Despece

• Pachi Vázquez pide un pleno no Parlamento para unir Galicia en defensa do naval

  Pachi Vázquez vén de propoñer na Executiva Federal do PSOE que se transmita unha petición unánime aos gobernos central e autonómico para que "presionen" ao colexio de comisarios da UE ante a proposta de Almunia sobre o naval "que traizoa claramente a Galicia, Euskadi, Asturias e España". Así, reclama un pleno extraordinario autonómico antes do día 17 para "lembrar a España e á UE que Galicia está unida na defensa dun sector clave".

  Vázquez pide un pleno extraordinario para "lembrar a España e á UE que Galicia está unida na defensa do naval"

  A proposta conxunta dos socialistas galegos, vascos e asturianos, aprobada pola executiva do PSOE, insta a lograr a unidade fronte ao informe presentado polo comisario da Competencia que obrigaría a pagar as axudas do tax lease. Vázquez reclamou a Feijóo un pleno extraordinario no Parlamento de Galicia antes do día 17 para "falar do sector naval, darlle voz a un sector clave estratéxico para Galicia e lembrarlle a España e á UE que Galicia está unida na defensa dun sector estratéxico para a economía".

  Ademais, instou ao PP a aceptar este pleno polo que os deputados non cobrarían, segundo dixo o líder dos socialistas galegos, para "defender a un sector crave e dicirlle á UE que non se pode construír Europa destruíndo Galicia e España". Vázquez advertiu de que "hai tempo" para lograr unha resposta que permite a subsistencia do sector naval galego e dixo que "os informes xurídicos combátense con informes xurídicos", e reclamou unha resolución "como a de Francia". Así, instou a transmitir aos comisarios comunitarios que "teñan información e saiban que retirarlle 3.000 millóns de euros a un sector xa agonizante supón que o naval non ten ningunha posibilidade".

  O líder do PSdeG reclama a Feijóo que "deixe de mentir"

  Pachi Vázquez aclarou tamén que, "da mesma maneira" que lle pide a Almunia "que dimita" antes de presentar o informe, reclámalle ao presidente da Xunta de Galicia, Alberto Núñez Feijóo, que "deixe de mentir sobre Pemex, sobre o dique flotante e sobre a carga de traballo dos estaleiros".

  

• A Xunta ameaza con accións "xurídicas" contra Almunia

  A Xunta ameaza con tomar medidas xurídicas contra Almunia. O director xeral de Relacións Exteriores e coa UE, Jesús Gamallo, insistiu en que o comisario europeo da Competencia, Joaquín Almunia, debe "reconducir a súa proposta" sobre a devolución de axudas do tax lease e aclarou que, de non haber rectificación, o Goberno autonómico "resérvase" a posibilidade de emprender accións desde o punto de vista "xurídico" e "político".

  Gamallo fixo estas declaracións á Radio Galega, onde asegurou que hai a posibilidade de acudir ao Tribunal de Xustiza da Unión Europea (UE), aínda que, preguntado por se a Xunta estaría disposta a levar ante o mesmo ao comisario Almunia, matizou que hai que esperar a que se pronuncie o colexio de comisarios e "analizar a situación".

  "Non podo contestar de forma clara, non coñecemos aínda a decisión do colexio de comisarios nin a fundamentación da proposta; cando coñezamos estas medidas tomaremos as decisións que consideremos oportunas. Hai un ámbito xurídico e un ámbito político que analizar. Avaliaremos os dous", insistiu Gamallo, que acusou a Almunia de "manter actitudes quijotescas" por aludir ao dereito europeo para confirmar a sanción, mentres "desmantela un sector" e "aumenta o índice de desemprego".

  O conselleiro de Economía, Francisco Conde, advertiu tamén de que a Xunta "tomará todas as medidas precisas" se a Comisión Europea obriga finalmente á devolución das bonificacións fiscais do tax lease.

• Almunia insiste en que "non perdoará" ao naval a devolución do 'tax lease'

  Almunia insiste. O comisario da Competencia da UE asegurou este luns que non se pode "perdoar" a España a devolución das axudas públicas concedidas ao abeiro do tax lease, porque iso suporía violar a lexislación comunitaria, aínda que volveu aclarar que non serán os estaleiros os que terán que reintegrar esas subvencións, senón os investidores eos armadores.

      Almunia nega diferenza de trato con Francia por parte das autoridades comunitarias

  Ademais, Almunia quixo saír ao paso das queixas dos estaleiros, que alertan que os contratos con investidores e armadores trasládanlle a responsabilidade a eles, para asegurar que estes acordos "non existen xuridicamente" porque vulneran tamén as normas da UE. "Xuridicamente, non se pode perdoar" a devolución das axudas, dixo o responsable de Competencia, que negou calquera diferenza de trato entre Francia e España. "Desde a aprobación do sistema español en 2002 até metade do 2005 non pedimos a devolución de axuda porque tampouco se lle pediu a Francia por ese período", explicou. "Estamos a dar exactamente o trato que recibiu Francia", insistiu.

  O comisario de Competencia volveu destacar tamén que na súa proposta para a decisión definitiva do 17 de xullo precísase "taxativamente que quen teñen a obrigación de devolver as axudas son os grupos de interese económico e os investidores que participaron nestes grupos de interese económico, que non son estaleiros, e quen compraron os buques aos estaleiros".

      O comisario asegura que os contratos que obrigan aos estaleiros a asumir o reintegro "non existen"

  "A min sorpréndeme ás veces escoitar a algúns representantes do sector que din: 'Non, non, pero nós somos responsables'. E eu insisto: Non son vostedes responsables de devolver. Nin un só estaleiro ten que devolver un só euro", sostivo Almunia. Preguntado de novo polas cláusulas contractuais que obrigarían aos estaleiros a asumir o reembolso, o vicepresidente da Comisión insistiu en que "cando os contratos van en contra das obrigacións xurídicas que derivan do marco europeo, eses contratos non existen xuridicamente".

  Ademais, non deu moitas esperanzas malia a petición do presidente do Goberno, Mariano Rajoy, de realizar un último esforzo sobre o problema dos estaleiros. Así, Almunia advertiu de que "non é unha cuestión de esforzo", senón que "a obrigación da Comisión, para iso está a Comisión: respectar e facer respectar o marco legal que rexe o control das axudas de Estado".

  "Nós existimos e estamos aquí para facer valer o interese xeral europeo, non dependemos de ningún país, non podemos recibir instrucións de ningún país", engadiu ante as críticas que chegan desde o seu propio partido, o PSdeG, que o acusa de provocar a morte do sector. "Fariamos un mal servizo á UE se pensamos máis nos intereses dun país, sexa o noso ou sexa outro, que nos intereses do conxunto e, desde logo, non seriamos comisarios nin un día máis se non respectamos nosas propias normas xurídicas", insistiu o vicepresidente do Executivo comunitario.