O paro volve subir en Galicia mentres segue a destrución de postos de traballo

A conselleira de Traballo saúda un participante nun obradoiro de formación © Xunta

O paro volve subir en Galicia e a afiliación á Seguridade Social segue baixando. O mercado laboral galego continúa sen recuperación ningunha e mentres o número de desempregados rexistrados nas oficinas continúa aumentando, o número de cotizantes diminúe.

O paro aumentou en 5.841 persoas en xeral e en 5.388 no sector servizos

Así, o paro rexistrado en Galicia no pasado mes de agosto aumentou en Galicia en 5.841 persoas, o que supón un incremento do 2,45% con respecto ao mes anterior. Unha suba provocada pola fin definitiva do bo tempo e do verán, algo facilmente deducible de reparar no desemprego por sectores, xa que nos servizos aumentou en 5.388 persoas no mes pasado. Tamén subiu en máis de 1.000 persoas na agricultura e en 170 na industria, mentres que descendeu na construción (-190) e no colectivo sen emprego anterior (-612).

Por provincias, o número de parados aumenta en todas elas. En Pontevedra aumenta en 2.847 persoas (+2,6%); na Coruña en 1.507 (+1,6%); en Ourense en 941 (+3,72%); e en Lugo en 906 (+3,47%).

O número de parados rexistrados nas oficinas de emprego en Galicia sitúase, xa que logo, nas 244.044 persoas, 24.181 menos que hai un ano, o que supón un descenso do 9%. En canto aos datos do conxunto do Estado, a cifra de parados creceu en 79.154 persoas no pasado mes (+1,74%), superando así a cifra global os 4,5 millóns de persoas, segundo os datos publicados este martes polo Ministerio de Emprego e Seguridade Social.

A cifra de desempregados supera os 4,5 millóns e volve superar a que Rajoy atopou ao chegar ao Goberno central

A cifra volve superar a que Rajoy atopou ao chegar ao Goberno central. Foi no pasado mes de xullo cando por primeira vez o paro rexistrado melloraba os números que deixara o Executivo de Zapatero, pero o final do verán volve situar as cousas como estaban antes. Ou peor. Aínda así, o paro rexistrado no Estado descendeu en 284.579 persoas no último ano, o que non quere dicir que todas esas persoas atopasen emprego, xa que o paro rexistrado tan só mide aquelas apuntadas ás oficinas.

Pola contra, a Seguridade Social gaña afiliados no Estado, o que significa que o emprego creceu ao aumentarse en 28.817 o número de ocupados no mes pasado. O dato, positivo para España, contrasta coa situación en Galicia, que aumenta o número de parados e perde ocupados en outubro. Concretamente, o país perde unha media de case 4.000 afiliados (-3.909) con respecto ao mes anterior, aínda que gaña máis de 11.000 no último ano, un mínimo incremento do 1,24% que non dá nin para chamarlle recuperación. O número de cotizantes queda así en 932.760, case 80.000 menos que hai catro anos.

A taxa de cobertura volve descender en Galicia, ao pasar do 53% ao 52%

Pero os malos datos non quedan aí. A taxa de cobertura en Galicia descende tamén nun punto, do 53% ao 52%, polo que son xa 116.000 os desempregados galegos que non cobran ningún tipo de prestación. Esta taxa do sistema de protección segue a ser moi inferior á do conxunto do Estado, onde tamén descendeu do 60,7% ao 57%.

Ademais, en Galicia xa hai máis de 150.000 desempregados que levan máis dun ano sen traballo e 105.200 que superan os dous anos en paro. En canto aos contratos, asináronse 78.171 en Galicia, dos que tan só 6.583 foron indefinidos, o que incide na temporalidade, que se une á maior precariedade das condicións laborais dos cidadáns galegos.

Paro no 22,2% en 2016

E mentres o Goberno central intenta sacar consecuencias positivas destes datos, a Comisión Europea rebaixa as previsións de crecemento da economía española. Prevé que creza un 1,2% este ano -unha décima máis do calculado en primavera- pero un 1,7% en 2015, o que supón unha rebaixa de catro décimas respecto ao cálculo inicial, para logo acelerarse ata o 2,2% en 2016. Con estas cifras, a taxa de paro reduciríase desde o 24,8% de media en 2014 ata o 23,5% o ano que vén e quedará no 22,2% en 2016.

Deste xeito, España sería o Estado de Europa con máis paro ata ese 2016, con máis de dez puntos superior á media da UE e cunha taxa superior á de Grecia, o único que país que se achegaría aos alarmantes niveis de desemprego españois.

Pero sempre se poden atopar datos optimistas. A Xunta presume de que a baixada interanual no número de desempregados é "a maior de todo o Estado" e a directora xeral de Formación e Emprego, Ana María Díaz, cre que malia que “non se pode facer unha valoración positiva” si pon en valor a evolución interanual do paro en Galicia, xa que esta "constitúe unha referencia desestacionalizada á hora de valorar as cifras".

A Xunta presume da "maior baixada interanual do paro en España" pero nada di da perda continua de afiliados á Seguridade Social

"Xa se cumpre un ano de descensos, o que confirma a mellora progresiva do comportamento do mercado laboral”, insistiu a Xunta, que repetiu o discurso do Goberno central ao falar de datos interanuais que supoñen "o mellor comportamento interanual nun mes de outubro de toda a serie histórica en termos absolutos (estatísticas publicadas desde 1996) e, en termos relativos, desde 1999".

“Galicia remata outubro con menos parados dos que había no mesmo mes dos anos 2013 e 2012”, sinalou Díaz López, que nada dixo do descenso no número de afiliados á Seguridade Social e da perda constante de postos de traballo no país, en contraste co que ocorre no conxunto do Estado.

Despece

  • "Están a provocar o empobrecemento masivo dos traballadores"

    A CIG advirte dos malos datos do desemprego e repara no descenso da recadación á caixa da Seguridade Social que, segundo o secretario confederal de Emprego, Miguel Malvido, explícase "por mor das cada vez peores condicións laborais". “O incremento dos contratos a tempo parcial, as rebaixas salariais e a aplicación da tarifa plana” explicarían, xa que logo, esta caída da recadación dos ingresos e constarían ademais un medre da precariedade que é, para a CIG, “alarmante”.

    "Estase a provocar un empobrecemento masivo da clase traballadora", denuncia a CIG

    Segundo a central nacionalista, esa precariedade afecta ademais "non só as novas contratacións senón tamén a quen mantendo o seu posto de traballo ve como as empresas recortan os seus salarios e empeoran, en conxunto, as súas condicións laborais". "Estase a provocar un empobrecemento masivo da clase traballadora”, insisten.

    Para a CIG, as promesas de recuperación do PP son “falsas”. Malvido asegura que “son tan pouco críbeis como as expectativas macroeconómicas que presentan para xustificar os orzamentos tanto da Xunta como do Estado, onde afirman que a reforma fiscal provocará un incremento da demanda interna. Pero con esas condicións salariais e laborais, como esperan que medre o consumo até o punto de tirar da economía?”

    A CIG tamén advirte de que "cada vez menos xente cobra unha prestación contributiva ou un subsidio". "A falta de ingresos coloca a miles de galegos e galegas ao borde da exclusión social sen que se articule medida algunha para paliar esta situación”, di Malvido, que denuncia a emigración masiva da mocidade e a necesidade de medidas concretas e "non parches" e uns orzamentos "que permitan a posta en marcha dun plan industrial que promova o desenvolvemento dos sectores básicos da economía galega e que se pechen os ciclos produtivos no noso país".

    "Os datos obrigan a rebaixar as previsións triunfalistas dos gobernos", asegura UGT

    UGT, pola súa banda, cre que os datos "obrigan a rebaixar as previsións triunfalistas dos gobernos, tanto o central como o galego" e evidencian que "aínda son moitos os problemas que se rexistran e que o desemprego segue a ser a gran lacra que ten que solucionar este país".

    O sindicato critica que a Xunta poña enriba da mesa un proxecto de Orzamentos para a comunidade para o 2015 que "recollen contías claramente insuficientes en materia de políticas activas para intentar resolver ou contribuír a mellorar a actual conxuntura".

    Para Comisións, o remate do verán "trouxo a realidade do mercado laboral de Galicia"

    Pola súa banda, CCOO sinala que o remate do verán "trouxo a realidade do mercado laboral no noso país". O sindicato xa advertira nos últimos meses que "os contratos creados eran precarios e eventuais e alertaba dun rebrote do paro no inicio do cuarto trimestre do ano", como así sucedeu. A secretaria de Emprego, Maica Bouza, lamenta uns datos que son "rotundamente malos sen paliativos", e reproba que a Xunta estea a "perder un tempo valioso".

    Segundo a sindicalista, as cifras en Galicia son "pésimas", peores que no conxunto do Estado. Na súa opinión, é "catastrófico" que teñamos 244.044 persoas desempregadas e, sobre todo, case 95.000 galegas e galegos con experiencia laboral pero que non cobran actualmente ningún tipo de prestación.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza