Unha ducia de creadoras premiadas na gran festa da cultura da Coruña

Laura Suárez, Premio Castelao de banda deseñada en categoría para público infantil e xuvenil

Narrativa, poesía, literatura infantil e xuvenil, música, fotografía, artesanía, arte gráfica, fotografía, acción cultural pola igualdade e tamén banda deseñada. A Área de Cultura da Deputación da Coruña impulsa un gran número de certames en moi diversas modalidades, algúns máis recentes e outros cunha traxectoria máis extensa.

O Premio Castelao de banda deseñada vai pola súa edición número 19, case dúas décadas nas que este galardón foi recoñecendo un gran número de creadores e creadoras, moitas veces moi novas e con carreiras que posteriormente as converteron en protagonistas do xénero. Aí está o caso, por exemplo, de Bea Lema, Premio Nacional do Ministerio de Cultura o pasado ano por O corpo de cristo, e que xa en 2017 fora galardoada pola Deputación da Coruña pola mesma obra, aínda nos seus estadios iniciais.

Este ano o premio en categoría para público infantil e xuvenil foi para Laura Suárez (Dumbría, 1994), co álbum A raíña cádaver.

Sandra Lodi, Premio Castelao de banda deseñada en categoría xeral

Na categoría xeral o premio foi para Sandra Lodi (Lugo, 1994), coa obra Adelina. A autora, residente en Compostela, gañou cunha obra da que o xurado destacou “o acabado solvente cunha gráfica moi expresiva e recursos desenfadados que aborda o tema da vellez con frescura, humor, critica social, moita acción e diversión”. 

Ao galardón presentáronse nesta edición un total de 18 proxectos.

Érica Esmorís, Premio Raíña Lupa de LIX na categoría Infantil

Outra das áreas ás que a Deputación da Coruña ten dedicado máis atención nos seus certames é o da literatura infantil e xuvenil, na que Galicia leva décadas destacando por un elevado nivel de creatividade e calidade. E, de igual xeito, o Premio Raíña Lupa, que chega á súa 18ª edición, tense consolidado como un dos máis importantes do xénero.

Nesta edición Érica Esmorís obtivo o galardón na modalidade Infantil, pola obra Terás que crela, na que destaca “a potencia da voz protagonista, o sentido do humor e a proposta lúdica da historia”. A mentira”, engade o xurado, “é motor da ficción que enriquece a vida da protagonista e que lle permite valorar o extraordinario da vida cotiá”.

Rosa Aneiros, Premio Raíña Lupa de LIX na categoría Xuvenil

Pola súa banda o Premio Raíña Lupa na categoría Xuvenil foi para unha autora xa consolidada na narrativa galega. Rosa Aneiros (Meirás, 1976) obtivo o premio por Unha historia de amor como outra calquera, unha novela “de aprendizaxe, con sentido do humor, que establece un contraste interesante entre o mundo cotiá da adolescente protagonista e o mundo científico da Antártida".

É a primeira edición na que o certame convoca e outorga os galardóns nesas dúas categorías independentes.

Gonzalo Hermo, Premio Miguel González Garcés de poesía

O Premio Miguel González Garcés é un dos grandes galardóns de poesía en Galicia. Este ano, un total de 129 propostas presentáronse ao certame organizado pola Deputación da Coruña e o gañador foi Gonzalo Hermo (Taragoña, Rianxo, 1987) con Un xesto de ternura.

Na obra destaca a súa "poesía introspectiva e depurada, onde a linguaxe rica e evocadora se achega á súa forma máis pura, eliminando excesos e retóricas para lograr unha obra de precisión sensorial”.  

Carabela, Premio Narf de música

Na gala do vindeiro xoves haberá moita música, da man de Alana, nun espectáculo colectivo no que tamén entrará en xogo a danza (co coreógrafo e bailarín Fran Sieira), todo coa dirección artística Thais Suárez. A gala, na que será protagonista o encaixe de Camariñas, terá como fío condutor a reinterpretación da tradición ou o novo tradi.

E, ademais, un dos premios que cada ano impulsa a Deputación da Coruña céntrase na creación musical. O Concurso Fran Pérez “Narf" de música ten o obxectivo de difundir, apoiar e promocionar os grupos e artistas musicais de todo o país. Nesta ocasión as bandas finalistas foron Gloria Pavía e Rafa Morales, Cinta Adhesiva e Carabela, que resultou a gañadora.

Carabela, de Noia, é “unha proposta construída con solidez, que atende o traballo vocal e tamén a melodía, cunha deriva electrónica delicada e sofisticada”. Uns gañadores de primeiro nivel para un galardón que en anos anteriores xa recoñeceu proxectos como Bala, Caldo, Mounqup ou Familia Caamagno e que lembra músico compostelán Fran Pérez “Narf", ao que todos botamos de menos.

Encarna Otero, Premio Begoña Caamaño na modalidade 'Traxectoria'

Hai oito anos a Deputación da Coruña decidiu crear o VIII Premio Begoña Caamaño á acción cultural pola igualdade de xénero co obxectivo de recoñecer e poñer en valor traxectorias de colectivos e persoas comprometidas coa promoción da igualdade de xénero desde o pensamento feminista e desde o campo da cultura, tanto no ámbito territorial da provincia como no conxunto do país.

O galardón conta con dúas modalidades, unha para iniciativas puntuais e outra para recoñecer o conxunto dunha traxectoria. Neste caso, a premiada foi a compostelá Encarna Otero Cepeda, unha "activista transversal" que foi "pioneira en introducir a perspectiva de xénero na Administración Pública", traballando sempre a prol do feminismo "desde unha perspectiva de país”.

Andar cos tempos, Premio Begoña Caamaño na modalidade 'iniciativa'

Na modalidade de iniciativa a gañadora foi a asociación Andar cos tempos, ou o que é o mesmo: Carme Campo e Chus Caramés. Estas educadoras e profesoras de baile tradicional lanzaron esta iniciativa hai dez anos para revisar o baile e a música tradicional galega con perspectiva de xénero, identificando os estereotipos de xénero e a carga sexista que transmiten

O xurado recoñeceu o seu labor “por ser un cambio de paradigma dentro da música tradicional galega cunha perspectiva feminista e non heteronormativa, actualizando e revisando a tradición desde a orixe para facela máis igualitaria".

Borja Canedo Martínez, Premio Antonio Fraguas de Artesanía na modalidade 'tradicional'

A artesanía tamén é arte. E a Deputación da Coruña leva 15 anos premiando os profesionais galegos que coas súas mans son quen de crear obxectos marabillosos.

Na modalidade tradicional, o gañador foi Borja Canedo Martínez (A Coruña) por un coitelo (unha peza titulada ‘Coitelo de cociña Damasco’) feito con forxa tradicional aplicada á coitelaría, soldeo a calda mediante forxa, vaciado e pulido manual.

Ezequiel Franchil Gil, Premio Antonio Fraguas de Artesanía na modalidade 'contemporánea'

Na modalidade contemporánea o premio foi para Ezequiel Franchil Gil, de 
Ribadeo, por unha nasa elaborada coa técnica de marroquinería fina e trenzado en pel, cosida a man.

O xurado valorou “a mistura de técnicas tradicionais traballadas cunha visión contemporánea para lograr unha peza utilitaria de gran valor estético que recolle a esencia do mar galego”.

Ademais, durante a reunión do xurado, seleccionáronse 30 obras de todas as propostas presentadas ao certame para formar parte dunha exposición itinerante.

Vicente Fraga Fernández, Premio Luís Ksado de fotografía

O Premio Luís Ksado de fotografía chega á súa edición número 18 convertido nun dos certames máis prestixiosos de todo o Estado. Nesta ocasión, con 55 orixinais presentados, o xurado recoñeceu o traballo Alén do pontevedrés Vicente Fraga Fernández, no que destaca ”a coherencia na poética da memoria e a deterioración do espazo das persoas arraigadas no seu medio”.

O comité avaliador concedeulle tamén a Mención de honra á serie Nordés, do ourensán Miguel Muñiz. E, ademais, seleccionou outras catro coleccións para formar parte do catálogo e da exposición itinerante que o certame programa por cada edición en concellos da provincia:

José Andrés Santiago, Premio Jesús Núñez de arte gráfica

O Premio Internacional Jesús Núñez de arte gráfica, convocado polo departamento de Cultura da Deputación da Coruña, foi nesta ocasión para José Andrés Santiago (Santiago de Compostela, 1981), pola súa serigrafía A la deriva II.

A obra do artista plástico, profesor doutor da Universidade de Vigo, especializado en manga e gráfica de campo expandido, formará parte dunha exposición da Fundación CIEC.

Loli Rodríguez, Premio Torrente Ballester de narrativa en lingua galega

O galardón máis antigo dos que organiza a Deputación da Coruña é o Premio Torrente Ballester de narrativa, creado en 1989 e que vai xa pola súa edición número 36. Dende o ano 2016 conta con modalidades en lingua castelá e en lingua galega.

Este ano Loli Rodríguez (Ribas de Sil, 1964) obtivo o premio na modalidade en lingua galega coa novela Nailía.

Antonio Bonet de Luna, Premio Torrente Ballester de narrativa en lingua castelá

Antonio Bonet de Luna (Madrid, 1970) gañou na modalidade en lingua castelá con La soledad de los reptiles. Mentres. Silvidos en las cumbres, do tudense Diego Alfonsín Rivero, resultou finalista nesta categoría.

Os dous vencedores recibirán 15.000 euros e a Deputación da Coruña publicará as dúas obras.

 

9 premios, 14 premiados e premiadas, nuns galardóns que impulsan e visibilizan o traballo creativo en moi diversas áreas e no que a Deputación de Coruña pon cada ano un importante empeño. "Queremos premiar o traballo dos nosos creadores e creadoras, celebrar que somos un país vivo, alegre e con moito talento, e que a nosa cultura está nun momento de especial relevancia", destacou hai uns días a deputada de Cultura Natividade González. "Dende a Deputación seguiremos sempre reivindicándoa, defendéndoa e festexándoa. Con moito orgullo, e coa firme convicción e compromiso de que a cultura é un dereito”, engadiu.