A poboación en risco de pobreza (con ingresos inferiores ao 60% da mediana) pasou do 19,4% ao 14,2% nun ano en Galicia. Tan só País Vasco e Illas Baleares teñen unha taxa de risco de pobreza máis reducida e Navarra presenta o mesmo nivel que Galicia
A taxa de risco de pobreza ou exclusión social en Galicia descendeu de forma clara no ano 2024. A poboación en risco de pobreza (con ingresos inferiores ao 60% da mediana) pasou do 19,4% ao 14,2% nun ano, situándose no seu nivel máis baixo da serie histórica, que se inicia no 2008, segundo os datos achegados polo Instituto Nacional de Estatística na súa Enquisa de Condicións de Vida, publicada este xoves.
Tamén se reduciu a porcentaxe de persoas en risco de pobreza ou exclusión social, un indicador que ademais dos ingresos toma en consideración outros factores, como a carencia material de determinados conceptos ou a pertenza a fogares con poucas persoas traballando. Neste caso a taxa caeu dende o 25,5% ao 18,8% da poboación, igualmente o valor máis reducido da serie histórica.
Tamén se reduciu a porcentaxe de persoas en risco de pobreza ou exclusión social, que caeu dende o 25,5% ao 18,8% da poboación, igualmente o valor máis reducido da serie histórica
En ambos os dous casos os valores galegos sitúanse moi por debaixo da media española, que tamén experimentou unha mellora no ano 2024 e presenta unha tendencia de descenso nos últimos anos. A taxa de risco de pobreza no conxunto do Estado pasou do 20,2% ao 19,7% nun ano, tamén a porcentaxe máis baixa dende o 2008. A taxa de risco de pobreza ou exclusión social caeu do 26,5% ao 25,8%, o mellor indicador da serie histórica.
Outros indicadores, relativos á carencia materia, amosan tamén a mellora da situación en Galicia. Porén, tamén revelan que hai unha parte significativa da poboación que segue a ter dificultades no seu día a día. Así, o 16,6% non se pode permitir manter a vivenda a unha temperatura adecuada
Galicia é, de feito, a terceira comunidade autónona cunha menor proporción da súa poboación por debaixo dese limiar da pobreza. Tan só País Vasco e Illas Baleares teñen unha taxa de risco de pobreza máis reducida e Navarra presenta o mesmo nivel que Galicia.
O mesmo sucede co outro indicador, máis completo, da pobreza e a exclusión social. Neste caso, de novo País Vasco, Illas Baleares e Navarra presentan os mellores datos, con Galicia na cuarta posición.
O mapa amosa unha clara diferenza entre o norte (con menos pobreza) e o sur (máis pobre), con Andalucía, Estremadura, Castela-A Mancha e Murcia como os territorios con máis persoas en risco de pobreza e exclusión sociañ
Os indicadores do INE buscan tamén medir a desigualdade existente en cada territorio, por exemplo a través do Índice Gini. Neste senso, Galicia aparece como a comunidade autónoma menos desigual do Estado
O INE non ofrece datos diferenciados por idade ou lugar de residencia no interior de Galicia, pero outros datos recentes publicados polo instituto público hai uns meses indicaban importantes diferenzas na distribución da riqueza marcada por idade e territorio. De igual xeito, nos últimos anos a poboación máis nova é a que vén presentando un maior risco de pobreza, mentres que as persoas de máis de 65 anos son as que teñen indicadores máis favorables neste senso.
Outros indicadores publicados este xoves na Enquisa de Condicións de Vida, relativos á carencia material ou á posibilidade de acceder a certos servizos, amosan tamén a mellora da situación en Galicia. Porén, tamén revelan que hai unha parte significativa da poboación que segue a ter dificultades no seu día a día. Así, o 35,8% dos galegos e galegas non se poden permitir marchar de vacacións unha semana (o 38,2% no 2023). De igual xeito, o 16,6% non se pode permitir manter a vivenda a unha temperatura adecuada (21,5% en 2023, momento en que este indicador acadou o seu máximo histórico).
O 20% máis rico de Galicia múltiplica por 4,2 os ingresos do 20% máis pobre, mentres que no conxunto do Estado español a diferenza é moi superior (5,4 veces)
Os indicadores do INE buscan tamén medir a desigualdade existente en cada territorio. Neste senso, Galicia aparece como a comunidade autónoma menos desigual do Estado. O índice de Gini é un dos métodos máis aceptados para medir a desigualdade de ingresos nun territorio. O valor 0 corresponde á "equidade perfecta" e o valor 100 á absoluta desigualdade.
Galicia presenta neste caso un valor de 26,8 sobre 100, o máis baixo da serie histórica e o máis reducido de todas as comunidades autónomas do Estado, por debaixo do dato de Aragón e lonxe da media española (31,2) que tamén amosa unha tendencia a descender nos últimos anos.
Outro indicador empregado para medir a igualdade na distribución dos ingresos, a relación s80/s20 (relación entre a renda dispoñible total do 20% da poboación con ingresos máis elevados e a do 20% con ingresos máis baixos), tamén sitúa a Galicia como o territorio con menor desigualdade. Neste caso o 20% máis rico de Galicia múltiplica por 4,2 os ingresos do 20% máis pobre, mentres que no conxunto do Estado español a diferenza é superior (5,4 veces).
