Unha ducia de roteiros do Consello da Cultura para coñecer Galicia a través das súas letras
O Consello da Cultura Galega desenvolve o proxecto Roteiros da cultura, co obxectivo de "dar a coñecer os recursos culturais e paisaxísticos de Galicia" a través da vida e obra de autores e autoras. Trátase de itinerarios para realizar a pé ou noutros medios transporte que na web se acompañan de materiais documentais para coñecer mellor os distintos lugares de paso. O último roteiro engadido á lista (que xa suma 36 exemplos) é o que segue os pasos dos membros do Seminario de Estudos Galegos polas Terras de Melide, lembrando o traballo de campo realizado por eles hai un século.
-
01A Terra de Melide e o Seminario de Estudos Galegos
O último roteiro incorporado ao proxecto visita os lugares nos que os integrantes do Seminario de Estudos Galegos levaron a cabo o traballo de campo e investigacións que deron lugar ao libro Terras de Melide, percorrendo espazos coma San Antolín de Toques, Pena Moura ou mesmo a Casa Aceitero, pensión na que se hospedaron os membros do SEG durante o seu traballo de estudo.
-
02A Mariña de Lois Tobío
Este roteiro permite coñecer a vila de Viveiro e outras localidades da Mariña occidental baixo os ollos e a vida do diplomático e escritor Lois Tobío, unha das voces do galeguismo da República e do exilio
-
03A Costa da Morte de Eduardo Pondal
Eduardo Pondal foi o gran poeta da Costa da Morte. Este roteiro percorre o litoral dende Malpica ata a praia de Nemiña, amosando a inspiración de Pondal na toponimia e nas paisaxes da súa terra natal.
-
04Cunqueiro nas Terras de Miranda
Falar de Cunqueiro é falar de Mondoñedo e das Terras de Miranda. Este roteiro toma a vila mindoniense como centro e percorre toda esta comarca, pasando por Riotorto, Vilanova de Lourenzá, Abadín, Meira, A Pastoriza.
-
05O Ferrol de Comerma
Este roteiro, deseñado e escrito por Guillermo Llorca Freire con fotografías do do autor e de Mario Llorca Loureiro, percorre o centro histórico de Ferrol seguindo os pasos do científico e divulgador Andrés Avelino Comerma, o enxeñeiro Comerma
-
06Ribadeo indiano
A pegada indiana en Ribadeo é innegable e o seu recordo chega ata nós todos os verán a través da festa do Ribadeo Indiano e está presente en construcións coma a Torre dos Moreno, a Casa do Óptico ou a Granxa-Escola Pedro Murias, presentes neste roteiro.
-
07Ares Indiano
Ares é outra das localidades galegas que posúe un maior número de mostras da arquitectura indiana, coma a Alianza Aresana de Instrucción, de 1911, na imaxe, a casa de Antonio Vilar ou as casas das irmás Ramos Bugallo. Este roteiro percorre algunhas delas.
-
08Castelao no Barbanza
Castelao naceu en Rianxo. Aínda que ao longo da súa vida outros lugares marcaron tamén a súa traxectoria (Pontevedra, Arxentina, Cuba...), o Barbanza foi clave para o político e intelectual. Este roteiro percorre moitos espazos da vila rianxeira, pero tamén do resto da bisbarra.
-
09Afonso X e Galicia
O proxecto inclúe unha serie de sete roteiros que amosan a relación do rei Afonso X con Galicia, percorrendo o oeste e sur da provincia da Coruña, o sur da provincia de Ourense e a Ribeira Sacra, o conxunto da provincia de Lugo e o norte da de Pontevedra. Na imaxe, o mosteiro de Armenteira.
-
10Curros Enríquez en Ourense
Na web do CCG hai dous roteiros nos que Curros Enríquez é protagonista, un centrado na cidade da Coruña e outro que percorre a provincia de Ourense, polos polos concellos de Celanova, Barbadás, Ourense e O Pereiro de Aguiar, todos eles relacionados coa vida e a obra do poeta.
-
11Pra'Habana me vou
O proxecto do CCG inclúe dous roteiros fóra de Galicia, pero moi vinculados ao país. Ambos os dous percorren a Habana, destacando o primeiro aqueles espazos máis importantes para a importante emigración galega en Cuba e o segundo seguindo os pasos de Castelao pola illa.
-
12Faraldo, alma e mente da revolución de 1846
No Ano Faraldo, que en 2022 celebrou o 200 aniversario do nacemento en Betanzos do xornalista e político Antolín Faraldo, o CCG publicou este roteiro realizado por Xurxo Martínez González, centrado na cidade de Santiago. Faraldo trasladouse aos dez anos a Compostela coa súa familia e foi aquí onde liderou a revolución de 1846.