Os durísimos incendios que están a sufrir varias comarcas do norte de Catalunya levan hoxe boa parte das portadas dos diarios impresos. Comparten espazo coa incerteza sobre as finanzas dalgunhas autonomías, como en El País, ou coa política, como en El Mundo, que ofrece unha enquisa de intención de voto.
Fálase
Falecen tres persoas no incendio do Empordà, que xa obrigou a confinar nove vilas e a cortar estradas e a circulación do AVE. A Generalitat recoñece que o lume está "totalmente descontrolado". Hai tamén doce feridos.
Un incendio descontrolado en La Jonquera (Girona) queimou xa 1.000 hectáreas e provocou dous feridos. O lume obrigou a cortar seis estradas. Imaxe de @Marina_Loppez.
O PP suxire unha conspiración de Alemaña contra España para xustificar o ataque dos mercados. Cóntao Público.
A intervención de Catalunya, cada vez máis preto, segunda anuncia Vilaweb, que asegura que a Generalitat non descarta acudir ao fondo estatal.
O PSOE asegura que Gallardón "busca o aplauso ultraconservador atacando os dereitos das mulleres". Os socialistas responden ás palabras do ministro de Xustiza, que asegura "a malformación do feto xa non será un suposto para abortar".
Francisco Jorquera cre que "para ser nacionalista en Galicia hai que ser de esquerdas, e para ser de esquerdas, hai que ser nacionalista". Nunha entrevista en Europa Press, avoga por que as eleccións autonómicas se celebren "canto antes".
Murcia tamén acudirá ao rescate e pedirá entre 200 e 300 millóns ao fondo estatal.
O FMI ameza a UE con paralizar as axudas a Grecia, segundo avanza o diario alemán Der Spiegel, que advirte de que o país heleno entraría así en insolvencia.
Feijóo garante que Galicia non pedirá rescate porque "está blindada" e adianta que proporá reducir deputados no Parlamento, que pasaría de 75 a uns 60.