David Reinero

Unha ducia de multitudes

O coronavirus fainas agora pouco recomendables, pero a historia de Galicia rexistra unhas cantas multitudes históricas. Repasamos unha ducia delas.

  1. 01

    Enterro de Curros Enríquez

    En 1908 Galicia era pouco urbana, pero cando a cidade da Coruña recibiu os restos de Curros Enríquez, falecido na Habana, hai quen di que se viviu o maior cortexo fúnebre da historia de Galicia, con máis de corenta mil persoas. [Imaxe: RAG]

  2. 02

    Emigración polo porto de Vigo

    Milleiros de galegos e galegas emigraron durante anos polo porto de Vigo. Na imaxe, da Autoridade Portuaria de Vigo, a dársena da Laxe en 1895.

  3. 03

    Xoán Paulo II no Monte do Gozo

    A visita do Papa Xoán Paulo II a Santiago en 1989 pola Xornada Mundial da Xuventude deixou imaxes de multitudes, como estas que se conservan no arquivo da CRTVG.

  4. 04

    Concertos de Prince e Madonna

    Un ano despois do papa, o 29 de xullo de 1990 Vigo e A Coruña acollían na mesma xornada dous multitudinarios concertos simultáneos de Madonna e Prince, respectivamente, dos que tamén quedou constancia no arquivo da CRTVG.

  5. 05

    Bruce Springsteen no Monte do Gozo

    Masivo, para mal, tamén foi o concerto que en 2009 ofreceu Bruce Springsteen no Monte do Gozo, con máis 37.000 entradas vendidas pero no que varios milleiros de espectadores non puideron entrar ou acabaron véndoo en lugares non previstos. [Imaxe: Xunta]

  6. 06

    Manifestacións do 25 de xullo

    Un clásico de multitudes de cada ano (ata este) son as manifestacións do 25 de xullo en Santiago. Hai quen di que aínda hai xente saíndo da Alameda. [Imaxe: BNG]

  7. 07

    Manifestacións polo Prestige

    As manifestacións polo Prestige non só foron multitudinarias en Galicia senón que tamén asolagaron Madrid. [Imaxe: Nunca Máis]

  8. 08

    Manifestación pola capitalidade da Coruña

    As manifestacións políticas multitudinarias foron especialmente relevantes durante a transición e os primeiros anos da autonomía. Entre elas, as reclamacións para que A Coruña fose a capital de Galicia, cunha gran manifestación en María Pita en xullo de 1979. [Imaxe da homenaxe a Domingos Merino]

  9. 09

    Manifestacións pola sanidade en Vigo

    Nos últimos anos Vigo vén protagonizando masivas marchas en defensa da sanidade pública. [Imaxe: CIG]

  10. 10

    Protestas contra o descenso administrativo do Celta

    Pero Vigo tamén se mobilizou masivamente contra o descenso administrativo do Celta en 1995.

    [Imaxe: RCCelta, posterior ás protestas polo descenso]

  11. 11

    Cadeas humanas na Muralla de Lugo

    En Lugo a muralla é o lugar elixido para escenificar as protestas ou reivindicacións festivas masivas, con varias cadeas humanas e concentracións que a rodearon ao longo da súa historia, dende a campaña a prol da declaración como Patrimonio da Humanidade ata as mobilizacións contra a guerra de Iraq ou tras o afundimento do Prestige. [Imaxe: © Yvon Fruneau / UNESCO]

  12. 12

    Correlingua

    O Correlingua, a festa na que o alumnado se bota á rúa para celebrar o galego, é unha das concentracións periódicas masivas nas cidades e vilas galegas. [Imaxe: CIG-Ensino]