Marcos Pérez Pena

Unha ducia de novidades da música galega para pechar o ano

Nesta semana festiva, poñemos música na ducia, con algunhas cancións (e vídeos) publicados nas últimas semanas, que amosan a variedade e calidade das bandas e artistas galegas

  1. 01

    Familia Caamagno: O mundo está derrotado

    Hai algo máis dun mes Familia Caamagno presentaron o seu último tema, 'O mundo está derrotado', que dá nome ao seu máis recente álbum, un traballo cheo de rock e humor

  2. 02

    Berto: Bágoas de Cocodrilo

    Familia Caamagno compartiron varios concertos con Berto, un dos grandes nomes da escena musical galega actual. Berto tamén ten un disco moi recente, SINTO, onde aparece este 'Bágoas de cocodrilo'

  3. 03

    Antía Muíño: Canta, miña compañeira

    Berto compartiu a gran noite do último Culturgal con Grande Amore, Néboa e Antía Muíño, que vén de publicar Carta aberta, que abre este 'Canta, miña compañeira'. VINTE falou con ela hai uns días.

  4. 04

    Ataque Escampe: Lamborghini

    Hai tres semana vimos por primeira vez o vídeo de 'Lamborghini', de Ataque Escampe, unha peza audiovisual dirixida por David Silva, "firme candidato a mellor videoclip de 2022", como destacaba VINTE.

  5. 05

    Xosé Lois Romero & Aliboria: La leyenda del tiempo

    Unha das grandes sorpresas deste final de ano esta versión de 'La leyenda del tiempo', o tema de Camarón de la Isla a partir dos versos de Lorca, realizada por Xosé Lois Romero & Aliboria. Unha auténtica xoia con vídeo de Adrián Canoura

  6. 06

    Dani: Drum&Bossa

    Dani Costas é de Vigo. Procede de familia musical, pero nos últimos anos foi abrindo o seu propio camiño na escena cun estilo persoal e inconfundible que deixou pegada. 'Drum&Bossa' é o último single do EP do mesmo nome

  7. 07

    LaMontagne & PicoAmperio: Porque no Mundo

    Algo que sinalar é o primeiro disco de LaMontagne & PicoAmperio, un álbum no que atopamos este 'Porque no mundo'. "Este camiño que forxamos baséase en textos e a música avanza en función de onde nos levan, non hai fórmulas porque o que nos sae é outra cousa", dicían en conversa con VINTE.

  8. 08

    Baiuca: Diamante

    Baiuca segue rachando esquemas, abrindo espazos para a música tradicional galega e rompendo fronteiras entre xéneros. O seu último éxito é 'Diamante', coa voz da ilicitana Alba Reche

  9. 09

    Blanco Palamera: Mundo pequeno

    De Compostela chegan Blanco Palamera, que este ano publicaron INTIMIDADE. Máis recente aínda é 'Mundo pequeno', coa que continúan "unha das traxectorias máis prometedoras que saíu do pop galego ultimamente", como destacaba VINTE hai uns meses.

  10. 10

    Sés: Para cando eu morra

    Sés ten novo disco, Diante un eco, na que se inclúe este 'Para cando eu morra'. Trátase do sexto álbum da artista galega

  11. 11

    Catuxa Salom: Chicharras

    Hai dúas semanas Catuxa Salom lanzou o seu primeiro EP, Nunha aldea, con cinco cancións que se pechan con este 'Chicharras', un tema híbrido que mestura o galego e o castelán e tamén o folk e a electrónica. Unha canción que fala moito de si mesma, das mesturas da súa propia condición de artista galega con orixes arxentinas.

  12. 13

    Carolina Rubirosa: Deus que leda que m'esta noite vi

    Carolina Rubirosa presentou hai dúas semanas 'Deus que leda que m'esta noite vi', o primeiro adianto de Soldadeiras, un disco onde a autora escribe e produce as músicas orixinais de sete cantigas medievais da lírica galego-portuguesa, con ritmos e sonoridades de vangarda.

  13. 14

    Carlangas & Manu Chao: Cae la noche

    Pechamos esta sesión con Carlangas, a voz de Novedades Carminha, que hai uns meses decidiu iniciar o seu proxecto persoal, que explora ritmos latinos e electrónicos e confesa que "alguna cumbia me perdí por andar de rockerito, pero no todas". Despois de 'Se acabó la broma' chegou este 'Cae la noche', coa colaboración nada máis e nada menos que de Manu Chao.