Unha ducia de publicacións históricas da emigración galega
As colectividades galegas no exterior publicaron dende finais do século XIX un gran número de cabeceiras, dende a pioneira La Gaita Gallega editada na Habana en 1872 ata outros xornais e revistas nacidas en Bos Aires, Montevideo, Caracas, Nova York ou en distintos lugares de Europa. O Arquivo da Emigración do Consello da Cultura Galega ofrece de balde na rede unha ampla biblioteca con moitas destas cabeceiras, que dan conta da importancia histórica da diáspora galega.
-
01Galicia. Revista del Centro Gallego de Buenos Aires
Esta revista, de carácter mensual, foi editada polo Centro Gallego de Buenos Aires a partir do ano 1926 para substituír ao seu Boletín e continuou durante todo o século XX. Nos primeiros números editou 16.000 exemplares, que chegaron a ser 35.000 nos anos 80 do pasado século. Ao longo da súa historia colaboraron na publicación Eduardo Blanco Amor, Salvador Lorenzana (Francisco Fernández de Riego) e moitos outros autores procedentes da intelectualidade do país, emigrada ou residente en Galicia.
-
02Céltiga
Dirixida por Eduardo Blanco-Amor, Eliseo Pulpeiro e Ramón Suárez Picallo, Céltiga foi o punto de encontro da intelectualidade galega residente en Arxentina entre 1924 e 1932. De carácter quincenal e subtitulada 'Revista Gallega de arte, crítica, literatura y actualidades',polas súas páxinas, cun coidado deseño, pasaron Castelao, Maside, Suárez Couto, Francisco Asorey ou Luis Ksado.
-
03El Despertar Gallego
O xornal, dirixido por Antón Alonso Ríos, naceu en 1922 como "Órgano mensual de la Federación de Sociedades Gallegas Agrarias y Culturales de la República Argentina" e editouse ata 1930. A publicación, igual que a propia federación, evoluciona dende unha perspectiva socialista a ter unha orientación nacionalista, o que provoca numerosas controversias na mesma, que rematarán coa ruptura da Federación, continuando El Despertar Gallego como voceiro do sector nacionalista.
-
04El Eco de Galicia
El Eco de Galicia (Revista Semanal de Ciencias, Arte y Literatura) foi fundado en 1898 na Habana por Waldo Álvarez Ínsua e editouse ata 1902. O obxectivo da publicación era ser "el defensor de nuestros intereses, de nuestro buen nombre y una prueba de nuestra cultura e ilustración". Nas súas páxinas aparece unha das primeiras descricións documentadas da bandeira galega.
-
05Nova Galicia
O xornal Nova Galicia, fundado en Bos Aires en 1901 por Fortunato Cruces, era unha publicación de información xeral dirixida aos galegos de América, que trata de pór de relevo a cultura galega a través de artigos sobre a súa lingua, literatura, costumes, historia ou música. Edítase cando menos ata os anos 50. "O nome d-esta revista nece d'esa ebullición, qu'enriquece ê rexenera a galleguiña rexión" era un dos seus lemas.
-
06Acción Gallega
Acción Gallega, dirixida por Rodolfo Prada, foi entre 1920 e 1925 a publicación oficial de Casa de Galicia de Bos Aires.
-
07Correo de Galicia
Correo de Galicia editouse entre 1908 e 1945 en Bos Aires, dirixido por José Ramón Lence. A orientación ideolóxica da revista asume posturas galeguistas e mesmo republicanas durante a ditadura de Primo de Rivera, pero posteriormente toma postura en 1936 a favor do bando franquista. A partir de 1945 pasa a chamarse Nuevo Correo e, despois, Faro de España.
-
08Galicia emigrante
Galicia Emigrante publicouse en Bos Aires entre 1954 e 1959, dirixida por Luís Seoane. Esta revista cultural, cunha coidada edición, aspiraba a "ser espejo en esta capital de la vida y actividad de los emigrantes gallegos". Contaba con numerosas seccións, que trataban dende a cociña galega ás achegas da colectividade á vida económica, social e cultural arxentina.
-
09Lar
A partir de 1934, Lar foi a revista mensual da Asociación Gallega de Beneficencia y Mutualidad de Bos Aires, ou o que é o mesmo, do Hospital Gallego desta capital. Con motivo dos Día de Galicia editaban números extraordinarios nos que colaboraban numerosos intelectuais galegos con artigos sobre a cultura e a historia do país.
-
10Adiante. Orgâo das Mocedades Galeguistas
Adiante, subtitulada 'Orgâo das Mocedades Galeguistas', publicouse a partir de 1954 en Bos Aires, de forma irregular e cunha distribución de balde, editada pola Irmandade Galega de Bos Aires
-
11A Nosa Terra
A Irmandade Galega de Bos Aires publicou A Nosa Terra entre 1942 e 1972, recollendo a histórica cabeceira do Partido Galeguista, que despois continuaría a partir de 1977 xa en territorio galego. Tratábase dunha publicación política, marcadamente nacionalista, na que colaboraron dende o propio Castelao ata Manuel María, pasando por Ramón de Valenzuela ou Ramón Suárez Picallo.
-
12Portada de Vieiros
O primeiro Vieiros foi editado en México D.F. entre 1959 e 1968 como Revista do Padroado da Cultura Galega de México. Esta cabeceira publicaba "calquera idea literaria artística, filosófica, sempre que fose antifascista e non se apoiase na ditadura". Xosé Luís Méndez Ferrín, Carlos Velo, Ramón Otero Pedrayo, Francisco Fernández del Riego, Carlos Maside, Isaac Díaz Pardo ou Luís Seoane pasaron polas súas páxinas.
-
13Galicia. Revista del Centro Gallego de Caracas
O Centro Gallego de Caracas publicou a revista Galicia entre 1952 e 1954 e incluía colaboracións literarias de destacados autores residentes dentro e fóra de Galicia.
-
14Alma Gallega
Alma Gallega, editada entre 1934 e 1967, foi o órgano oficial da Casa de Galicia de Montevideo, chegando a publicar 30.000 exemplares no ano 1946
-
15Casa Galicia
A Casa Galicia de Unidad Gallega, de Nova York, editou esta publicación a partir de 1940 e mantívoa durante décadas. Ademais de informar das actividades da sociedade, incluía artigos sobre Galicia e a súa cultura, economía e historia, redactados por intelectuais galegos de recoñecido prestixio.