Unha ducia de tomas de posesión con e sen crucifixo
Unha nova promesa ou xuramento dun cargo público e un novo debate sobre os obxectos empregados lévannos a lembrar unha ducia de actos similares e como foi variando a simboloxía neles empregada.
-
01Pedro Sánchez, 2020
A toma de posesión o pasado mércores de Pedro Sánchez como presidente do Goberno central foi unha promesa ante un exemplar da Constitución, sen máis engadidos.
-
02Pedro Sánchez, 2018
Malia que a desta semana volveu xerar debate, a toma de posesión de Sánchez en 2018 tras a moción de censura que apartou a Mariano Rajoy xa fora exactamente igual, só cun exemplar da Constitución.
-
03Felipe VI, 2014
O propio Felipe VI, tras abdicar o seu pai, foi coroado en 2014 no Congreso ante a Constitución, sen símbolos relixiosos.
-
04Fernando González Laxe, 1987
En Galicia a toma de posesión sen crucifixo en 1987 do socialista Fernando González Laxe foi moi criticada. (Imaxe da TVG).
-
05Alberto Núñez Feijóo, 2003
Durante os gobernos de Manuel Fraga o crucifixo volveu aparecer nas tomas de posesión, como a de Feijóo como conselleiro en 2003. (Imaxe da TVG).
-
06Emilio Pérez Touriño, 2005
Coa chegada do bipartito o crucifixo volveu desaparecer e o presidente Touriño prometeu o cargo ante exemplares da Constitución e o Estatuto. (Imaxe da TVG).
-
07Anxo Quintana, 2005
Similar simboloxía presentou, dous días despois da de Touriño, a toma de posesión do seu vicepresidente Anxo Quintana e do resto do Goberno galego. (Imaxe da TVG).
-
08Alberto Núñez Feijóo, 2009
Coa volta do PP á Xunta, o crucifixo e a Biblia volveron aparecer, como na primeira toma de posesión de Feijóo como presidente.
-
09Alberto Núñez Feijóo, 2012
A segunda toma de posesión de Feijóo, en 2012, volveu repetir simboloxía.
-
10Alberto Núñez Feijóo, 2016
Porén, na terceira toma de posesión de Feijóo, en 2016, dous anos despois de que o propio monarca prescindise do crucifixo, este desapareceu e só ficou a Biblia.
-
11Fabiola García, 2018
O crucifixo seguiu sen aparecer nas tomas de posesión de novos membros da Xunta, como na crise de goberno de 2018.
-
12Corina Porro, 2019
Pero no último ano o crucifixo volveu ao grande, no acto ao aire libre de toma de posesión de Corina Porro como delegada da Xunta en Vigo.