#pechehistoria Os estudantes pechados na Facultade de Historia da USC piden ao estudantado que se "una á loita". Nun manifesto feito público tras unha asemblea, os mozos posiciónanse "contra as medidas que favorecen a elitización e a privatización do ensino namentres se manteñen ou incrementan as concesións ao ensino privado".
Fútbol sala. O equipo compostelán do Autos Lobelle cae eliminado nos cuartos de final polo título, tras perder novamente contra o Caja Segovia, desta vez fóra da casa e por 4 goles a 2. Ademais dos casteláns, FC Barcelona Alusport e Inter Movistar tamén se clasificaron para a ronda semifinal, mentres que El Pozo e Unacom Zaragoza terán que decidir o pase no terceiro e definitivo partido da serie.
Novagalicia Banco reabre as súas oficinas de Moaña, que pechara polo conflito das preferentes. "Obtivemos garantías suficientes para volver abrir", di a entidade.
O Balonmán Cangas xogará este domingo a final para retornar á Liga Asobal logo de vencer o Gijón (21-20) no Gatañal. En categoría feminina, o Guardés fai historia e ascende á elite.
Fútbol. O Lugo segue adiante na súa loita por subir a Segunda División tras empatar en Eibar (0-0) e facer bo o 1-0 da ida. O Alondras tamén continúa loitando por ascender a 2ªB logo de gañar 2-0 ao Cayón.
Hockey sobre patíns. O Liceo vence na semifinal da Copa de Europa ao Valdagno (5-3) e xogará a súa segunda final consecutiva, desta vez ante o Barça. O equipo coruñés busca revalidar o título acadado o ano pasado.
Gómez Besteiro, elixido por aclamación novo secretario provincial do PSdeG de Lugo. "Recuperar a Xunta é o obxectivo inmediato", proclama o presidente da Deputación, que pide "unidade clara e traballo continuo" para conseguilo.
Raúl Fernández, reelixido secretario provincial do PSdeG de Ourense tras recibir o apio do 73,3% dos votos dos delegados. Obtivo 66 votos, mentres que o outro candidato, Pablo López Vidal recibiu 23 papeletas, tantas como avais reuniu para presentar a súa candidatura no II Congreso Provincial.
Unha empresa chinesa estuda investir 270 millóns no porto exterior da Coruña. A compañía Beijing 3E vén de asinar un preacordo coa Autoridade Portuaria para a posible instalación dunha terminal de valorización enerxética de aceites en punta Langosteira.
Jorquera insiste en que "a única forma posible de evitar o expolio do aforro galego" é creando "un banco público galego". O candidato do BNG á presidencia da Xunta rexeita a proposta de banco público estatal anunciada polo goberno de Rajoy “pois suporía a absorción de Novagalicia Banco e que a súa sede pasase a estar en Madrid”.