El Drogas (Enrique Villarreal) chega ao Revenidas para presentar un concerto no que percorre os himnos de toda a súa carreira, dende os tempos de barricada ou Txarrena ata os da súa actual etapa en solitario.

Fillas de Cassandra

Haberá moita e moi boa música do país na terceira xornada do Revenidas. Fillas de Cassandra presentaron o pasado mes de abril Tertúlia, o seu segundo longo, un traballo moi agardado e que o dúo vigués realizou con moito mimo.

The Rapants

The Rapants, presentarán en Vilaxoán o seu arroiador directo da xira Rapants Club. Son a banda galega do momento, como o veñen demostrando nos últimos meses nos seus multitudinarios concertos.

Ondas e partículas

Este ano, e por primeira vez en Galicia, o Revenidas incorpora unha nova experiencia ao festival: o Escenario ‘Ondas e Partículas’.Trátase dun espazo dedicado á divulgación científica que se poderá gozar de balde durante os catro días do festival de Vilaxoán.

O Escenario ‘Ondas e Partículas’ forma parte do programa de festivais do CERN e chega por primeira vez a Galicia da man do IGFAE, o FECYT Ciencia e innovación e a CERN and Society Foundation.

Ademais, de obradoiros, daberá charlas en directo con figuras da divulgación científica galega e estatal como Eduardo Sáenz de Cabezón, Verónica Bolón, Paula Desiré, Jose Edelstein e Adrián García

Gala de Circo Solidario

O Revenidas pecharase o domingo 13 coa tradicional sardiñada popular ao mediodía, a Gala de Circo Solidaria e as actuacións de Mekanika Rolling Band, As do Xeito, De Vacas e Lisdexia.

Sardiñada

As sardiñas dan nome a este festival dende hai máis de vinte anos e a tradicional sardiñada popular é un dos momentos máis bonitos de cada edición. Unhas horas para recuperar folgos despois de tres días de concertos.

Lisdexia

A música chega ata o domingo con catro concertos máis (estes de balde) cos que o Revenidas dirá "ata logo", xa coa cabeza na edición 2027.

Aquí podes mercar as entradas