Unha ducia de promesas de "cambio" electoral
En plena campaña electoral, son moitos os partidos que apelan ao "cambio" nos seus lemas electorais. Agora e sempre. PSOE, PP, CiU, Podemos, ICV ou BNG coincidiron na chamada a cambiar as cousas algunha vez na súa traxectoria. Velaquí algúns exemplos.
-
01O PSOE e Felipe González
O PSOE accedería por primeira vez á Moncloa con este lema histórico en 1982. Non sería, nin moito menos, a última vez que se apelase ao cambio nunhas eleccións.
-
02Tamén Francisco Vázquez
Nunha versión menos refinada, Francisco Vázquez tamén pedía o voto polo cambio naquel 1982.
-
03Pujol e a coalición para o Senado
Jordi Pujol formou parte dunha candidatura en coalición catalá para o Senado en 1977. A formación considerábase "unha garantía para o cambio".
-
04Beiras, por un "cambio transformador"
Nas eleccións ao Parlamento galego de 2001, Xosé Manuel Beiras era o candidato á presidencia da Xunta polo BNG. A fronte nacionalista escollera como lema: O País entre todos, un cambio transformador.
-
05Nicolás Redondo e o PSE-EE
Tamén en 2001, nas eleccións autonómicas vascas, o PSE-EE apelaba ao "cambio e liberdade" para atraer o voto en Euskadi.
-
06Pasqual Maragall
Ano 2003. Pasqual Maragall, como líder do PSC, apela ao "canvi per Catalunya" nas eleccións autonómicas de 2003. Non sería a única vez que o ex president empregase un lema semellante nas súas campañas.
-
07ICV e Joan Saura
Tamén en 2003, tamén nas autonómicas catalás. Joan Saura, cabeza de lista por ICV apela a un "canvi de debò" (cambio de verdade) para pedir o voto para a súa formación.
-
08Artur Mas: Comença el canvi
Eleccións autonómicas de 2010 en Catalunya. Artur Mas é o cabeza de lista da desaparecida CiU, que emprega como lema de campaña Comença el canvi (Comeza o cambio), unha frase que sería empregada posteriormente por outros rivais políticos.
-
09O PP gaña en 2011
"Súmate al cambio". Con este lema de campaña obtivo o PP a maioría absoluta nas eleccións xerais de 2011. Copiou así a mensaxe que antes empregaran o PSOE ou CiU, entre outros. E funcionoulle.
-
10Podemos e o cambio
Podemos empregou a palabra "cambio" en moitos dos seus lemas. Chamou á Marcha do Cambio a principios deste 2015 e presentouse ás eleccións andaluzas co lema: "En Andalucía empieza el cambio".
-
11Ciudadanos
"El Cambio". Ese é o lema de Ciudadanos nesta campaña para as eleccións xerais do 20D. A formación laranxa apela ao mesmo que apelaron moitos dos seus rivais políticos, incluídos aqueles aos que di non parecerse nada.
-
12El canvi no s'atura
En Comú Podem, coalición de esquerdas catalá que se presenta ás eleccións xerais deste 20D, apela ao cambio en moitos dos seus lemas. No seu principal de campaña, advirten que "el canvi no s'atura" (o cambio non se detén), ao xeito doutras candidaturas de confluencia que, como En Marea, chaman a "mudalo todo".