Os diarios impresos deste mércores dedican de novo á economía as súas portadas, aínda que dende puntos de vista moi diferentes. El País céntrase en que o Banco de España "admite o seu fracaso" ante a crise e outros como o catalán La Vanguardia levan á primeira páxina a culminación da simbólica estatua dedicada a Carlos Fabra en Castelló. El Punt Avui céntrase na escalada da emigración por mor da crise e ABC, pola súa banda, céntrase na lixeria baixada no salario do rei.
Fálase
O Centro Superior de Investigacións Científicas (CSIC) anúncialles a todos os seus centros que vai "paralizar" ou "atrasar" os seus pagamentos. Adiántao Materia.
A Unión Progresista de Inspectores de Traballo pronúnciase publicamente contra os recortes do Goberno central, cualifícaos de "brutais" e lígaos directamente co rescate bancario.
A crise impulsa a poboación española cara á emigración: máis de 40.000 persoas abandonaron o Estado no que vai de ano. En El Economista.
O Ortegal únese ás manifestacións de CIG, UGT e CCOO contra os recortes do Goberno do vindeiro xoves 19. Os cidadáns están convocados ás 20 horas fronte á Casa do Concello de Ortigueira.
Compromiso por Galicia apoia as mobilizacións do vindeiro xoves 19 contra os recortes do Goberno e advirte de que o PP "quere acabar co Estado de Benestar e coa democracia". Ademais, mostra a súa satisfacción pola "precisa unidade de acción sindical" ante os axustes.
Montoro recúa e di agora que os funcionarios que cobran menos de 960 euros si recibirán a paga de Nadal.
Centos de persoas, cos líderes da CIG, CCOO e UGT á cabeza, percorreron esta mañá as rúas de Pontevedra para rexeitar a condena de cadea imposta a tres sindicalistas "por participar na folga do comercio de alimentación en 2009". Os sindicatos reuniranse mañá co fiscal xeral de Galicia.
O ministro do Interior, Jorge Fernández Díaz, perdeu no AVE o seu iPad con datos sobre ETA. En 20 Minutos
Os empregados públicos de Galicia concentraranse este xoves 19 entre 11 e 12 diante dos centros de traballo da Administración Pública de todo o país contra os recortes anunciados polo Goberno. Así o acordaron as organizacións sindicais da CIG Área Pública, UGT, CCOO, C-CSIF, USO, CGT, SAE, CESM, OMEGA e STAJ.