O Goberno de Mariano Rajoy vén de publicar un anuncio de licitación por case tres millóns de euros (prorrogables a cinco millóns) en servizos de publicidade. Moncloa quere facer unha campaña de "proximidade, recoñecemento e apoio ao recrutamento" das "Forzas Armadas". Está na plataforma de contratación do Estado.
O primeiro ministro de Rusia, Vladimir Putin, promete un "rearmamento sen precedentes na historia do país". En plena campaña electoral, o líder político transmite ao público que “esta era esixe unha política determinada de reforzamento do sistema de defensa aérea e espacial do país”. Recólleo o diario portugués Público
O secretario xeral de CCOO, Ignacio Fernández Toxo, asegura que a reforma laboral xa se aplica en novos convenios, despedimentos e rebaixa de salarios, sobre todo no terceiro sector. O sindicalista galego reclama a "reacción inmediata" de Moncloa tras as protestas de onte en todo o Estado. Na Cadena Ser
María Dolores de Cospedal, reelixida secretaria xeral do PP, nega que haxa unha campaña mediática contra as centrais sindicais. A tamén presidenta de Castilla la Mancha insiste en que "non hai" un rexeitamento maioritario á reforma laboral malia ás concorridas mobilizacións deste domingo. En Público
A forza da súa divisa e o lamentable estado da economía global volveu provocar que Xapón rexistrase déficit comercial negativo por cuarto mes consecutivo. As vendas no exterior son o alicerce da economía deste país. O déficit supera os 14.000 millóns que, non obstante, é menos da metade do español. En Invertia
Hoxe o "día da decisión" sobre o segundo rescate grego. Así titula, polo menos, a axencia Reuters. Os ministros de finanzas da eurozona reúnense hoxe para dar o visto e prace ao novo paquete de medidas de recorte aprobadas por Atenas. A experiencia das últimas semanas, nas que a UE retrasa todo, dinos que non hai que descartar un novo adiamento dos prazos. Máis información
A consultora KPMG alerta do incremento nun 50% en só oito anos (do 2002 ao 2010) dos custos empresariais derivados do cambio climático global e sinala que, se as empresas pagasen integramente os custos medioambientais da súa produción, os seus beneficios diminuirían un 41%. O informe recomenda tomar medidas decididas para frear o cambio climático tanto no ámbito empresarial como na colaboración entre as industrias e os poderes públicos. Resumo en EFEverde e relatorio íntegro en inglés.
Natixis, un dos principais bancos de investimento franceses, publica un informe no que afirma que España e Portugal non deben baixar os salarios, xa que o seu desempeño é propio de economías competitivas, grupo no cal tamén se inclúe a Alemaña, Irlanda e Bélxica; polo contrario, os Estados da zona euro menos competitivos son, segundo o relatorio, Francia, Italia e Grecia. No caso de España e Portugal, a crise explícase pola caída da demanda interna, e nese sentido un abaratamento dos salarios só contribuirá a agravar a situación. Eis o informe completo, en francés.
Os representantes da industria cinematográfica aproveitaron a noite dos Goya para expoñer a súa visión sobre o modelo de relacións con internet e co público que defenden, tras o turbulento ano 2011 marcado pola polémica Lei Sinde (ou, máis propiamente, Lei Biden-Sinde-Wert). Semella que os ventos de cambio aínda non chegaron a estas latitudes, como podedes comprobar lendo esta crónica de 20 minutos.
"No habrá paz para los malvados" gaña o Goya ao mellor film español do ano e o seu director, Enrique Urbizu, faise co premio ao mellor director.
Enrique Urbizu, Kike Maillo e a animación galega saen como grandes triunfadores da noite dos Goya.