Unha ducia de músicas para unha sesión vermú
A sesión vermú está a medio camiño entre o mundo orquestreiro de toda a vida e o mundo (ou inframundo, segundo quen o mire) da cousa hipster. Sexa como for, o certo é que é un momento ideal para permitirse algunha licenza musical e converter, como ben di Xurxo Souto, o campo da festa no centro do mundo. Velaquí unha ducia de propostas para amenizala.
-
01
Caxade - Gente pota
O folkie que gusta aos indies e o indie que gusta aos folkies propón neste tema mandar "a tomar un vermú" a esa xente pota que anda a gobernar o mundo. Nin tan mal.
-
02
O sonoro maxín - A catacumbia
Cumbia ourensá, fusión de estilos e baile para ir baixando o vermú. Non perda o paso, señora, cabaleiro.
-
03
Radio Cos - O rumbista de Sas
Os Radio Cos van andar a revolucionar un bo feixe de campos da festa e dos festivais deste verán. Terme ben do vermú antes de lanzarse á rumba cun aquel balcánico, que non se sabe o que ten pero cada día gusta máis.
-
04
Novedades Carminha - Apriétame más
Os composteláns traen no seu último disco, Juventud infinita, unha bonus track cun pé no campo da festa e outro na electrónica que calquera amante do mundo orquesteiro saberá apreciar. E quen non o sexa, tamén. Aprétense máis se lles presta, que estamos no verán.
-
05
A Quenlla - A rumboia
Un clásico que non morre nunca, tan incombustible como os grandes Mini e Mero, que tamén encaixan á perfección para botarlle un pé neste contexto. Viva a rumboia, aínda que sexa noite e día.
-
06
Amália Rodrigues - Havemos de ir a Viana
Hai grandes cancións do sur do Miño que chegaron ao norte para quedar. Este Havemos de ir a Viana é unha delas ata o punto de que quen asina pode dar fe de que hai anos de que soa con xeito nas sesións vermú do país. Se o meu sangue non me engana.
-
07
Pasodobre Lugo-Ferrol
Obra dun músico militar nado a finais do XIX, Gregorio Baudot, este pasodobre é un bo recurso para quen guste do infalible modelo de recital de banda popular ao mediodía como pórtico ou escusa para o vermú. Botándolle un chisco de vontade dá para botarlle un pé á saúde da irmandade lucense-ferrolá.
-
08
La Pegatina - Lloverá y yo veré
O grupo catalán de orixes multinacionais triunfa no mundo enteiro dende hai anos e, se en algo é experto, é en poñer a bailar as multitudes e destilar optimismo. Aínda que chova, baila.
-
09
Ana Kiro - Pídechas o corpo
A meirande ensinounos moitas cousas dende os palcos, entre outras, quen manda aquí. E ben mandado estaba. Sempre presente, dende A Castañeda para o corazón.
-
10
Os resentidos - Cumbia china
Homenaxe bailable e romántico á sordidez viguesa dos 80, na actualidade reinterpretado pol'O sonoro maxín.
-
11
Andrés do Barro - O camiño que me leva a San Antón
A grande icona do pop galego no século pasado pode vir moi ben se a sesión vermú se estende un pouco e se xunta coa hora de xantar. Ben se pode ir abandonando o campo da festa ao ritmo d'O tren ou deste camiño "cheo de pedras e de amor".
-
12
Los Tamara - Puerto de Compostela
A voz poderosa de Pucho Boedo pode facer que a sesión vermú remate en todo alto e infundirlles ás persoas presentes gañas de comer o xantar ou o mundo.