A hostalaría compostelá saíu as rúas da capital galega en defensa do sector. Centos de persoas --1.500 segundo os organizadores, na que consideran "a maior mobilización do sector na historia de Galicia"-- concentráronse e manifestáronse en Santiago para denunciar as consecuencias das restricións que sofren estes locais e o negro horizonte que din ter, ademais de para reclamar á Xunta que impulse un plan de rescate, con medidas de apoio específicas para saír dunha situación que cualifican de "límite". 

O sector da hostalaría critica unhas restricións "desproporcionadas" e pide á Xunta un plan de rescate

Os responsables destes locais advirten de que non son o problema senón "parte da solución" e critican unhas medidas "desproporcionadas" contra un sector que, lembran, representa sobre o 20% do PIB galego. Ademais, aseguran que os brotes en locais de lecer supoñen un 2,1% do total segundo os datos do Ministerio de Sanidade, que o pasado venres situaba esta porcentaxe de gromos en pubs, restaurantes e bares no 5,76%. 

O sector concentrouse sobre 11 horas na Praza do Obradoiro, seguindo estritamente as medidas de distanciamento interpersoal, e alí os actores Federico Pérez e Patricia Vázquez puxeron voz ao manifesto e ás reivindicacións dos negocios composteláns, que denuncian a situación "insustentable" na que se atopan.

"Non existe un plan de rescate, máis aló de anuncios improvisados que non se concretan"

Os traballadores e representantes destes negocios reclaman diálogo e que a Asociación de Hostalaría e do lecer nocturno poida estar nos foros nos que se debate e se discuten sobre o sector e censuran que "non existe un plan de rescate, máis aló de anuncios improvisados que non se concretan" por parte da Xunta. 

Ademais, denuncian a "criminalización" á que son sometidos e aclaran que a súa actividade estivo marcada polo cumprimento "escrupuloso" das medidas de seguridade, como demostra a "práctica inexistencia de sancións que existen". 

En declaracións aos medios, Lois López, da directiva da Asociación Hostalaría Compostela, calculou o apoio do sector na manifestación entre 1.500 e 2.000 persoas e reivindicouno para evidenciar o rexeitamento ás medidas "desproporcionadas" que sofren, as mesmas que outros territorios que contan cunha incidencia acumulada "que triplica" a galega.

En todo caso, "se esas medidas son as que teñen que ser e se non hai outra maneira de combater a pandemia", advertiu, deben acompañarse dun plan de rescate económico para que estes negocios poidan afrontar os gastos fixos e non se vexan obrigados a decretar o peche.

Respecto diso, asegurou que os cálculos que manexan indican que o 30% dos establecementos veranse obrigados a "pechar definitivamente" no caso de que non existan estas axudas, necesarias para "poder seguir mantendo estes negocios".