O forte e repentino impacto económico da crise provocada pola expansión do coronavirus provocou que o Goberno central aprobase en varios decretos unha serie de medidas para paliar os efectos negativos nos máis vulnerables e en colectivos como o dos autónomos, boa parte deles obrigados a pechar os seus negocios polo confinamento ou pola importante redución de ingresos.
Naturgy negou a varios autónomos a suspensión temporal do subministro de maneira gratuíta, tal e como ordena o decreto do Goberno central
Entre as últimas medidas para os profesionais autónomos, máis de 210.000 en Galicia, o decreto-lei do pasado mércores 1 de abril incluía a "flexibilización" dos contratos de subministro eléctrico, dando a posibilidade aos interesados de modificar as condicións de cadanseus contratos, reducindo a potencia eléctrica contratada, modificando ou mesmo suspendendo temporalmente a subministración, tamén de gas natural, sen ningún tipo de custo, tampouco á hora de reactivar os anteriores contratos ou recuperar o subministro.
No entanto, a empresa Naturgy, cunha cota de mercado moi maioritaria en Galicia, negou esta posibilidade a varios profesionais autónomos que intentaron levar a cabo esas modificacións durante este xoves. Segundo varios testemuños recollidos --e comprobados-- por Praza.gal, a antiga Gas Natural Fenosa negou a gratuidade das modificacións ou suspensións temporais requiridas nos contratos e advertiu do custo que suporían eses cambios malia que o propio BOE advirte de que son de balde para os afectados.
Nalgúns casos, logo de tres conversas, persoal que atende as chamadas advertiu ao dono dun restaurante de que Naturgy "está estudando" a posibilidade ou non da aplicación dunha medida que foi publicada no BOE mediante decreto-lei e é de obrigado cumprimento. Noutros, advertiuse do custo que suporían estes cambios ou mesmo da imposibilidade de facelos de balde, tal e como xa decidiu o Goberno central.
Naturgy atribúe a negativa a un "erro ou equivocación" dos operadores e advirte de que as modificacións gratuítas dos contratos son xa "aplicables"
Preguntada pola cuestión, desde a delegación de Naturgy en Galicia advirten de que as medidas son "aplicables" desde o momento da publicación no BOE e que a negativa débese "a un erro ou equivocación dos operadores". "As reducións de potencia ou suspensións temporais solicitadas ao abeiro deste decreto están xa implementadas; a non atención destas demandas é claramente unha equivocación por parte do persoal que atendeu as peticións", explica a empresa, que atribúe os erros á situación creada por unha crise, a do coronavirus, que trouxo diferentes cambios lexislativos en moi pouco tempo.
Naturgy, ademais, lembra que durante a crise do coronavirus levou a cabo varias medidas como o subministro gratuíto de electricidade e gas a todos os hoteis e residencias que cedan as súas instalacións á sanidade pública para facer fronte ao virus. A compañía decidiu aprazar tamén as facturas de luz e gas de pemes e autónomos e que poderán pagarse na segunda metade do ano