O orzamento da Xunta medra un 0,5% e impulsa obras atrasadas para o ano electoral

Rueda, Feijóo e Muñoz, na reunión do Consello da Xunta © Conchi Paz

O orzamento da Xunta increméntase en 45 millóns con respecto ás contas do actual exercicio. Así, o presuposto da Administración autonómica para o 2015 sitúase nos 8.436 millóns de euros, tan só un 0,5% máis, tal e como comunicou este venres o presidente da Xunta, Alberto Núñez Feijóo. É "a primeira vez" que o gasto da autonomía medra, aínda que sexa un pouco, desde 2009, malia que o xefe do Executivo insiste no "camiño da solvencia" e en cumprir co déficit.

O orzamento da Xunta increméntase en 45 millóns, un 0,5% máis con respecto ao de 2014

Segundo a explicación do presidente e da conselleira de Facenda, o orzamento permite que a comunidade rexistre un crecemento do 2% o vindeiro ano, fronte ao 0,9% co que se prevé pechar este ano. Ademais, a Xunta cre que estas contas permitirán situar a taxa de desemprego no 20,1%.

"Galicia diríxese cara á recuperación económica", dixo Feijóo, que asegura que o país o fai "coa certeza de que non se repetirán os comportamentos que nos levaron á crise".

O Goberno impulsa infraestruturas claves que levaban paradas tempo en pleno ano electoral

O proxecto orzamentario foi aprobado e presentado este venres polo Goberno galego. Son unhas contas para un ano electoral e iso nótase no pulo que a Xunta lle dá a infraestruturas claves que levaban paradas tempo, como ocorre coa plataforma loxística de Salvaterra do Miño ou da autovía da Costa da Morte, que acumula anos de atraso. A posibilidade deste pequeno incremento nos investimentos da Administración atribúeo Feijóo ao aforro duns 15 millóns de euros no pagamento da débeda pública.

A conselleira de Facenda, Elena Muñoz, explicou un escenario orzamentario no que os ingresos correntes crecen un 4%, polo incremento dos ingresos que chegan do sistema de financiamento, que supón case o 80% do total. Así, destacou os 121 millóns dispoñibles "a maiores" polo aprazamento a vinte anos da devolución das liquidacións negativas.

Os orzamentos recollen unha suba dos ingresos de capital do 6,3% que, segundo a Xunta, débense a que a comunidade autónoma empeza a incluír nos orzamentos o "impacto" dos fondos europeos do marco 2014-2020 e que "xa se empezarán a implementar nos presupostos do vindeiro ano". En canto aos gastos, o orzamento inicia "unha senda crecente", cun aumento de case 45 millóns, polo que os investimenos reais soben 32,2 millóns, un 4,8%.

Feijóo e Muñoz quixeron destacar tamén a consolidación fiscal, polo que presumiron de "seguir na senda da redución do déficit", un "esforzo" que cifraron en 160 millóns de euros para lograr que a comunidade autónoma non pase do límite do 1% de 2014 ao 0,7% marcado para 2015.

A Administración crea o canon mineiro que prometera xa en 2013 e 2014

Ademais, a Xunta presume tamén de manter o esforzo no gasto social, xa que educación, benestar e sanidade absorberá oito de cada dez euros do orzamento. Non é tanto así, polo menos se temos en conta as alusións que Feijóo fixera ao gasto social noutras ocasións. Hai menos dun mes, o presidente do Goberno galego teimaba en que o seu orzamento era o máis social da historia.

Cada ano, a Secretaría de Estado de Administracións Públicas recompila os datos dos orzamentos autonómicos para poder presentar e analizar de xeito homoxéneo os de todas as autonomías. Unha ollada a esa análise permite concluír que a afirmación presidencial non se corresponde coa realidade. Tendo en conta as cantidades que, segundo Facenda, a Xunta destinou cada ano a política social e restando das mesmas o orzamento cultural -o Goberno central adoita contabilizalo neste apartado- o resultado é que, tomando como referencia a última década, o ano con maior porcentaxe para partidas sociais foi o 2011, no que se acadou un 70,24%. Segundo o Ministerio neste 2014 o dato quedou no 60,59%, cunha redución de cinco puntos a respecto do ano 2013.

Á marxe disto, o Goberno destacou tamén a creación do canon da minería, que grava o almacenamento de materiais en superficie cun tipo de entre 1 e o 1,5% segundo os ingresos totais de cada explotación, aínda que quedarán exentas as firmas que extraen lousa e granito. Este canon fora anunciado e prometido por Feijóo nos debates do Estado da Autonomía de 2013 e 2014, pero non se aplicará ata o vindeiro exercicio. Ademais, a Xunta tamén eximirá os transportistas do pago do céntimo sanitario.

Rueda, Feijóo e Muñoz, na reunión do Consello da Xunta © Conchi Paz

Despece

  • O BNG critica unhas contas que "non serven aos sectores produtivos nin xeran emprego"

    Á espera de coñecer as cifras en detalle dos orzamentos de 2015, o BNG considera que as explicacións achegadas polo Goberno tras a súa aprobación no Consello da Xunta evidencian que, de novo, "se deixa pasar a oportunidade de orientar as contas públicas cara a reactivación da economía e para preservar os servizos públicos e a atención social ás persoas máis afectadas pola crise".

    “Hai que reorientar o investimento público para activar a economía e crear emprego e apostar por manter a calidade dos servizos públicos"

    “Hai que reorientar o investimento público para activar a economía e crear emprego e apostar por manter a calidade dos servizos públicos. Os orzamentos non van nesa dirección”, explicou o portavoz nacional, Xavier Vence, de visita institucional no Concello de Carballo. “Este país necesita unha aposta pola dinamización do emprego no tecido industrial e no tecido agrario, e non só pensando na realización de obras de infraestruturas de cemento e asfalto, que é polo que aposta a Xunta nestes orzamentos”, criticou.

    “É necesario usar as contas públicas para xerar actividade económica de futuro no sector industrial e primario, que cree emprego de futuro e non só rendas para as empresas construtoras durante un período de tempo”, insistiu Vence.

    Neste sentido, o portavoz nacional subliñou que a aposta orzamentaria que precisa Galiza “vai nunha dirección bastante diferente á que presenta a Xunta”. “Fai falla unha aposta inequívoca polo emprego, unha aposta inequívoca pola actividade produtiva industrial e primaria, unha aposta inequívoca pola calidade dos servizos públicos tanto na educación, como na sanidade como nos servizos sociais”, enumerou Vence.

  • Besteiro critica a Xunta por "persistir nunha austeridade fracasada"

    O secretario xeral do PSdeG-PSOE, José Ramón Gómez Besteiro, advertiu que os orzamentos da Xunta para o ano 2015 “non van solucionar os problemas dos galegos e das galegas” ao persistir na liña de “austeridade fracasada” encetada polo goberno de Feijóo.

    Besteiro cre demasiado optimista o crecemento previsto do 2% do PIB

    En resposta ás preguntas dos xornalistas, o líder dos socialistas galegos estimou excesivamente optimista o crecemento previsto do 2% do PIB, unha previsión “fóra de contexto” logo de confirmar un erro do 25% nas previsións para este ano 2014.

    Gómez Besteiro dixo que o medre do teito de gasto tan só nun 0,5% confirma que o goberno galego continúa nunha liña equivocada de austeridade que “cada vez menos persoeiros defenden”. Advertiu que os orzamentos da Xunta “non van afectar á vida das persoas nin a cambiar as necesidades de moitos cidadáns e cidadás de Galicia”.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza