E no teu concello, sodes de martes de Entroido? De luns? de mércores?

Concellos que celebran festivo local no Entroido Dominio Público Praza Pública

Galicia está de festa. 176 concellos escolleron algún dos días do Entroido como festivo local. 155 escollen o martes, 15 o mércores, 4 o luns e outros dous repiten festa luns e martes. Son uns poucos menos que o ano pasado pero representan máis da metade do país, unha mostra da importancia destas datas e da súa popularidade na maior parte de Galicia.

155 escollen o martes, 15 o mércores, 4 o luns e outros dous repiten festa luns e martes

Este luns xa non é laborable en catro localidades (Castro Caldelas, Sarreaus, Tui e Vilariño de Conso). Pero o día grande desta semana chegará o martes, no que non se traballará nun total de 155 concellos: a maior parte da provincia de Ourense, o centro da de Lugo e a metade norte da provincia da Coruña. Dous concellos, ademais, farán festa luns e martes (Monfero e Vilarmaior). Finalmente, a festividade do mércores de cinsa está concentrada en tres áreas: o sueste da provincia de Ourense (Laza, Verín ou Viana do Bolo), a comarca de Pontevedra e boa parte de Ferrolterra.

O Entroido inclúe un festivo local en cinco das sete cidades galegas (todas agás Compostela e Vigo). Precisamente, a metade sur da provincia da Coruña e boa parte da provincia de Pontevedra conforman a parte de territorio que non o inclúe no seu calendario. 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.