O 80% das traballadoras de Bosch en Vigo secundan a folga convocada contra o ERE que afecta a 600 persoas

Concentración ante a sede da empresa © Bosch

A folga de 24 horas convocada polo comité de empresa de Bosch para rexeitar o ERTE que a empresa aplica en Vigo está a ter un seguimento maioritario entre o cadro de persoal. Ao redor do 80% das traballadoras e traballadores da compañía secundou este mércores a mobilización, que incluíu unha concentración ante as sedes da empresa.

Protestan contra a aplicación do ERE temporal que afecta a case 600 traballadoras dende o pasado mes de febreiro

Protestan principalmente contra a aplicación do ERE temporal que afecta a case 600 traballadoras dende o pasado mes de febreiro. Dende a CIG denúnciase que o ERTE se deseñou "a cegas" e cunha previsión "de máximos" e subliñan que a carga de traballo procedente de Vodafone segue a ser moi elevada.

As causas do ERTE están nos problemas que arrastra Vodafone España dende hai meses. Bosch-Vigo encárgase das funcións de soporte técnico, provisión administrativa e reclamacións da compañía de telecomunicacións e argumenta que a caída na carga de traballo procedente de Vodafone fai necesaria a regulación de emprego. Ademais do ERTE, Bosch decidiu prescindir doutras 200 traballadoras que estaban contratadas a través de empresas de traballo temporal (ETT).

Bosch é a segunda empresa con máis traballadores en Vigo

A presidenta do comité de empresa, Laura Pérez Figueroa, da CIG, expresou a satisfacción da representación sindical polo elevado seguimento que rexistra a folga. Nas concentracións convocadas na Avenida de Madrid e da rúa María Berdiales os berros máis escoitados foron “Non é un ERTE, é unha estafa”, “Despidos para os directivos” e “Este ERTE ímolo parar”.

Protesta ante a sede de Bosch en Vigo © CIG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.