A Xunta informa de que 53 dos 80 falecidos xa foron identificados ao igual que todos os feridos. Hai 94 ingresados, 31 en estado crítico e catro deles son nenos. "Non se descarta que poidan aparecer novas vítimas", asegura Alfonso Rueda. Máis información, nuns minutos en Praza.
Fálase
As familias critican a lentitude no proceso de identificación das vitimas. Algúns medios comezan a publicar listaxes de falecidos.
Falece o pintor Xaime Cabanas, segundo adianta La Voz. Semella que morreu por causas naturais na súa casa.
A Delegación do Goberno eleva a 80 o número de víctimas mortais
O gabinete que xestiona a catástrofe advirte de que non se precisan psicólogos voluntarios ao estar cubertas as necesidades, aínda que agradece a axuda ofrecida.
Manuel Bragado repasa no seu blog as sensacións e a cadea de feitos provocados pola traxedia. Destaca "a entrega aos heroes do 24X: traballadores públicos sanitarios, de seguridade e emerxencia, como da xenerosidade da veciñanza de Angrois" e a cobertura dalgúns medios de comunicación. E critica "o pobrísimo papel da TVE e das cadeas privadas xeralistas estatais, que continuaron coa súa programación coma se nada sucedese". Conclúe que "a traxedia de Angrois demostrou que é imprescindible contar con medios públicos e xornalistas independentes para facerlle fronte colectivamente a estas desgrazas colectivas".
Canda ao vídeo que amosa as imaxes do descarrilamento, e que está a dar a volta ao mundo, comezan a compartirse nas redes sociais outras gravacións de como circulan habitualmente os trens no lugar no que tivo lugar o accidente e nas que se advirte que a velocidade de entrada á curva é moi inferior.
Nas últimas horas son innumerables as mensaxes de apoio chegadas dende todo o planeta. O presidente francés François Hollande expresou a total solidariedade de Francia. Tamén o presidente ruso Vladímir Putin enviou as súas condolencias, o mesmo que o Papa Francisco. E tamén a Organización para a Liberación de Palestina (OLP) e Israel.
Estanse convocando concentracións silenciosas para as 20.42 horas de hoxe en varias cidades de Galicia. En Ourense o acto de homenaxe ás víctimas terá lugar na estación Empalme. A cita foi convocada por diversas organizacións, entre elas a Plataforma en Defensa do Tren.
O xuiz tomará declaración como imputado ao maquinista. O titular do Xulgado de Instrucción número 3 de Santiago ordenoulle á Policía Xudicial tomar declaración como imputado ao condutor, que está a disposición policial nestrs momentos, segundo informan fontes do TSXG, que aclaran que ainda non está imputado xudicialmente.