Unha ducia de visitas virtuais para viaxar por Galicia sen saír da casa
Vivimos tempos de restricións para viaxar, acceder a museos, exposicións ou monumentos. Aínda é posible facelo, pero con limitacións. Porén, as ferramentas tecnolóxicas permiten facer moitas visitas de maneira virtual, o que facilita percorrer as principais catedrais e igrexas galegas, o Castro de Viladonga ou varios museos -dende o Mupega ao Museo do Mar- sen saír da casa. Dende logo, non é o mesmo que camiñar por eles, pero é unha forma de ir acalmando a fame de viaxes.
-
01Catedral de Santiago
A Catedral de Santiago é un dos momentos que se pode percorrer nunha visita virtual, en varias versións, ademais. Poderemos pasear polo Pórtico da Gloria, pero tamén polos tellados ou a cripta do monumento, e igualmente achegarnos ao Museo das Peregrinacións.
-
02Mupega
Hai moitos museos en Galicia, pero ningún coma o Museo Pedagóxico de Galicia (Mupega). Esta visita virtual permite acceder ás súas salas e colección, que amosa instrumentos e materiais empregados no ensino noutro tempo, fotografías históricas e reconstrucións de aulas de diferentes épocas.
-
03Museo Massó e Museo do Mar
Galicia é terra mariñeira. Tanto o Museo Massó (Bueu) coma o Museo do Mar de Galicia (Vigo), exploran esa relación de séculos, no caso da instalación viguesa a través de catro exposicións: 25 séculos de oceanografía, A conquista do mundo submarino, Galicia Mare Nostrum e A pesca en Galicia.
-
04Museo do Castro de Viladonga
O Castro de Viladonga (Castro de Rei) é un dos mellor conservados en Galicia e conta cun museo dende hai case 40 anos. Ese museo pode percorrerse tamén virtualmente, tanto as súas salas interiores como algúns dos seus espazos ao aire libre.
-
05Museo do Videoxogo
Do mundo castrexo á era dos videoxogos, a industria cultural que máis medra dende hai moitos anos. Cangas acolle o Museo do Videoxogo (MUVI), que hai uns días realizou unha exposición virtual sobre as "Mulleres detrás dos videoxogos", centrada nas creadoras que están dando forma ás últimas creacións, e que formou parte das xornadas do mesmo nome que acolleu a Universidade da Coruña.
-
06Galicia, un relato no mundo
Ademais dos museos permanentes, tamén se poden realizar visitas virtuais a exposicións temporais anteriores, ofrecendo polo tanto a posibilidade de acceder a instalacións xa non visibles por outra vía. É o caso da mostra 'Galicia, un relato no mundo', que estivo o pasado ano na Cidade da Cultura, e que analizamos nestoutra ducia.
-
07O Cebreiro
Podemos visitar igualmente O Cebreiro e as súas pallozas, dende a casa e sen pasar frío.
-
08Pazo de Tor
A Rede Museística da Deputación de Lugo ofrece tamén varias visitas virtuais, entre as que destacan a de San Paio de Narla, o Pazo de Xelmírez ou o Pazo de Tor, en Monforte de Lemos, co famoso labirinto barroco da súa horta, formado por catro espirais.
-
09Catedral de Ourense
A web de Turgalicia ofrece paseos virtuais polas cinco catedrais galegas (Santiago, Lugo, Mondoñedo, Tui e Ourense). A sé ourensá destaca pola súa beleza, especialmente no Pórtico do Paraíso. Dende aí podemos achegarnos á sobria Catedral de Tui
-
10Museo Etnolóxico de Ribadavia e Museo do Pobo Galego
De museo en museo, tamén hai tempo para percorrer os dedicados á etnografía, coma o Museo Etnolóxico de Ribadavia ou o propio Museo do Pobo Galego
-
11San Pedro de Rocas
A web de Turgalicia ofrece a posibilidade de acceder ao interior de ao redor de 80 igrexas e mosteiros de toda Galicia e de pasear polas súas naves, claustros, ábsidas e capelas. Dende San Estevo de Ribas de Sil, Carboeiro, Sobrado dos Monxes ou Armenteira ata as pequenas igrexas de San Pedro de Rocas e San Xusto de Toxosoutos, o mosteiro de Santa Cristina de Ribas de Sil ou o convento de Caaveiro.
-
12Catedral de Lugo
A visita pode rematar na Catedral de Lugo e as súas fermosas pinturas barrocas da bóveda do seu altar maior. Dende aí, sen movernos da provincia, viaxaremos á Catedral de Mondoñedo