Unha ducia de ligazóns entre Galicia e Escocia
Ao pobo escocés deixáronlle votar e máis da metade decidiu quedar onde estaba, no Reino Unido, aínda que con máis autogoberno. Desmóntase así o plan lanzado polo vigués que se lanzou a recoller sinaturas para propoñerlle a David Cameron que, se Escocia marchaba, Galicia ben podía ocupar o seu lugar. Para isto alegaba unha serie de semellanzas entre os dous países que agora recuperamos e á que nós nos atrevemos a engadir algunha máis.
-
01
As gaitas
Unha das máis evidentes. O instrumento nacional de ambos países é o mesmo e, da banda galega, mesmo chegamos a unha hibridación que amosamos por todo o mundo da man da Real -para algunhas persoas, "irreal"- Banda de Gaitas da Deputación de Ourense. O conxunto, por outra banda, xa ten experiencia co repertorio escocés.
-
02
No fútbol, de Celta a Celtic
Escocia ten o Celtic de Glasgow e nós, o Celta de Vigo.
-
03
Somos países verdes
Temos unhas paisaxes ben semellantes. É certo, así e todo, que a nosa veciñanza do norte ten máis querencia pola ordenación territorial e menos polos nosos idiosincráticos peches con somieres, ladrillos vistos e demais enxeñarías populares.
-
04
O gusto polo bo vivir...
... e polo bo beber. Mesmo temos un amor especial pola cervexa, coma o pobo escocés.
-
05
As persoas de pelo rubio e loiro
Un dos poucos estudos existentes sobre a distribución das persoas rubias en Europa indica que Escocia e Irlanda son, xunto con algúns territorios do leste, as zonas do continente con máis persoas rubias. En Galicia estamos uns 8 puntos por baixo, pero por riba de boa parte do sur europeo. Se a isto lle engadimos as persoas loiras, xa temos outro punto en común.
-
06
A chuvia
Nisto si que somos ben semellantes. En Galicia e en Escocia chove moito, aínda que alí o fai un chisco máis. Os mapas pluviométricos ratifican a crenza popular.
-
07
Somos un pobo de artistas
Aínda que haxa a quen lle pese, a cultura galega é vizosa e diversa. E a escocesa, tamén.
-
08
Somos un país Atlántico
Báñanos o mesmo océano e, en sentido amplo -mar por medio-, somos países limítrofes. A Commonwealth xa ten chegado bastante máis lonxe!
-
09
As bandeiras
A bandeira galega e a escocesa teñen certas semellanzas, tanto se ollamos cara ás enseñas actuais como cara ás históricas.
-
10
A monumentalidade de Compostela e Edimburgo
As nosas dúas capitais destacan pola súa monumentalidade e a súa historia pétrea. Mesmo polas súas catedrais.
-
11
Un idioma propio
Hai a quen lle gustaría que o galego siga o camiño do gaélico en canto ao seu uso e futuro, pero ese é outro conto.
-
12
O licor café na botella de Cardhu
Histórica e frutífera alianza.