O Teatro Colón acolle o 10 de abril a IV Gala da Cultura da Deputación da Coruña
Os nove premios convocados pola área de Cultura da Deputación da Coruña recoñecen o labor creativo noutras tantas disciplinas de máis dunha ducia de profesionais. Pero, ademais, crean un acontecemento en si mesmo virando a súa entrega nun evento cultural de seu.
Desta volta será o 10 de abril, no Teatro Colón da cidade herculina (19h), cando se celebre a que xa é a cuarta Gala da Cultura da Deputación. A "reinterpretación da tradición ou o novo tradi" servirá como "fío condutor" dun evento presentado pola xornalista Susana Pedreira e que, ademais das persoas premiadas, terá como protagonista ao encaixe de Camariñas.
Da man da Mostra do Encaixe a contorna do teatro acollerá o traballo ao vivo das palilleiras e, ademais, a súa arte vestirá á presentadora cun deseño de Jose Matteos dunha gala na que a música e a danza a porán a banda Alana e o coreógrafo e bailarín Fran Sieira. A gala "rende homenaxe ás creadoras e creadores, enriquecendo a cultura cunha mirada contemporánea", detalla a súa directora artística, Thais Suárez, e neste sentido "a través de formas difusas e eléctricas, o encaixe de Camariñas conecta a memoria coa innovación".
A banda Alana e o coreógrafo Fran Sieira porán a música e a danza nun evento que servirá para entregar os nove premios culturais convocados pola institución, mais tamén para "celebrar que somos un país vivo, alegre e con moito talento"
A escola de deseño La Mapache, deseñando o vestiario dos Alana, e a cineasta Nela Fraga, cunha peza audiovisual creada a partir de imaxes do Arquivo do Patrimonio Oral da Identidade do Museo do Pobo Galego, completan o mosaico creativo dunha cita que pretende "celebrar que somos un país vivo, alegre e con moito talento", sinala Natividade González, deputada de Cultura. Agrega ademais que a gala chega "nun momento de gran relevancia internacional" para a creación galega.
"Dende a Deputación seguimos reivindicándoa, defendéndoa e festexándoa con moito orgullo e coa firme convicción de que a cultura é un dereito", salienta González, para quen a gala vai ser "diversa, dinámica e emotiva, como é a nosa cultura". Galardóns coma estes, acrecenta Susana Pedreira, "tecen redes" e "esta gala é unha boa mostra diso", unha "celebración colectiva" na que "os protagonistas son os premiados, pero tamén as persoas que asistan".
Este espectáculo, que ten entrada libre ata completar a capacidade do teatro, será o marco para a entrega dos devanditos nove premios. Trátase do Torrente Ballester de Narrativa; o Castelao de Banda Deseñada; o Raíña Lupa de Literatura infantil e xuvenil; o González Garcés de Poesía; o Antonio Fraguas de Artesanía; o Fran Pérez ‘Narf’ de música; o Begoña Caamaño á acción cultural pola igualdade de xénero; o Jesús Núñez de Arte Gráfica e o Luís Ksado de fotografía.
Nas súas edicións de 2024, estas foron as creadores e creadoras galardoadas:
- Torrente Ballester de Narrativa: Loli Rodríguez e Antonio Bonet de Luna,
- Castelao de Banda Deseñada: Laura Suárez e Sandra Lodi
- Raíña Lupa de Literatura infantil e xuvenil: Érica Esmorís e Rosa Aneiros
- González Garcés de Poesía: Gonzalo Hermo
- Antonio Fraguas de Artesanía: Borja Canedo Martínez e Ezequiel Franchil Gil
- Fran Pérez ‘Narf’ de música: Carabela
- Begoña Caamaño á acción cultural pola igualdade de xénero: Encarna Otero e a asociación Andar
cos tempos - Jesús Núñez de Arte Gráfica: José Andrés Santiago
- Luís Ksado de fotografía: Vicente Fraga Fernández,
