Unha ducia de concertos no 39º Festival Noroeste da Coruña

Mapa Noroeste 2026

Chega agosto, o mes do Festival Noroeste Estrella Galicia, a cita que dende hai anos enche de música as rúas e prazas da cidade da Coruña. E todo de balde!

Este ano, a piques de celebrar o 40 aniversario do evento, serán máis de 40 os concertos, distribuídos en sete localizacións distintas. Dende a praia de Riazor, que coma todos os anos acollerá as actuacións máis masivas, ata o Campo de Leña ou a Praza de Azcárraga, dende o Parque de Santa Margarida á Praza de María Pita ou o Portiño. 

E, ademais, os Xardíns de Mendez Núñez acollerán o Noroestiño, con actuacións para para cativada. Pablo Díaz, María Faltri ou Lydia Botana xunto cos espectáculos ‘A Banda dos Insectos’, ‘Bibopalula, o concerto’ ou ‘Leucoíña pasea contos nas verzas’.

Fantastic Negrito: Plastic Hamburgers

O mércores 5 a música comeza a soar en case todos os escenarios. A programación da Praza de Azcárraga é unha das máis intensas, con estilos diversos, dende o rock ao blues. A primeira xornada neste escenario permitirá gozar de Law, David Regueiro Trío ft. Pablo Castaño, Pamela Rodríguez e Fantastic Negrito, a banda do estadounidense Xavier Amin Dphrepaulezz.

Bongeziwe Mabandla: Ndokulandela

Ese mesmo día en Santa Margarida haberá unha escollida selección de músicas do mundo, con Freestyle People ft. Gallos del Norte, os arxentinos Orquesta Invisible, a galega Catuxa Salom e o sudafricano Bongeziwe Mabandla, que achegará as súas cancións na lingua isiXhosa

Dorian: La tormenta de arena

Na Praza de María Pita vivirase na primeira xornada un auténtico festival pop cos galegos Familia Caamagno e a Orquestra do Quince, Ángel Stanich e os sempre coreados Dorian. O segundo día será a quenda de Vicente Calderón, Yerai Cortés e Zënzar

Ruxe-Ruxe: Rock do País

O ruído e o rock dominan a programación do Campo da Leña. Na primeira xornada, o mércores 5, actuarán Colorado, Greasy Belly, Agoraphobia, Frankie and the Witch Fingers. E na segunda, o xoves 6, será a quenda de Mar de Fondo, MEU, Tsunami Arise e Ruxe Ruxe

La Perra Blanco: Devil in my bed

No segundo día do noroeste, o xoves 6, a gaditana La Perra Blanco tomará a Praza de Azcárraga precedida de Apolo18 e MFC Chicken.

Moura: Muiñeira da Maruxaina

Os galegos Moura pecharán a noite na Praza de Azcárraga coa súas cancións repletas de capas de sons, ruído e distorsión, como demostran nesta Muiñeira da Maruxaina

Ana Lua Caiano: Mão Na Mão

Os concertos no Castelo de San Antón están todos os anos entre os máis especiais e íntimos, tanto pola beleza do escenario coma pola capacidade limitada do recinto, que habitualmente obriga a recoller previamente os convites para entrar. O mércores actuará a catalá Anna Andreu e o xoves a portuguesa Ana Lua Caiano, coa súa mestura de pop e sons tradicionais

Xosé Lois Romero & Aliboria - Mangüeiro (Olvídame)

A segunda xornada no escenario do Parque de Santa Margarida volverá ter un menú moi escollido, con proxectos tan interesantes coma o da Banda DiversidArte ft. Silvia Penide & La Sophie Simonds Band. Ademais, veremos a Mounqup e Xosé Lois Romero & Aliboria e a Mari Froes

Bala - Prisas

Venres e sábado os concertos trasládanse á Praia de Riazor. Alí, o sábado 7 actuarán as galegas Bala, Anxela Baltar e Violeta Mosquera, que elevarán o volume das súas guitarras para facer moito ruído sobre a area. Ademais, Crowded, Sprints e o medrileño Rusowsky.

Sés: Para cando eu morra

A xornada grande do Noroeste será, coma todos os anos, a do sábado, momento en que se reunirán na Praia de Riazor decenas de miles de persoas para un cartel absolutamente variado, que comezará coa actuación de María Xosé Silvar, Sés.

Echo & The Bunnymen: The Killing Moon

Os británicos Echo & The Bunnymen poñerán en práctica a experiencia acumulada despois de case 50 anos sobre os escenarios. Post-punk e escuridade chegada dende Liverpool.

Bomba Estéreo: Soy Yo

Dende Colombia Bomba Estereo, a banda liderarda por Li Saumet, converterá Riazor nunha praia do Caribe e de seguro que porá a todo o mundo a bailar cos seus ritmos nos que se mestura o rock e a electrónica coa cumbia e a champeta tradicional.