O paro baixa en Galicia en máis de 3.500 persoas en agosto

En defensa do emprego CC-BY Susete

O paro baixou en 3.578 persoas, un 1,37%, en Galicia durante o mes de agosto e con respecto ao mes anterior, polo que o número de desempregados queda en 257.524, segundo os datos do Ministerio de Emprego. É a terceira comunidade autónoma cun maior descenso, tras os de Andalucía e Canarias.

Galicia perdeu case 30.000 afiliados á Seguridade Social no último ano e ten 257 parados máis que en agosto de 2012

En canto ao mesmo período do ano anterior, Galicia conta con 257 parados máis que no mes de agosto de 2012. O número de afiliados á Seguridade Social en Galicia aumentou en case 4.000 persoas no pasado agosto, un 0,43%. No entanto, con respecto ao mesmo mes de 2012, o descenso é case do 3% é supón a perda de 28.562 cidadáns afiliados nos últimos doce  meses.

Por provincias, A Coruña conta con 102.635 parados logo de que o número de desempregados descendese en 1.255 no último mes (-1,21%) e 252 con respecto a agosto de 2012. En Lugo o paro baixou en 726 persoas (-2,79%) quedando en 25.278; en Ourense o descenso foi de 469 (-1,65%) e hai 25.278 demandantes, mentres que en Pontevedra hai 101.641 parados, 1.128 menos que en xullo (-1,10%).

O descenso do número de demandantes de emprego débese, tal e como recoñece o INE, exclusivamente á temporada de verán. Tamén en Galicia. Así, dos máis de 64.000 contratos asinados no país, tan só 3.681 (o 5,89%) son indefinidos, fronte aos máis de 60.000 temporais. En España, do total de 1,04 millóns de contratos firmados, tan só 62.454 foron fixos.

 

Tan só 31 demandantes de emprego menos

No conxunto do Estado, o paro rexistrado baixou en agosto por sexto mes consecutivo, aínda que o descenso equivale tan só a 31 desempregados menos que en xullo. É o mellor dato neste mes de verán desde 2000, a última vez que baixou o número de parados en agosto, un mes normalmente negativo ao finalizar os contratos de verán. Pero daquela descendera en máis de 4.000 persoas, mentres que agora a cifra non supera os dous díxitos. Ademais, a afiliación cae en case 100.000 persoas, ao descender en 99.069 cidadáns.

O mellor dato do paro en agosto desde 2000 supón 31 desempregados menos no conxunto do Estado

Xa que logo, o número de desempregados queda en 4.698.783 persoas, segundo os datos feitos públicos polo Ministerio de Emprego e Seguridade Social. En termos acumulados, nos primeiros oito meses de 2013, o paro descendeu en 149.940 persoas, o mellor dato rexistrado neste período desde 1999.

No entanto, en termos desestacionalizados, o paro sitúase en 4.870.215 desempregados, 13.700 parados menos que o valor desestacionalizado do desemprego en xullo.

HABERÁ AMPLIACIÓN

 

Oficina de emprego Dominio Público Praza Pública

Despece

  • A patronal galega ve "tremendamente positivas" as cifras do paro

    "Tremendamente positivas". Así cualifica a patronal galega as cifras do paro feitas públicas este martes polo Ministerio de Emprego. O presidente da Confederación de Empresarios de Galicia (CEG), José Manuel Fernández Alvariño cre que "os seis meses de descensos" do desemprego evidencia que a reforma laboral "está funcionando", aínda que "non na medida na que todos desexamos".

    Así o asegurou Alvariño antes da súa xuntanza co presidente da Xunta, Alberto Núñez Feijóo, ao que lle trasladará a necesidade de "financiamento" para que os empresarios cumpran co seu desexo de "contratar". "Debe fluír o crédito, pero xa non hai un concepto de estacionalidade, polo que debemos ser optimistas con certa precaución", di.

    A Xunta, pola súa banda, que o de Galicia "é o mellor dato" en agosto desde 1996. A directora xeral de Emprego e Formación, Ana María Díaz, a través dun comunicado, cualificou como "positivo" o dato, "en tanto hai unha importante baixada dentro da serie histórica e Galicia sitúase por riba da media estatal".

  • Os sindicatos destacan o descenso "conxuntural" do desemprego e a precariedade

    Os sindicatos reciben con moita cautela os datos do paro en Galicia. Así, UGT destaca que o número de beneficiarios con prestacións en Galicia é de 149.524, o que supón a cifra "máis baixa do que levamos de ano", polo que pon o foco en "todos aqueles desempregados sen ningún tipo de cobertura e que se atopan en fortísimo risco de exclusión social".

    O número de beneficiarios de prestacións en Galicia é o máis baixo no que vai de ano

    Ademais, a contía media da prestación contributiva de desemprego é unha das máis baixas do Estado, 786,2 euros ao mes, "unha cifra que está en continuo retroceso, un síntoma máis da precariedade do mercado laboral en Galicia e da situación das fortes dificultades polas que están a pasar as persoas afectadas polo desemprego".

    "Aínda que os datos parecen dar un moi pequeno respiro, a obcecación en propoñer reformas só trae máis recesión, máis destrución de emprego, máis desigualdade e tensión social", lemra UGT, que insiste en que "se muden as prioridades, deixando de situar o déficit como obxectivo principal e emprazar neste escalón o desemprego e a loita pola consolidación fiscal". "As políticas fiscais teñen que cambiar de rumbo", di o sindicato, que incide no "fracaso" da reforma laboral.

    Por outra banda, desde a CIG destaca a "situación conxuntural" deste descenso do paro provocado pola campaña do verán, algo que demostraría o feito de que só o 5,7% dos contratos asinados fosen indefinidos durante o mes de agosto. "As preocupantes cifras de desemprego que se rexistran no noso país serían aínda moito máis elevadas no caso de que se contabilizasen os milleiros e milleiros de mozos e mozas que abandonan Galiza cada ano en busca dun futuro laboral na emigración", destaca a central nacionalista, que sostén que o feito de que a evolución das cifras do paro sexa semellante á de anos anteriores "evidencia que as últimas reformas laborais non están a mudar o comportamento do mercado de traballo".

    Ademais, Comisións Obreiras (CCOO) considera "positivo" o descenso do paro pero alerta de que case un terzo do descenso corresponde ás persoas inscritas no colectivo sen emprego anterior. Tamén chama a atención sobre as causas estacionais da redución do paro, xa que o 94,3 % dos contratos asinados no último mes son temporais.

    En opinión da secretaria de Emprego de CCOO de Galicia, Maica Bouza, haberá que agardar ao final do ano para comprobar a situación do emprego no noso país. Dos datos de hoxe tira dúas conclusións: por un lado, que a redución do desemprego non significa que se cree emprego, tal e como reflicte a "desproporción" entre a baixada da afiliación (redúcese en máis de 28.500 persoas) e o estancamento do desemprego no último ano.

    Por último, a secretaria de Emprego de CCOO chama a atención sobre os efectos da persistencia da crise e do aumento do paro de longa duración: máis de cen mil persoas carecen xa de protección por desemprego.

  • O PP presume de datos e a oposición repara na elevada emigración

    O PP considerou este martes que a redución do desemprego dada a coñecer este martes "infunde confianza", mentres que a oposición, que tamén ve "positivas" estas cifras, relacionounas coa emigración e co feito de que moita xente decide non apuntarse nas listas do paro.

    Pedro Puy, voceiro do PPdeG, destacou que o dato é "moito mellor" en Galicia, onde baixou en 3.578 persoas, que na media estatal, onde hai 31 desempregados menos. En todo caso, apelou á "prudencia" porque se debe "continuar traballando" nas "reformas" que o país necesita para, unha vez superada a crise derivada da débeda pública, a economía española poida competir en "un mundo cada vez máis globalizado".

    Pola súa banda, Abel Losada mostrou a súa "preocupación" pola caída da afiliación á Seguridade Social á vez que se reduce o desemprego e explicou que reflicte "unha forte emigración" ou un aumento no número de "desanimados".  Son aqueles que "abandonan os rexistros públicos" e que, de prolongarse a súa situación, padecen un maior risco de "pobreza ou exclusión social", de modo que o socialista advertiu da "gravidade" deste extremo.

    Para o coportavoz de AGE, Xosé Manuel Beiras, tras a caída do desemprego en Galicia están "os 500.000 mozos que emigraron" e que, polo tanto, "deixan de estar nas listas". "É unha chirigota, isto é de broma", censurou a quen cualificou como "artistas do paro".

     "É como un médico que a un paciente cunha infección grave o único que fai é tomarlle a temperatura cada día* xa sabemos que os ritmos son diferentes", ilustrou, e comparou esta actuación coa actitude do Goberno fronte á destrución do emprego.

    A continuación, xulgou que "dá noxo" que o Executivo "xogue así coa xente" mesmo por "unha cuestión de estética". "Xa non de ética", apostilou, antes de considerar "irrecuperable" o sistema e as institucións. A "única" saída sería, desde o seu punto de vista, "recuperar a credibilidade por parte da cidadanía activa". "Pero para iso hai que xogarse o tipo, hai que levar hostias, hai que ter cicatrices despois das feridas e pór o peito", sinalou.

    Pola contra, todo acabará "nun fracaso total" ou nunha especie de "réxime esclavista disfrazado", unha especie de "capitalismo feudal" no que os cidadáns son convertidos "en escravos". "Nin sequera en súbditos", advertiu.

    Finalmente, o portavoz do BNG, Francisco Jorquera, apelou á "cautela" para analizar un dato "positivo" como é que máis de 3.000 galegos xa non figuren nas listas do paro, posto que son "máis de 30.000 os empregos destruídos no último ano".

    Ademais, chamou a atención sobre a baixada no número de afiliados á Seguridade Social e no número de contratos. Así, do mesmo xeito que Losada, o nacionalista interpretou que ou ben "a xente xa non se rexistra" ou que se está acelerando a emigración".

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza