A Xunta de Galicia pide agora máis tempo a Pemex. O presidente do Goberno galego, Alberto Núñez Feijóo, asegurou este luns en Vigo que Barreras "ten dificultades" para conseguir os avais requiridos antes do prazo fixado para o vindeiro día 18, polo que anunciou que solicitará "unhas semanas máis" para acadalos, algo do que se mostrara seguro de conseguilos tras os contactos cos directivos do estaleiro vigués.
Feijóo pedirá "unhas semanas máis", xa que o prazo para conseguir os avais remata o vindeiro día 18
As declaracións, realizadas durante o acto de entrega dun buque de Metalships&Docks en Vigo, chegan logo de que o presidente recoñecese que o flotel previsto para os estaleiros de Barreras no acordo estratéxico con Pemex podería acabar construíndose tamén en Navantia, xunto co outro prometido, se eses avais non chegaban. A noticia non foi moi ben acollida na cidade olívica. Así, o seu alcalde, Abel Caballero, xa cualificou de "escándalo político" as palabras de Feijóo e advertiulle de que "o naval de Vigo é intocable" e de que "non se lle ocorra levar ese barco". "Xa levou a caixa e non lle imos deixar que leve o naval", dixo.
Caballero advirte á Xunta de que non permitirá "que se leven a outros estaleiros de Galicia barcos que se teñen que facer en Vigo"
Así, pediulle ao presidente da Xunta que "rectifique inmediatamente" e que "apoie a busca do aval se Barreras ten problemas", logo de manifestar o seu total apoio ao estaleiro e tras ameazar de que non vai "tolerar que se leven barcos que se teñen que facer no naval de Vigo a outros estaleiros de Galicia".
Tamén desde o BNG chegaron as críticas. A portavoz municipal, Iolanda Veloso, e a deputada no Parlamento, Carme Adán, criticaron a "estratexia" da Xunta de "querer tapar os problemas de fondo de Navantia, que aínda non ten levantado o veto para a construción civil, prexudicando a industria naval de Vigo".
O BNG acusa a Feijóo de "querer tapar os problemas de Navantia prexudicando o naval de Vigo"
“Non ten sentido que Feijoo anunciara o xoves 9,5 millóns ao fondo de Pymar para facilitar os avais de Barreras e agora ameace con trasladar a construción do flotel a Navantia”, salientou Iolanda Veloso, quen lembrou que o propio conselleiro de Industria asegurou a semana pasada que os contratos de Pemex estaban a punto.
Para a portavoz municipal do BNG “non é de recibo” que o goberno galego xogue coas industrias e os seus traballadores e traballadoras, especialmente no medio dunha forte crise do sector que xa ten provocado a destrución de máis de 10.000 postos de traballo. “A realidade é que Feijoo incumpriu todas e cada unha das súas promesas, posto que non hai contratos, nin avais e moito menos barcos en construción nas gradas dos estaleiros”, denunciou a nacionalista, para quen é inadmisible que o presidente da Xunta non explique que asinou en periodo electoral.
Malia que a Xunta continúa insistindo en que os floteis de Pemex se acabarán construíndo en Galicia, cada día que pasa aparecen máis dúbidas sobre uns contratos que seguen baixo chave. Os traballos, que deberían comezar no pasado outono, seguen sen comezar, ao tempo que se agarda a que a petroleira mexicana saque a concurso dous proxectos que o Goberno galego dan por acadados para as rías galegas.
Feijóo remitiu a unha reunión que terá lugar esta semana en México, na que a Xunta trasladará a Pemex o seu "interese" porque se conceda un tempo extra a Barreras. "A Xunta estivo sempre ao lado de Barreras, se non fose así, eses barcos xa se estarían construíndo noutro sitio", insistiuu o presidente, tras deixar claro que o atraso no inicio dso traballas é debido á "dificultade" do estaleiros vigués "para cumprir coas súas obrigas".
"No peor dos casos, os dous floteis construiranse en Galicia", asume Feijóo
Ademais, recalcou que o Goberno galego tamén é "aliado" de Navantia e precisou que, a pesar de que "o primeiro obxectivo" é que se constrúa un flotel na ría de Vigo e outro na de Ferrol, "no peor dos casos", a Xunta debe traballar para que, "ocorra o que ocorra", os dous barcos "se constrúan en Galicia".
En canto á posibilidade de que os 9,5 millóns de euros que a Xunta inxectará en Pymar (Pequenos e Medianos Estaleiros Sociedade de Reconversión) poidan servir para avalar a Barreiras, Feijóo lembrou que ese diñeiro "é para favorecer a todos os estaleiros de Galicia".
O presidente da Xunta explicou que Pymar debe beneficiar, nunha "proporción razoable", a todos os estaleiros de Galicia e que non se pode "discriminar uns para favorecer aos outros". Durante o seu discurso con motivo do acto de entrega do barco offshore Deep Orient, Feijóo recoñeceu que o sector naval "sofre incertezas importantes", pero sinalou que a pericia, o esforzo, os coñecementos e a experiencia dos estaleiros galegos servirán para superar a actual situación.
O presidente da Xunta insistiu en que esta semana haberá avances" para iniciar a construción dos floteis de Pemex en Barreras e Navantia, e lembrou que non só "non hai marcha atrás", senón que se abren "novas posibilidades" de carga de traballo, coa contratación doutros 20 barcos da frota menor da petroleira mexicana, que serán construídos "entre estaleiros galegos e mexicanos".
