Gerardo Crespo reivindica os "favores" que lles fixo a políticos como Carlos Negreira e acusa o PP de deixalo "tirado" co estourido da Operación Zeta, a presunta trama de falsos cursos de formación que supostamente lideraba. Asegúrao nunha entrevista con Faro de Vigo. Toda a información da Operación Zeta, en Praza.
A Fiscalía investiga se a Garda Civil multou arbitrariamente persoas estafadas coas preferentes con supostas sancións de tráfico. Cóntao El País
A conselleira de Traballo asegura que os presuntos líderes da trama Zeta "enganáronnos a todos". Segundo o sumario do caso, Beatriz Mato recibiu un bolso como agasallo dende unha das empresas de Gerardo Crespo, que a homenaxeou a través dunha das súas asociacións.
Médicos sen Fronteiras lanza a campaña #StopEbola para "mobilizar á sociedade para frear e conter o brote de ébola en África occidental". Pódese colaborar na web que veñen de lanzar.
A Axencia Tributaria multa A Mesa por solicitarlle notificacións en galego. A organización recibiu unha denuncia por "resitencia, obstrucción y excusa a las actuaciones de la Administración Tributaria” e anuncia que recorrerá a sanción ante todas as instancias.
Todos os eurodeputados de PP e PSOE, agás dúas abstencións socialistas (Elena Valenciano e Javier López), votan a favor de que continúen as subvencións europeas á tauromaquia: 130 millóns de euros anuais. A proposta de supresión destas axudas foi presentada polo Partido Verde Europeo.
Julio Somoano, destituído como director de informativos de TVE. Será substituído por José Antonio Álvarez Gundín, subdirector de opinión de La Razón. Baixo a dirección de Somoano os informativos da televisión pública, ademais de recibir constantes denuncias de manipulación en favor do Goberno, pasaron dunha audiencia media do 18,7% (decembro de 2011) ao 12,5% (setembro de 2014)
Máis de medio millón de persoas acudiron ás salas na primeira xornada da Festa do Cine, que permite ver filmes por 2,90 euros até este mércores.
A contable de Azetanet, a consultoría de Gerardo Crespo, admite que sacou cartos da caixa B para facer "dous sobres" para o PP. Nos documentos decomisados pola Policía figuran pagamentos de 17 mil euros ao Partido Popular. A trama chega ata Feijóo; un amigo do presidente da Xunta, Francisco Ramón de Lucas Blanco, mediaba entre a trama e a cúpula do PP
A maioría das 60 titulacións que ofrecen máis opcións para atopar un emprego son de ciencias, encabezadas pola Medicina, a Óptica a Enxeñaría Industrial, segundo un informe do Ministerio de Educación