Catro de cada dez parados galegos non cobran prestación ningunha

Mobilización da CIG ante unha oficina de emprego CC-BY-NC-SA CIG

O paro rexistrado baixou en Galicia en 3.608 persoas no pasado mes de marzo, o que supón un descenso do 1,29% con respecto ao mes pasado e dun 5% e 14.724 desempregados menos se comparamos as cifras coas de  hai un ano. En total, o país ten 276.463 parados inscritos, segundo os datos feitos públicos este mércores polos servizos públicos de Emprego, logo dunha baixada que a sitúa como a cuarta autonomía cun maior descenso relativo no último mes, aínda que é a décima con menor mellora en canto aos datos de hai doce meses.

Galicia ten 276.463 parados inscritos, 3.608 menos que hai un mes

No conxunto do Estado, o paro rexistrado baixou en 16.620 persoas en marzo (-0,35%), o que sitúa a cifra total en 4.795.866 desempregados, 239.377 menos que hai un ano, o que supón un descenso do 4,75%. Os datos fixeron xa que o Goberno central destacase que supoñen o mellor comportamento nun mes de marzo desde 2006. A baixada do número de parados rexistrados neste mes é o segundo que se produce desde 2009, logo de que o ano pasado baixase en case 5.000 persoas.

En canto aos datos por provincias, o paro rexistrado descendeu en todos os territorios galegos. Na Coruña fíxoo en 1.274 persoas (-1,16%); en Lugo en 691 (-2,42%); en Ourense en 287 (-0,94%); e en Pontevedra 1.356 (-1,21%). Por sectores, o desemprego descendeu en todos eles, menos no colectivo sen emprego anterior, onde se aumentou en 269 persoas. Non obstante, o desemprego caeu en 260 persoas na agricultura, en 520 na industria, na construción en 1.602 e en servizos en 1.495.

Máis do 95% dos contratos rexistrados en marzo foron temporais

Pero entre os datos positivos agroman tamén cifras que evidencian que a crise segue aí. E pega moi duro. A cifra de número de beneficiarios con prestacións en Galicia sitúase en 151.586, dos que máis de 72.000 cobran prestación contributiva, máis de 66.000 subsidio e case 13.000 a renda activa de inserción. Xa que logo, hai preto de 129.000 desempregados (o 41,3%) no país que non teñen ningún tipo de prestación, situándose a taxa de cobertura en só o 58,7% e o risco de exclusión social cada vez máis acentuado. Máis de catro de cada dez parados non cobran nada.

Catro de cada dez desempregados galegos non cobran prestación ningunha

No conxunto do Estado, tamén case catro de cada dez desempregados non cobran axuda ningunha, pero o dato é algo mellor que en Galicia. Xa que logo, a cobertura total do sistema de protección por desemprego situouse no 60,33%, fronte ao 63,25% de  hai un ano, o que supón un descenso da cobertura do 4,6%. Ademais, os gastos totais dos servizos públicos de emprego en prestacións ascenderon a case 2.300  millóns de euros no pasado febreiro, un 15,8% menos que no mesmo mes de 2013. En definitiva, son 2.750.074 as persoas que se beneficiaron destas prestacións.

Por outra banda, e respecto á contratación, en marzo rexistráronse nas oficinas do antigo Inem en Galicia un total de 51.055 contratos, un 18% máis que hai un ano e un 12,15% máis que no mes anterior. No entanto, deses máis de 50.000 contratos rexistrados, tan só 4.775, o 4,2%, foron contratos fixos, polo que máis do 95% son temporais. A contratación no conxunto do Estado aumentou en máis dun 25%, sendo a contratación fixa o 9,3% do total.

Galicia ten case 4.000 afiliados menos á Seguridade Social que hai un ano e segue unha tendencia contraria á do resto do Estado

Galicia conta con 3.060 cotizantes máis á Seguridade Social, un aumento de tan só o 0,34% con respecto ao mes anterior. Ademais, o número medio de afiliados no país sitúase en 906.050 persoas, 3.980 menos que hai un ano, unha tendencia contraria á do resto do Estado, o que evidencia os problemas do mercado laboral galego, cunha forte contracción na poboación con idade de traballar que emigra por falta de futuro.

No conxunto do Estado, a media de afiliados é de 83.984, o seu mellor dato desde 2007, e que sitúau o total de ocupados en 16.296.288.

Xente nunha oficina de emprego en Galicia CC-BY-NC-SA CIG

Despece

  • A economía crea case tanto emprego autónomo como asalariado

    Das grandes cifras estatais do mercado laboral tíranse en marzo datos que soan positivos: o paro rexistrado baixou en 16.620 persoas, até un total de 4.795.866 desempregados inscritos nas oficinas de emprego; e a Seguridade Social gañou 83.984 afiliados. A letra pequena, con todo, mostra varias eivas. Por exemplo, o tipo de empregos que está a crear o mercado laboral: no último ano, a economía española só foi capaz de crear 60.756 postos de traballo asalariados, practicamente a mesma cantidade de empregos autónomos que se xeraron no mesmo período: 55.748 (sen ter en conta o sistema especial de autónomos agrarios, que destruíu emprego).

    As boas cifras do paro teñen detrás o impulso do autoemprego

    As cifras revelan que o ritmo de creación de emprego autónomo é moito maior que o de creación de emprego asalariado, é dicir, as boas cifras teñen detrás o impulso do autoemprego: o traballo asalariado crece a un ritmo do 0,46%, mentres que o autónomo faio ao 2%, case cinco veces máis rápido. Ademais, a ganancia mensual de afiliados á Seguridade Social queda en 25.475 persoas en termos desestacionalizados.

    A comparación non é pouco importante, sobre todo se se ten en conta que a Seguridade Social tiña rexistradas en febreiro 1.382.527 empresas. É este tecido empresarial o que creou 60.756 empregos no último ano, practicamente o mesmo número de persoas que se incorporaron as listas da Seguridade Social dándose de alta como traballadores por conta propia. Só no último mes, déronse de alta 16.620 autónomos, case 540 ao día. Segundo o presidente da Federación de Autónomos ATA, Lorenzo Amor, foi o mellor mes de creación de emprego por conta propia desde o inicio da crise.

    Hai que lembrar que boa parte das medidas que o Ministerio de Emprego puxo en marcha para tratar de insuflar algo de ánimo no mercado laboral van dirixidas a fomentar o autoemprego: a extensión da tarifa plana de 50 euros de cota á Seguridade Social para todos os novos autónomos, a bonificación de varios contratos para pequenas empresas e emprendedores, ou facilitar a capitalización do paro para as persoas que quixesen establecerse por conta propia. Á luz dos datos, parecen ter tido efecto.

    Algúns sectores do réxime de autónomos crecen a ritmos moi elevados. É o caso da administración pública e defensa, que aumentan nun 9,4% interanual; da educación, que crece ao 9,07%, ou das actividades científicas e técnicas, que o fan ao 7,6%.

    >> Información de Ana Requena (eldiario.es)

    En Galicia hai actualmente uns 217 mil traballadores e traballadoras autónomas © UPTA

  • "É o mellor mes de marzo desde 2004"

    "Galicia rexistrou o mellor mes de marzo desde 2004 en termos de paro rexistrado". Ese é o dato do que presume a Xunta. A directora xeral de Emprego e Formación, Ana María Díaz, valorou esta baixada do desemprego e destacou que o país sitúase "por riba da media nacional tanto en evolución mensual como interanual".

    "Galicia remata marzo con menos parados dos que había a finais de marzo de 2012", destaca a Xunta

    O Goberno galego repara tamén no feito de que este último mes de marzo fose a quinta baixada interanual consecutiva do paro, "unha tendencia que comezou en novembro de 2013". "Galicia remata marzo con menos parados dos que había a finais de marzo de 2012", insiste a Xunta, que asegura que este dato "vén a confirmar a mellora progresiva de contención da destrución de emprego que se iniciou a finais do ano pasado".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza