O TSXG reprocha á empresa que atentou "dobremente contra a dignidade dunha traballadora": por esixirlle unha dedicación que puxo en risco a súa saúde e, tras volver dunha baixa, degradala
"Atenta dobremente contra a dignidade dunha persoa traballadora que: primeiro, se lle esixa unha dedicación no desempeño que poña en risco a súa saúde; e, segundo, cumprida a mesma, e tras estar a traballadora de Incapacidade Temporal [baixa], se lle degrade na organización da empresa cando se reincorpora". Así vén de pronunciarse sobre Adolfo Domínguez SA unha sentenza do Tribunal Superior de Xustiza de Galicia (TSXG) que ratifica que a empresa de moda debe pagar unha indemnización de 60.000 euros a unha empregada "con xornadas de traballo que chegaron a superar en diversas ocasións as dez horas, e incluso as once horas".
A sentenza agora feita pública polo TSXG e asinada a mediados de setembro ratifica outra previa dun xulgado do Social de Ourense que en febreiro deste ano recoñeceu o dereito da traballadora a resolver unilateralmente o seu contrato con dereito a indemnización porque a empresa modificara substancialmente as súas condicións de traballo.
Segundo os feitos probados pola xustiza, a muller viña traballando para Adolfo Domínguez como xefa de departamento, sendo a responsable de selección e formación. A traballadora queixouse en varias ocasións e a varios cargos da empresa da "excesiva carga laboral que tiña que asumir" e acabou de baixa laboral.
A xustiza recoñece o dereito da traballadora a resolver unilateralmente o seu contrato con dereito a indemnización porque a empresa modificara substancialmente as súas condicións de traballo
A xustiza deixa constancia de que durante o mes anterior a esa baixa a muller realizou xornadas laborais de máis de 10 horas, mesmo traballando sen descanso sábados e domingos tamén con varias horas de traballo neses días.
A traballadora reincorporouse varios meses despois e atopou que "aínda que formalmente a empresa lle seguiu recoñecendo a mesma clasificación profesional, o certo é que deixou de desenvolver as funcións de xefa de departamento", deixou de ter ningunha persoa ao seu cargo e viu "degradada a súa posición na xerarquía da empresa". Pouco despois a muller acabou novamente de baixa, mesmo cun ingreso hospitalario.
Durante o proceso xudicial a empresa alegou, entre outras cuestións, que mantivera á traballadora o posto e que percibía "o mesmo salario e con idéntica xornada e horario", polo que rexeitaba que lle impuxera unha modificación substancial das condicións de traballo. Pero o TSXG di que si que houbo tal modificación das condicións de traballo, unha "mobilidade funcional descendente, que non consta teña carácter temporal nin razóns que a xustifiquen", que dan dereito á muller a resolver o contrato con dereito a indemnización.
O TSXG tamén constata o "incumprimento" pola empresa "das normas de prevención de riscos laborais froito dunha excesiva carga de traballo cos riscos psicosociais vinculados"
O tribunal salienta, como fixera previamente o xulgado do Social, que a baixa da muller estivera vinculada "coa situación de sobrecarga de traballo" dunha empregada que "tivera unha especial dedicación á empresa, con xornadas de traballo que chegaron a superar en diversas ocasións as dez horas, e incluso as once horas". Foi, di a xustiza, un "incumprimento pola empregadora das normas de prevención de riscos laborais froito dunha excesiva carga de traballo cos riscos psicosociais vinculados".
"E ademais, engadimos agora", conclúe o TSXG, "tal dedicación, excesiva e fora do marco de calquera política de prevención, foi compensada pola empresa cunha degradación na xerarquía da empresa nos termos xa referidos unha vez a parte actora se reincorporou da incapacidade temporal".
