Unha ducia de escenas da historia recente de Galicia en 10 segundos
O desenvolvedor Berto Yáñez é o 'pai' de criaturas de Twitter como @postaisgalegas ou @unsaudo, que dende hai tempo vai retratando o país cada poucos minutos. A súa última creación é @10sdememoria, un bot que lanza chíos con fragmentos aleatorios do arquivo da TVG, escenas da historia recente do país de tan só 10 segundos.
-
01
A primeira muller condutora dun autobús urbano galego
En 1991 Ángeles Carbajal incorporouse á compañía do transporte urbano de Ourense. Vídeo íntegro.
-
02
Primeiro rally Botafumeiro
En 1985 celebrouse a primeira edición do Rally Botafumeiro, con saída dende a Praza do Obradoiro. Vídeo íntegro.
-
03
O Liceo, campión de Copa
Na temporada 1990-1991 o Liceo da Coruña gañou a Copa do Rei por quinta vez. Vídeo íntegro.
-
04
Eleccións 1987
En 1987 celebráronse eleccións municipais e europeas, unha das primeiras coberturas electorais da TVG. Vídeo íntegro.
-
05
Aznar visita a Fraga, candidato á Xunta por primeira vez
O 1 de setembro de 1989 o novo presidente do PP, José María Aznar, visita na Coruña a quen o situou no posto, Manuel Fraga, candidato á Presidencia da Xunta por primeira vez. Vídeo íntegro.
-
06
Miguelanxo Prado debuxa o Xabarín
Nesta gravación, datada en 1985, Miguelanxo Prado debuxa o Xabarín, que anos despois se convertería na gran estrela do público infantil da Galega. Vídeo íntegro.
-
07
Díaz Pardo, doutor honoris causa
En xaneiro de 1992 a Universidade de Santiago investiu como doutor honoris causa a Isaac Díaz Pardo nun acto presidido polo reitor da institución académica, Ramón Villares. Vídeo íntegro.
-
08
Inauguración da Ponte do Milenio en Ourense
O 1 de setembro de 2001 abriuse ao tráfico a Ponte do Milenio sobre o río Miño, deseñada polo arquitecto Álvaro Varela de Ugarte. Vídeo íntegro.
-
09
Visita a Santa Mariña de Dozo
No outono de 1991 a TVG achegouse ás ruínas de Santa Mariña de Dozo (Cambados), que fan do seu cemiterio un dos máis singulares. Vídeo íntegro.
-
10
Chávez, en Galicia
En outubro de 2005 o daquela presidente de Venezuela, Hugo Chávez, visitou Santiago. Foi recibido polo presidente da Xunta, Emilio Pérez Touriño, e visitou a Catedral compostelá co alcalde da cidade, Xosé Sánchez Bugallo, e co deán, José María Díaz. Vídeo íntegro.
-
11
Tractoradas contra a cota láctea
O sector lácteo galego bótase cos tractores ás estradas en marzo de 1987 para rexeitar a cota láctea que impuña a Comunidade Económica Europea, actual UE. Vídeo íntegro.
-
12
Censura a Albor
O 23 de setembro de 1987 o Parlamento debate a moción de censura contra o Goberno de Alianza Popular, presidido por Gerardo Fernández Albor. A votación remata coa investidura do socialista Fernando González Laxe como novo presidente. Vídeo íntegro.