Unha ducia de obras do Museo de Pontevedra que agora se poden ver na rede

'Os Cegos', de Castelao

O Museo de Pontevedra conserva a colección máis importante da obra artística de Alfonso Daniel Rodríguez Castelao. Cadros, carteis, ilustracións, gravados... que suman 1.795 elementos, entre os que destaca por exemplo Os Cegos, realizada en 1915

'Festa galega', de Fernando Álvarez de Sotomayor

Outra das grandes obras da pintura constumista é Festa galega (1917), de Fernando Álvarez de Sotomayor, e tamén se pode ver no Museo de Pontevedra e na súa web.

'Cabeza de mujer negra', de Maruja Mallo

O Museo de Pontevedra ten no seu fondo a Cabeza de mujer negra, realizada pola viveirense Maruja Mallo no ano 1946.

'Estudio: Caretas y Flores', de Arturo Souto

O pontevedrés Arturo Souto é un dos grandes nomes da pintura galega do século XX. Comprometido coa defensa da República e a loita antifascista, tivo que se exiliar en México, onde morreu en 1964. A súa obra, moi creativa e curiosa, pasou por distintas etapas. Este Estudio: Caretas y Flores foi realizado en 1929

'Autorretrato', de Carlos Maside

No Museo de Pontevedra hai tamén obras de Carlos Maside, como este Autorretrato realizado polo pintor en 1928.

'Com'este morreron moitos', de Federico Ribas Montenegro

O vigués Federico Ribas Montenegro foi sobre todo ilustrador e cartelista e nos anos 20 e 30 estaba entre os máis cotizados de todo o Estado. Foi un publicista prolífico e brillante e, por exemplo, modernizou a imaxe do sector conserveiro galego. En 2019 a Asociación Galega de Profesionais da Ilustración (AGPI) dedicoulle o Día da Ilustración, salientando o seu traballo cheo de cor, no que destacaba a imaxe "moderna e independente" da muller. 

Porén, en 1936 tivo que se exiliar en Bos Aires, colaborando con Seoane na denuncia grafica do terror franquista con obras coma este Com'este morreron moitos. que ía acompañado do texto: "Ese ya no volverá a pedir aumento de jornal!

'Campesinas dialogando', de Luís Seoane

Precisamente, de Seoane o Museo de Pontevedra atesoura este 'Campesinas dialogando', realizado en 1975

'Negriño en Nova York', de Castelao

Poderíanse citar moitísimas obras destacadas da amplísima produción de Castelao, entre ilustracións e gravados. Por exemplo este Negriño en Nova York, realizado polo rianxeiro no seu paso pola cidade estadounidense en 1939 e que forma parte da súa serie Debuxos de negros

Máscara para a representación de 'Os vellos non deben de namorarse'

Ou outro tipo de obra moi distinta, como esta máscara para a representación de Os vellos non deben de namorarse, deseñada polo propio Castelao en 1941. Na colección online do Museo de Pontevedra atopamos 6 destas máscaras, ademais de moitas ilustracións previas.

Cunca Millefiori, atopada no Castro de Santa Trega en 1986

O Museo de Pontevedra atesoura moito máis que obras pictóricas e escultóricas. Por exemplo, unha importantísima colección arqueolóxica con pezas procedentes de toda Galicia, como esta Cunca Millefiori, da época galaico-romana (século I d.C.), atopada no Castro de Santa Trega en 1986. Trátase dun dos primeiros indicios de vidro romano de luxo documentados no noroeste peninsular.

Estela de Vilar de Sarria

Ou esta Estela de Vilar de Sarria (s. II - III d.C.), unha excepcional estela funeraria traballada polas dúas caras, sen inscrición nin epígrafe e cunha escena simbólica no reverso.

Ídolo de Pumares, A Estrada

Moito máis antigo é este ídolo antropomorfo de Pumares, atopado neste lugar da Estrada, un exemplo dos obxectos relacionados coas crenzas relixiosas do Neolítico, datado entre os anos 5500 e 3000 a. C.

Tesouro de Caldas

O tesouro de Caldas de Reis é un conxunto de 36 pezas de ouro de vinte quilates pertencente á Idade de Bronce galaica e cun peso total de 15 quilos, que constitúe a maior acumulación de ouro de toda a Prehistoria europea. Apareceu na zona das Silgadas en 1940 e acabou por ser depositado no Museo de Pontevedra despois de que a Garda Civil impedise a súa venda.

Olifante medieval

O Museo conta tamén con pezas tan curiosas como este olifante realizado en marfín de elefante na actual Serra Leoa a finais do século XV. Foi un encargo da portuguesa Casa de Avís que foi finalmente entregado aos Reis Católicos.