David Lombao

Unha ducia de mascotas

Houbo un tempo no que todo evento ou conmemoración que se prestase tiña que ter mascota de seu. Eran personaxes polo xeral riquiñas, que ficaban na memoria colectiva e que a infancia cobizaba para decorar camisolas ou estoxos escolares. A década dos 90 foi, probablemente, a última idade de ouro para as mascotas. Houbo, no entanto, tentativas posteriores, pero con éxito máis ben discreto.

  1. 01

    Pelegrín

    A mascota galega por excelencia de, cando menos, as dúas décadas. Creada como emblema maior do Xacobeo 93, sobreviviu con plena vixencia ata a seguinte edición do evento, en 1999, e en 2004 xa comezara a ser relegado. A Xunta chegou a anunciar unha nova vida para Pelegrín no Xacobeo 2010, pero finalmente preferiu defenestralo. A gran icona xacobea que chegou a ter unha versión disque feminina, a mesma que tivo un himno nas voces de Montse e Luís Queimada, sobrevive agora nalgúns corazonciños e pouco máis.

  2. 02

    Cobi

    A obra de Mariscal para os Xogos Olímpicos de Barcelona chegou ao imaxinario colectivo uns meses antes que Pelegrín. Seica era un can e mesmo chegou a ter unha serie de debuxos animados. "Cobi / mascota xenial / vive / xunto ao mar en Barcelona", dicía a cabeceira da súa versión galega, emitida pola TVG.

  3. 03

    Curro

    En 1992, compartindo protagonismo con Cobi, Curro personificou (ou paxarificou?) a Expo de Sevilla. O paxaro multicor aínda sobrevive, cando menos, nunha web conmemorativa daquela exposición universal. Na parte inferior esquerda da pantalla saúda co seu habitual sorriso e mesmo se lle poden facer preguntas. Proben, proben...

  4. 04

    Naranjito

    O último éxito español en materia de mascotas ata a chegada do devandito Curro. Era unha alegre laranxa de Valencia vestida coas cores da selección española de fútbol para o Mundial de 1982, no que España non tivo un gran éxito.

  5. 05

    Xubi

    Agárrense, que veñen curvas. Tras o despedimento de Pelegrín houbo quen tentou ocupar o baleiro nos nosos corazóns con Xubi, sorrinte mestura de lámpada e pera que mesmo chegou a ter un grupo de seu no Facebook, pero relativo ao "medo" que daba. Igual que veu, marchou.

  6. 06

    Mexi-Llón

    Na senda de Xubi. Foi, neste caso, a elección da Deputación de Pontevedra para darlle sabor ás tiradas da Volta Ciclista España que transcorrían pola provincia. Aproveitando que a carreira partía dunha batea naceu este peculiar personaxe.

  7. 07

    Xaco e Cami

    Porque sempre se pode ir un chisco máis alá. Cando xa estábamos máis ou menos repostos de coñecermos a Mexi-Llón a Xunta sorprendeunos neste 2014 con Xaco e Cami, peregrinos que non saben de fatiga e que, cun permanente -e un chisco desacougante- sorriso recibiron os ciclistas da Vuelta 2014.

  8. 08

    Wippy

    Os 90 fican cada vez máis lonxe. Así e todo, hai quen pensa que aínda se pode estirar un chisco a era das mascotas para, neste caso, ilustrar os colectores de reciclaxe de roupa en cidades como Santiago. Wippy, chámanlle.

  9. 09

    Xabarín

    Moito máis que unha mascota. O compañeiro de xogos de toda unha xeración da infancia galega. O porco bravo con máis agarimo polo galego que algunhas políticas lingüísticas.

  10. 10

    Ciao, Italia

    No punto oposto dos Xubis, Xacos e Camis está a estilizada mascota do Mundial de Italia en 1990. Descoñecemos, no entanto, se pretendía ou non ser unha persoa. 

  11. 11

    O pingüín de Linux

    Riquiñísima mascota para darlle folgos ao software libre.