A Xunta tenta legalizar un parque eólico fragmentado artificialmente argumentando que foi denunciado tarde

Parque eólico Sasdónigas Fase I (Mondoñedo), unha das dúas fases en que se dividiu ilegalmente, segundo sentenciou o TSXG, nunha imaxe na web de Norvento © Norvento

O Tribunal Superior sentenciou que a avaliación ambiental non fora adecuada, pero o Goberno galego e a empresa argumentan ante o Supremo que o recurso fora presentado contra a aprobación definitiva do parque e non contra o trámite ambiental previo

“No caso do parque eólico de Sasdónigas [en Mondoñedo] estamos ante unha fragmentación en dúas fases [de] un único parque eólico dividido artificiosamente polo promotor”. Así se pronunciou a finais do pasado ano o Tribunal Superior de Xustiza de Galicia (TSXG) nunha sentenza na que anulou a aprobación definitiva a finais de 2018 por parte da Xunta dese parque eólico, xa en funcionamento, porque a súa fragmentación artificial en dous impediu avaliar correctamente no seu conxunto os seus impactos.

Contra esa sentenza tanto o Goberno galego como a empresa promotora, Norvento, presentaron recursos de casación ante o Tribunal Supremo, que os vén de admitir a trámite nun auto que concreta o argumento esgrimido pola administración e a eléctrica sobre o que se terá que pronunciar, que se resume en que a denuncia contra o parque eólico se presentou tarde e o TSXG xa non podía pronunciarse sobre a súa avaliación ambiental.

Fragmento da sentenza do TSXG que anulou a aprobación definitiva do parque eólico de Sasdónigas, agora recorrida pola Xunta e a empresa ante o Tribunal Supremo CC-BY-SA Praza Pública

O recurso contra o parque eólico sobre o que sentenciou o TSXG formulouse contra a resolución da Xunta que fixo público o acordo de aprobación definitiva do Goberno galego, adoptado nun Consello da Xunta o 22 de novembro de 2018 presidido polo propio Feijóo e do que non informou ao seu remate, senón meses despois a través do Diario Oficial de Galicia. O Tribunal Superior considerou que a fragmentación artificial do parque para facilitar a súa aprobación impedira avaliar correctamente os seus impactos tanto ambiental como ao patrimonio, que foran validados nunha declaración de impacto ambiental previa.

Porén, Xunta e empresa consideran que o tribunal xa non podía pronunciarse sobre a legalidade ou non da avaliación ambiental ante un recurso que se dirixía contra o trámite posterior de aprobación definitiva do parque. Así que agora o Tribunal Supremo analizará “se, tras o outorgamento das autorizacións administrativas previa e de construción” do parque é posible discutir “con ocasión da impugnación do acordo de aprobación definitiva” por parte da Xunta, “a conformidade a dereito da declaración de impacto ambiental que as precedeu”.

No seu momento, na sentenza agora recorrida ante o Supremo, o TSXG salientara que na avaliación ambiental do parque “non se valoran correctamente elementos especialmente protexidos, como o Camiño de Santiago, constando unha vía do parque eólico que o cruza e que serve de comunicación entre Fase I e Fase II, resultando indispensable para o mantemento, resultando unha actividade prohibida” pola lei de patrimonio cultural de Galicia. A sentenza tamén indicaba que esa avaliación ambiental “non contén todos os informes sectoriais necesarios para valorar correctamente a incidencia ambiental da modificación proposta pola promotora”. 

Parque eólico de Sasdónigas nunha imaxe da web de Norvento e fragmento da sentenza que recolle como a empresa argumentou que os muíños serían "atractivos para os turistas" CC-BY-SA Norvento - Praza Pública

No proceso previo ante o TSXG, que censurou o impacto sobre o camiño de Santiago, a empresa argumentou que os muiños resultan "atractivos para os turistas"

Pola súa banda, no xuízo a empresa argumentara na súa defensa, segundo salientou o propio TSXG, “que os aeroxeradores resultan ‘atractivos para os turistas’; dando a entender que supoñen un valor engadido, en vez dunha grave afectación polo seu impacto visual e acústico”.

O parque eólico de Sasdónigas xa foi polémico pola decisión do goberno local de Mondoñedo, do PP, de rebaixarlle nun 50% (110.000 euros) o imposto de construción, segundo denunciou a finais de 2018 o PSdeG local.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.