O naval da ría de Vigo non se rende e volve saír á rúa para reclamar á Unión Europea que dea marcha atrás na súa intención de obrigar á devolución das axudas fiscais do tax lease, o que suporía a morte deste sector estratéxico en Galicia. Traballadores dos diferentes estaleiros da comarca percorreron esta mañá as rúas da cidade.
Divididos en varios grupos, as columnas de Metalships e Vulcano saíron de Teis para unirse despois no centro de Vigo aos operarios chegados de Bouzas. Todos eles reclaman a definitiva marcha atrás das intencións do comisario da Competencia, Joaquín Almunia, que este mesmo mércores deu esperanzas ao sector ao asegurar que aínda hai "marxe" para reconsiderar a súa proposta ao colexio de comisarios, que suporía que o naval español tivese que devolver uns 2.800 millóns, dos que lle corresponderían uns 1.700 a Galicia.
Ademais das mobilizacións en Vigo, tamén hai convocada unha marcha a pé de vinte quilómetros por parte de traballadores de Navantia, estaleiros privados, e que tamén reclaman carga de traballo para as súas instalacións. Operarios de estaleiros privados de Euskadi, Cantabria ou Asturias tamén protestan nesta xornada.
A camiñada dos traballadores de Navantia saíu ás 11.30 da fábrica e irá percorrendo a ría de Ferrol mentres recolle os operarios de Fene para continuar por Neda e regresar de novo á cidade. Son uns 3.000 operarios os que participan nunha peregrinación reivindicativa que reclama ao Goberno que "exixa en Bruxelas" solucións, tanto para a construción do dique flotante en Ferrolterra, como para o tax lease.
O comité de empresa de Navantia segue lembrando que a carga de traballo finaliza despois do verán os estaleiros e advirte que nada saben os traballadores do prometido flotel da compañía mexicana Pemex, que fora unha promesa electoral de Feijóo nas últimas eleccións autonómicas.
HABERÁ AMPLIACIÓN