RDG, empresa impulsada polo Goberno galego para explotar recursos naturais, merca ao Sabadell por 75 millóns 11 aeroxeradores en Trabada
Recursos de Galicia (RDG), empresa privada na que a Xunta participa co 30% do capital xunto con outras firmas galegas, vén de mercar por 75 millóns de euros o seu primeiro parque eólico, o denominado Mondigo, de 11 aeroxeradores entre Trabada e Ribadeo.
O presidente Rueda presentou este paso como o primeiro parque eólico propiedade da Xunta e avanzou que permitirá á veciñanza máis próxima -cifrouna en "500 fogares"- beneficiarse de descontos nas facturas da luz, para o que terá que pedilo expresamente en función da comercializadora de electricidade contratada en cada caso.
O parque eólico Mondigo, xa en funcionamento con 11 aeroxeradores e 49,5 MW, foi comprado por RDG a unha empresa propiedade do Banco Sabadell por 75 millóns de euros nunha operación "á que tamén aspiraba capital foráneo". Isto é, non é que RDG ou a Xunta convocasen un procedemento público para adquirir un parque eólico á empresa que estivese disposta a vendelo a un menor prezo senón que RDG realizou a oferta que o Sabadell considerou mellor para vender o seu parque eólico nun "proceso competitivo de venda".
Segundo o avanzado este luns polo Goberno galego, para "socializar" os beneficios da enerxía eólica en Galicia haberá unha bonificación da factura eléctrica de "ata o 80%" á veciñanza máis próxima. Será nun radio de 1,8 quilómetros, segundo aclarou a Xunta nun comunicado este luns logo de verbalizar inicialmente tras o Consello da Xunta que serían 2 quilómetros.
A veciñanza máis próxima será beneficiada segundo cal sexa a súa comercializadora de electricidade
Para beneficiarse da bonificación a Xunta habilitará un procedemento de solicitude a través de internet que implicará que as persoas interesadas "terán que subir as facturas de meses anteriores e comprobarase que as vivendas están nese radio". Os descontos aplicaranse "a través das comercializadoras" que decidan colaborar con esta iniciativa da Xunta ou a través da comercializadora propia que está a poñer en marcha RDG. Isto é, se a comercializadora que teña un veciño da zona decide non adherirse á iniciativa da Xunta, o veciño deberá mudar de comercializadora. E se ningunha comercializadora se une á iniciativa, a veciñanza terá que pasar o seu contrato á comercializadora de RDG para beneficiarse dese 80% de desconto.
Precedente en Muras e petición de Barreiros
A alcaldesa de Barreiros, atravesado pola liña de conexión do parque, reclama que os beneficios se estendan tamén á súa veciñanza
En Galicia o Concello de Muras, o de maior concentración de eólicos do país e gobernado polo BNG, xa viña bonificando a factura da luz da veciñanza de todo o seu termo municipal que así o solicitase.
Tamén no norte de Lugo, e logo de divulgar a Xunta a compra do parque eólico Mondigo, cos aeroxeradores emprazados en Trabada e Ribadeo pero coa liña de conexión que atravesa Barreiros, a alcadesa deste municipio reclamou este luns que a Xunta estenda os beneficios tamén á súa cidadanía. Ana Ermida, do BNG, así o solicitará a Recurso de Galicia, á que reclamará que os seus beneficios para a sociedade, xa que é unha empresa participada pola Xunta, sexan maiores que os anunciados este luns e se acheguen as acadados por Muras coa súa negociación directa con Iberdrola.
