Unha ducia de estacións de tren e apeadoiros pechados nos últimos anos
Hai tres semanas o Ministerio de Transportes presentou o proxecto para construír un apeadoiro en Valga na liña convencional de tren Vilagarcía-Padrón. Unha obra de pequena dimensión pero que supón un fito a nivel galego. Nas últimas dúas décadas, nas que pecharon 42 paradas en todo o país, só abriron tres novas estacións ferroviarias, todas vinculadas ao desenvolvemento da rede de alta velocidade. Repasamos aquí algunha destas estacións que foron pechando nos últimos anos.
-
01Estación de Portas
A Estación de Portas atópase no concello do mesmo nome, preto da Azucreira de Portas e tamén moi próxima (dous quilómetros) do centro de Caldas de Reis, localidade de case dez mil habitantes que deste xeito ficou hai anos sen servizo de tren.
-
02Estación de Louredo-Valos (Mos)
A Estación de Louredo, en Mos, foi inaugurada en 1878 coa apertura do treito Guillarei-Vigo da liña que une a cidade olívica con Monforte. Pechou en 2013, deixando a Mos se servizo de pasaxeiros.
-
03Estación da Bandeira (Silleda)
Un dos treitos que nos que houbo máis peches de estacións nos últimos anos foi o que une Santiago e Ourense. Desapareceron un total de sete paradas, tres delas no concello de Silleda (Silleda, A Bandeira e Ponte Taboada) que quedou sen servizo de pasaxeiros en ningunha delas. As tres puxéranse en marcha en 1958 e deixaron de funcionar en 2013, cos recortes do Goberno de Rajoy, nunca revertidos.
-
04Estación de Castrelo do Val - Verín
A Estación de Castrelo do Val - Verín abriu en 1957 coa posta en servizo do complexo treito Ourense-Pobra de Seabra da liña A Coruña-Zamora. Os recortes levados a cabo polo goberno de Rajoy en 2013 levaron ao peche desta e do resto das estacións situadas entre Ourense e A Gudiña. Está situada no lugar de Campobecerros (Castrelo do Val), a 23 quilómetros de Verín.
-
05Estación de Baños de Molgas
Outra das estacións pechadas nesa liña foi a de Baños de Molgas. Inaugurada tamén en 1957 e pechada en 2013. Dende entón acolle o museo dedicado ao cómico Moncho Borrajo.
-
06Estación da Pobra de San Xiao (Láncara)
A estación da Pobra de San Xiao, en Láncara, foi inaugurada en 1878 coa posta en servizo do treito Sarria-Lugo da liña entre Palencia e A Coruña. En 2002 perdeu o servizo de pasaxeiros e en 2018 a propia vía férrea foi desviada para evitar o paso polo casco urbano da Pobra de San Xiao e suprimir así 16 pasos a nivel. A nova estación, sen servizo de pasaxeiros, conservou o nome, pero en realidade está na parroquia de Moscán, no Páramo.
-
07Estación de Laxosa (O Corgo)
A estación de Laxosa, no Corgo, foi tamén inaugurada en 1878 coa posta en servizo do treito Sarria-Lugo da liña entre Palencia e A Coruña. Dende 2002 non empresta servizo de pasaxeiros. Está situada a dez quilómetros do centro de Lugo.
-
08Estación de Begonte
A estación de Begonte foi inaugurada en 1875 coa apertura do treito A Coruña-Lugo da liña entre Palencia e A Coruña. Dende hai anos non ten servizo de pasaxeiros, sendo as paradas máis próximas as de Baamonde e Rábade.
-
09Estación de Queixas-Londoño (Cerceda)
A Estación de Queixas-Londoño, en Cerceda, deixou de funcionar en 2007. Por aquí pasa agora unha vía verde que une Cerceda e Santiago, empregada para realizar sendeirismo e rutas en bicicleta
-
10Estación de Vedra-Ribadulla
A estación de Ribadulla, en Vedra, foi inaugurada en 1958 coa posta en servizo do treito O Carballiño-Santiago da liña Zamora-A Coruña. Deixou de ser estación de pasaxeiros no ano 2013, no marzo dos recortes do Goberno de Mariano Rajoy. Dende hai uns anos converteuse nun recinto cultural, que acolle concertos e artes escénicas.
-
11Apeadoiro do Casal (Santiago)
O apeadoiro de Casal, en Laraño, é unha das varias paradas que nos últimos anos pecharon no Concello de Santiago, xunto coas da Susana e a de Verdía, situadas todas polo tanto en zonas con moita poboación e que se poderían beneficiar dun servizo de proximidade. Nos tres casos consérvanse os edificios de pedra das estacións
-
12Estación de Garga-Trasmonte (Oroso)
A estación de Garga-Trasmonte (Oroso) é unha das varias que deixaron de funcionar cando entrou en funcionamento a liña de alta velocidade entre A Coruña e Santiago, coma a de Oroso-Vilacide, a de Gorgullos-Tordoia ou a xa comentada de Queixas-Londoño.