O 70% dos vascos apoia o achegamento dos presos de ETA a cárceres de Euskadi e Navarra e a reinserción dos que renuncien á violencia. Unha porcentaxe semellante (66%) rexeita, con todo, a concesión dunha amnistía. O 52% cre que ETA renunciou definitivamente á violencia, fronte a un 36% que non o cre. As "sensacións" maioritarias entre os vasco ante o proceso de pacificación son de "optimismo" e "ilusión". Descarga aquí o informe completo.
Fálase
O Goberno aproba un "código de boas prácticas" para a banca, un conxunto de suxestións de cumprimento opcional, entre as que se inclúe a posibilidade da dación en pagamento para familias con todos os seus membros en paro e con vivendas de menos de 200 mil euros.
Na roda de prensa posterior ao Consello de Ministros Soraya Saenz de Santamaría afirma que o Goberno só aceptará modificacións á reforma laboral "que axuden a mellorar a lei". Santamaría afirmou que "as folgas non son a solución en momentos de graves dificultades para os cidadáns" e salientou o "importante apoio" a lei logrou este xoves no Congreso, de PP, CiU e UPN.
Haberá folga xeral unitaria o 29 de marzo. CC.OO. e UGT únense ás convocatorias previas de CIG, ELA e LAB, entre outros sindicatos. Cándido Méndez, en roda de prensa, cualificou a convocatoria de "xusta e necesaria", as mesmas palabras que empregou Rajoy para referirse á reforma laboral. Toxo e Méndez aseguraron que a convocatoria se adiou até este venres porque se atopaban á espera de que o Goberno "rectificase"
Novas confirmacións no Festival do Norte, que se celebrará en Vilagarcía o 27 e 28 de abril: Lori Meyers, El Columpio Asesino, Polock, Los Pilotos e os composteláns Disco Las Palmeras únense a Los Enemigos, Fangoria ou Love of Lesbian.
Fernando Blanco vén de comparecer ante a prensa cos seus avogados. Sinala que as declaracións de Dorribo son "inxurias", pide o arquivo da causa contra el dentro do caso Campeón e achega nova documentación. Máis información, esta mañá en Praza Pública.
CCOO aproba por unanimidade convocar unha folga xeral o 29 de marzo e UGT anunciarao en breve. Ambos os dous sindicatos únense ás convocatorias xa anunciadas hai semanas das centrais nacionalistas vascas e galegas. Ignacio Fernández Toxo e Cándido Méndez ofrecerán unha roda de prensa ás 13.15 horas. CC.OO afirma así mesmo a súa vontade de manter a presión social despois do 29M "para modificar substancialmente a reforma laboral se o Goberno non rectifica e se avén a negociar".
O spot institucional realizado pola Xunta polo 8 de marzo esperta críticas, tanto polo uso da lingua (o xogo de palabras pilar-piar) como no que atinxe ás reivindicacións dos dereitos das mulleres.
Hoxe as defensas de Fernando Blanco e Salustiano Mato comparecen ante os medios para explicar a posición dos seus defendidos ante a Operación Campeón.
Volven as sacas de votos dubidosos? PP e PSOE, de acordo para reformar de novo o voto emigrante e evitar que os "residentes ausentes" teñan que solicitar explicitamente o sufraxio en cada elección. En El País.