Unha ducia de restaurantes galegos recoñecidos cos Soles da Guía Repsol

A Tafona (Santiago)

A cociña galega está de moda. E unha das estandartes é Lucía Freitas e o seu restaurante A Tafona, que entrou no selecto club dos establecementos con 3 Soles (46 en todo o Estado e só tres en Galicia). Cada local ten o seu sinal da identidade e o da Tafona é a súa cociña comprometida co territorio e as produtoras de alimentos. Freitas combina mar e horta e reivindica os vexetais sinxelos.

Ademais, no seu proxecto Amas da Terra, Freitas busca poñer en valor o papel das mulleres, maioritariamente do rural, na cadea que conforma a gastronomía galega: produtoras agrogandeiras, mariscadoras e cociñeiras.

🟪🟧🟦 📺 EN VINTE | Vinte almorzando con Lucía Freitas

Casa Solla (Poio)

A Tafona uniuse aos outros dous restaurantes galegos que xa contaban con 3 Soles. Un deles é Casa Solla, en Poio. Dende a súa casa familiar Pepe Solla une tradición culinaria con sensibilidae contemporánea nunha carta que combina mariscos das rías galegas, peixes atlánticos, verduras da horta e carne de razas autóctonas.

Culler de Pau (O Grove)

O outro galego no top de Repsol é Culler de Pau (O Grove), de Javier Olleros, que aposta por texturas delicadísimas sobre unha materia prima sobresaliente. Olleros busca a pureza do sabor en pratos nos que nada é unicamente decorativo, senón que todo ten a súa función.

As Garzas (Malpica)

Este ano non houbo incorporacións galegas á segunda categoría da Guía Repsol (os 2 Soles), pero neste nivel hai un total de 12 restaurantes do país, ben distribuíndos polo territorio: dende Viveiro e Lugo ata Cambados ata Santa Comba ou Padrón.

En Malpica, As Garzas é un deles, con máis de 50 anos de experiencia, sempre mirando ao mar. O menú, responsabilidade de Fernando Agrasar, permite optar por unha vertente tradicional e outra máis moderna.

O Camiño do Inglés (Ferrol)

En Ferrol, O Camiño do Inglés, o restaurante de Daniel López, aposta por mesturar a raíz galega coas influencias internacionais, en pratos como o kebab de polbo ou o centolo guisado con lentellas estilo black pepper crab.

Maruja Limón (Vigo)

En Vigo, Maruja Limón, de Rafael Centeno e Inés Abril, acadou os 2 Soles o pasado ano cun menú que cambia en función da tempada e no que, como é habitual en Galicia, une terra e mar.

Marna (Pontevedra)

Na terceira categoría, de 1 Sol, hai un total de 34 restaurantes galegos. Oito deles recibiron a distinción na edición deste ano. Repasámolos todos aquí:

O Marna de Pontevedra, situado na Praza da Ferraría, é o proxecto de Ismael López e Marta García Justo.

Alberte (Vigo)

O restaurante de Alberte Gutiérrez, Alberte (en Vigo), aposta pola slow food e pola cociña de produto local e de tempada e unha presentación sen artificios.

O Secadeiro (Outes)

O Secadeiro, situado en Banzas (Outes), o restaurante de Fernando Rodríguez e Eva Guzmán, destaca polo uso dos vexetais, algúns deles variedades recuperadas da zona. 

El de Alberto (A Coruña)

El de Alberto (A Coruña) é o restaurante de Alberto Prieto e do seu fillo Aitor. Todo un clásico na Coruña que recibe agora o seu primeiro Sol grazas a un impulso á súa cociña sen abandonar as bases que foron contruíndo o local.

Gunnen (A Coruña)

Gunnen, no barrio coruñés de Matogrande, é o restaurante de Chechu Rey, que desenvolve unha cociña de investigación a partir da materia prima galega.

Vértigo (Sober)

O Vértigo, en Sober, atópase en plena Ribeira Sacra, terra de viños e de paisaxe celestial. Cociña, viños e paisaxe únense no proxecto de Rafa Centeno que confirma o de que "para comer, Lugo".

Miguel González (Ourenser)

O restaurante de Miguel González trasladouse do Pereiro de Aguiar ao centro de Ourense, nunha localización perfecta, fronte ao Mercado e ás portas do casco histórico.