Unha ducia de libros para ler cos pícaros antes da volta ao cole
Achégase a volta ao cole pero queda moito tempo libre que compartir coas crianzas, por iso seleccionamos unha ducia de libros que poden ler elas e eles sós, ou que lles podemos contar os adultos. As historias non rematan nas páxinas dos libros e poden acompañar nos últimos días de praia deste agosto con altas temperaturas.
-
01Onde caben dous...
Onde caben dous... de Cristina Oleby e ilustrado por Xiana Teimoy está publicado por Ediciones Jaguar. Mapache, Lebre, Sapo e Curuxa únense á cea romántica que preparou Raposo neste divertido álbum ilustrado para lectoras e lectores a partir dos tres anos de idade.
-
02Curriño. Benvido ao equipo
Curriño. Benvido ao equipo, editado por Xerais, é a terceira entrega desta historia da viguesa Ledicia Costas. O can influencer métese nunha aventura, esta vez fóra da súa mansión, e contará con dous novos amigos como aliados. Para lectoras e lectores de seis anos en diante. E, coma xa sucedeu nos dous libros anteriores, con autocolantes na derradeira páxina!
-
03Os ratos da casa
Os ratos da casa, que edita Kalandraka, forma parte dunha serie para lectoras e lectores a partir dos 3 anos de idade sobre as peripecias dunha intrépida familia de roedores. Un conto rimado que vai encadeando palabras, con estruturas propias da nosa tradición oral, escrito por Oli e ilustrado por Natalia Colombo.
-
04Puntiño e Borrón
Puntiño e Borrón, de Anna Taraska con ilustracións de Daria Solak, pertence á colección petos de Triqueta verde. A nena Puntiño vive nun caderno con liñas. De maior gustaríalle converterse no punto do «i», pero de momento o que máis lle gusta é xogar, rubir polas liñas superiores e quedar con Borrón. Cando o seu amigo desaparece sen deixar rastro, a Puntiño vénselle o mundo enriba. Para atopalo, deberá emprender unha gran viaxe por outros cadernos.
-
05Pirata pregunta por ti
Pirata pregunta por ti, escrito por Ana María Fernández e ilustrado por Lili Algo, pertence á colección Árbore da Editorial Galaxia para lectoras e lectores a partir dos oito anos. É a historia dunha nena que queda como responsable do gato da súa avoa falecida. Pirata, o gato, segue a buscar á avoa pola casa.
-
06Labores do lugar
Labores do lugar recolle nove profesións con futuro que poden desenvolverse na contorna rural. Susana Peix e Víctor Mascato son os autores deste libro divulgativo pensado para nenas e nenos maiores de oito anos, que ilustra Jaume Mora para a editorial Cumio. Cada vez máis persoas apostan por establecerse no rural, neste libro achégannos a aquelas profesións que se dan nun pobo de costa, relacionadas co campo, o mar, os animais, a alimentación ou a artesanía local.
-
07A pés descalzos
A pés descalzos, escrito pola artista e terapeuta polaca Katarzyna Samosiej, é un álbum ilustrado que axuda a comprender ás persoas que senten todo con alta intensidade. Foi traducido do polaco ao galego por Ana Garrido e revisado por María Reimóndez para a colección Verdemar de Alvarellos Editora, e está pensado para lectoras e lectores a partir dos seis anos. Este volume incorpora unha explicación didáctica moi útil para entender ás persoas PAS (Persoas con Alta Sensibilidade).
-
08A última fronteira
A última fronteira, ilustrado e escrito por Cecilia Heikkilä, e traducido ao galego por David Álvarez, narra a historia de avó e osiño, que comparten o soño de visitar a última fronteira: un lugar especial e difícil de atopar cheo de criaturas salvaxes e marabillosas, un lugar onde o aire arrecende a arume de piñeiro, un lugar que só viron nunha postal. Está editado por Patas de Peixe para lectoras e lectores de 0 a 99 anos.
-
09Un becho estraño
Un becho estraño, de Mon Daporta e Óscar Villán e editado por Kalandraka, é un conto para contar, cunha rima e un ritmo que enganchan á historia. Un libro de pequeno formato que segue a fórmula dos chamados contos sen fin, que xa se lle pode dar aos bebés.
-
10Seis leiras e un piano
Seis leiras e un piano é un poemario da xornalista e filóloga compostelá Claudia Castro para nenas e nenos de 11 anos en diante, que edita Xerais e conta coas ilustracións de Laura Tova. “Son poemas para seren lidos en voz alta. Para cantalos e acompañalos con xestos e palmas. Pero tamén para reflexionar sobre o fondo que moitos gardan e comentalos posteriormente en animadas paroladas. É boa poesía. E diso se trata”, salienta o poeta Antonio García Teijeiro no epílogo do libro.
-
11Cando o mundo é azul
Cando o mundo é azul, de Óscar Reboiras, foi a obra gañadora do VII Premio de literatura infantil Carlos Mosteiro. Nuno vive coa súa nai. Encántalle pintar e ler. Enche centos de follas cos seus debuxos, e sempre usa a mesma cor, o azul. Un día aparece na casa un home grande e inchado coma os globos das festas. É o seu avó, que vai vivir con eles, pero Nuno non sabe moi ben para que serven os avós. Edítao Galaxia na colección Árbore, a partir dos oito anos.
-
12Dona Carme
Dona Carme é un libro para primeiros lectores do mestre e editor vigués Manuel Bragado. Publicado en 1989 por Ir Indo edicións, Triqueta verde recupérao nunha nova edición con ilustracións de Iván R para a súa colección Canto Conto Conta, que nos devolve historias para espantar o medo e o frío ou para explicar o mundo.