O sector da conserva chegou este xoves a un entendemento coa patronal sobre a redacción do seu novo convenio colectivo. O preacordo asinado en Madrid por CIG e UGT, do que se desmarcou CCOO, pode supor o remate dun conflito que levaba varias semanas aberto e que se intensificara nos últimos días, coa convocatoria de tres novas xornadas de folga e a ameaza do empresariado de levar a cabo un peche patronal. Chega, ademais, ás portas da manifestación convocada para este sábado en Boiro, que se esperaba masiva e que agora só apoia CCOO.
Para Rosa Abuín (CIG) trátase "do mellor convenio que se asinou neste sector" pois "practicamente todo o que estabamos pedindo está conseguido"
O preacordo deberá ser ratificado agora polas distintas asembleas comarcais de cada un dos sindicatos, un requisito imprescindible para a súa sinatura final, antes de 30 días. O resultado destas asembleas podería variar o posicionamento final das centrais sindicais, tanto o apoio inicial expresado por CIG e UGT coma o rexeitamento de CCOO.
Para Rosa Abuín, responsable da FGAMT-CIG da comarca do Salnés, trátase "do mellor convenio que se asinou neste sector" e engade que "practicamente todo o que estabamos pedindo está conseguido". Abuín di non entender o rexeitamento de CC.OO. ao preacordo, sinalando que "non hai exemplos de convenios no sector nos últimos anos que recoñezan o que se conseguiu neste: a garantía de que non se perde poder adquisitivo e o avance para eliminar a fenda salarial". "Eles son os que teñen que dar explicacións de por que non se suman a este preacordo", engade.
O incremento dos salarios ao nivel -cando menos- da suba do IPC real e a supresión das diferenzas dos soldos cobrados por homes e mulleres foron as claves sobre as que xiraron as negociacións do novo convenio colectivo nos últimos meses, xunto coas características na quenda de fin de semana e festivos, de nova creación. O sector incrementou a súa mobilización nas últimas semanas, con tres xornadas de folga que rexistraron unha participación masiva. "Este é un sector reivindicativo, que xa o demostrou noutras mobilizacións anteriores que tiveron lugar en moitas empresas", destacaba hai uns días Rosa Abuín en conversa con Praza.gal.
"Este convenio non o conseguiron os sindicatos, senón as traballadoras que pelexaron durante semanas por el. Sen as folgas e manifestacións convocadas non se tería acadado", salienta Abuín
Nesa entrevista a sindicalista da CIG denunciaba a actitude mantida polos empresarios, tanto pola ameaza dun peche patronal durante as xornadas de folga convocadas, "vulnerando un dereito fundamental, como é o dereito á folga", como por outro tipo de presións ás traballadoras, indicando que "houbo ameazas ás traballadoras e traballadores eventuais e de ETT, dicíndolles que se ían á folga non lles renovarían o contrato, mesmo con ameazas de despedimento". Porén, Abuín subliñaba que "esta actitude lles saíu mal, porque a folga foi secundada por máis do 90% das traballadoras e traballadores do sector". "Polo tanto, parece que cada vez que o empresariado abre a boca máis enfada ao propio sector", engadía.
A suba de soldos, segundo o preacordo, será dun 6,5% en 2021 e en 2022 a suba inicial será do 1%, mais a final de ano aplicarase a cláusula de revisión salarial en base ao IPC real, ademais do cobro dos atrasos pendentes
A CIG salienta que o preacordo, acadado despois de máis de cinco horas de negociacións, recolle dúas das súas principais reivindicacións: que a actualización dos soldos se faga en base ao IPC real e que se estableza un incremento adicional do 0,3% en cada un dos catro anos de duración do convenio (2021-24) para as categorías laborais ocupadas maioritariamente por mulleres, contribuíndo así a reducir a fenda salarial de xénero actualmente existente nun sector maioritariamente feminino, no que as mulleres representan o 80% do persoal.
A suba de soldos, segundo o preacordo, será dun 6,5% en 2021 e en 2022 a suba inicial será do 1%, mais a final de ano aplicarase a cláusula de revisión salarial en base ao IPC real, ademais do cobro dos atrasos salariais pendentes; finalmente, para 2023 e 2024 fíxase un incremento salarial inicial do 1,5% en cada un dos dous anos, aplicándose tamén a cláusula de revisión e o cobro de atrasos. Así pois, engade a CIG, "queda garantido o poder adquisitivo das persoas traballadoras do sector sen fórmulas descafeinadas que deixan os salarios por debaixo do IPC”.
Pola contra, CC.OO. afirma que "no fondo en nada difire da última proposta da patronal do pasado 2 de febreiro e que os tres sindicatos rexeitamos”
Pola contra, CCOO denuncia que o preacordo non inclúe dúas das “liñas vermellas” expresadas polas e polos manifestantes nas xornadas de folga convocadas nas últimas semanas e que o seu contido “no fondo en nada difire da última proposta da patronal do pasado 2 de febreiro e que os tres sindicatos rexeitamos”. Por unha banda, o sindicato critica que non se inclúe a equiparación inmediata nos soldos entre os grupos 5 (maioritariamente feminino) e 6 (maioritariamente masculino), cunha diferenza salarial que chega aos 600 euros anuais en beneficio deste último.
A CIG salienta que o incremento do 0,3% adicional para o grupo 5 serve para avanzar no remate desta fenda salarial. Así mesmo, o 40% do cadro de persoal de fixos-descontinuos terán que pasar a ser oficiais de primeira ou segunta, o que contribuirá igualmente á eliminación progresiva desta fenda. Ao mesmo tempo, crearase unha comisión técnica para traballar na eliminación da fenda salarial durante a duración do convenio.
CC.OO. critica que non haxa unha equiparación inmediata entre os grupos 5 (maioritariamente feminino) e 6 (maioritariamente masculino), aínda que o acordo si prevé un aumento salarial maior para o grupo 5, actualmente con soldos máis baixos
Ademais, Comisións denuncia que o preacordo inclúe “o traballo en fin de semana e festivos de forma obrigatoria para as novas contratacións e xa veremos se na práctica para o resto tamén”. En cambio, a CIG nega que a quenda de fin de semana vaia ser obrigatoria para o actual cadro de persoal e valora que a nova quenda se cubrirá “con contratacións indefinidas e exclusivas a cargo da empresa (non a través de ETT), garantido o salario que corresponda por táboas e por categoría”.
Ademais, indica o sindicato nacionalista, as persoas que traballen nesta quenda ingresarán un plus de 35 euros por cada sábado e de 65 euros por cada domingo e festivo e terán preferencia á hora de cubrir as vacantes de tempo indefinido e con xornada de luns a venres que haxa nas empresas que poñan en marcha esta cuarta quenda.
A outra diverxencia está na nova quenda de fin de semana e festivos, que se cubrirá con contratacións indefinidas
Para CC.OO., a súa negativa a asinar o preacordo supón “cumprir co mandato” expresado polas traballadoras nas mobilizacións e critica que CIG e UGT “desoíron” ese mandato. En calquera caso, Comisións celebra que “as melloras salariais e laborais que ten este preacordo son unica e exclusivamente mérito das valentes e os valentes que secundaron os tres días de folga”. “A CCOO quédanos o orgullo de ter traballado e conseguido tecer esa conciencia de clase que te permite loitar colectivamente por lo que te pertence e é xusto”, engade.
Pola súa banda, Rosa Abuín destaca o valor das mobilizacións realizadas nas últimas semanas e salienta que "este convenio non o conseguiu nin a CIG, nin Comisións nin UGT, senón que este convenio o conseguiron as traballadoras que pelexaron durante semanas por isto". "De non haber as mobilizacións e as folgas que o sector levou a cabo, este convenio non se tería conseguido", conclúe.
