A CIG tamén convoca folga no ensino o 9 de maio

Para a CIG, a folga "ten que ser un rotundo éxito" co obxectivo de parar a LOMCE CC-BY-SA Praza Pública

Haberá unidade. A CIG tamén convoca folga no ensino o 9 de maio e a Plataforma Galega en Defensa do Ensino Público adoptará probablemente a mesma decisión nunha xuntanza que terá lugar esta tarde, polo que a convocatoria que a pasada semana anunciaban CC.OO., UGT e a Plataforma en Defensa do Ensino Público contará co apoio de todos os sindicatos de profesorado e estudantado de Galicia e das asociacións de nais e pais. 

Louzao denunciou tamén a xestión de Jesús Vázquez á fronte de Educación, "un conselleiro que actúa como un militante disciplinado do PP e como un alumno aplicado das súas políticas", dixo

Anxo Louzao, secretario nacional de CIG-Ensino, salientou a necesidade de que haxa un "total e rotundo éxito" da folga en contra do anteproxecto de Lei Orgánica de Mellora da Calidade Educativa e sinalou que o sindicato vén realizando unha actividade moi intensa de información e mobilización contra a LOMCE, con asembleas e peches por toda Galicia e coa recollida de máis de dez mil sinaturas. Lembrou que xa en decembro a CIG "deixou claro que ou ben se retiraba este anteproxecto de lei ou non habería máis remedio que convocar unha folga". Louzao denunciou tamén a xestión de Jesús Vázquez á fronte de Educación, "un conselleiro que actúa como un militante disciplinado do PP e como un alumno aplicado das súas políticas", dixo.

O proxecto do ministro Wert está "impregnado dunha visión ideolóxica neoliberal e tamén españolista que invade as competencias da nosa autonomía e que chama á insubmisión ao ensino na nosa lingua"

Louzao enumerou as moitas razóns que levan o sindicato a posicionarse en contra do proxecto do ministro Wert, "impregnado dunha visión ideolóxica neoliberal e tamén españolista que invade as competencias da nosa autonomía e que chama á insubmisión ao ensino na nosa lingua". Un proxecto de lei, ademais, "completamente confesional, que reforza a materia de Relixión e que recolle a visión ideolóxica da Conferencia Episcopal" e que tamén "está ao servizo da patronal do ensino privado-concertado, pois traslada a súa mercantilista do ensino chegando a dar rango de lei a aqueles centros que segregan o alumnado por cuestión de xénero". 

Para Louzao, a norma "liquida a xa cativa dirección democrática dos centros e reforza o elitismo, camiñando cara un ensino selectivo e segregador que suprime a igualdade de oportunidades e fai do sistema educativo unha cuestión competitiva". Finalmente, denuncia que as reválidas que prevé ao final de cada ciclo "van facer que o alumnado se xogue todo a unha carta" e supoñen "unha desconsideración do traballo do profesorado" e "afianzan a centralización, pois os obxectivos e deseño destas reválidas tamén van ser realizadas pola administración central".

 

O 9 de maio "non é a mellor data" pero "temos que confluír"

"Ten que haber un total e rotundo éxito en contra deste proxecto de lei"

Louzao referiuse á convocatoria anunciada a pasada semana por CC.OO., UGT e a Plataforma en Defensa do Ensino Público. Afirmou que a CIG se "congratula" de que "a nivel do Estado se decidira convocar unha folga". Pero criticou que "se evidencia a visión centralista das organizacións que convocan a folga" porque "non contan coa organización maioritaria no ámbito do ensino en Galicia" e tamén "porque o dia 9 é festivo en Santiago". "Seguro que non se lles ocorrería convocar unha folga un dia que fose festivo en Madrid", engadiu. Porén, salientou que "temos que confluír no mesmo dia, porque o obxectivo é evidenciar que estamos en contra dun proxecto de lei perverso e nocivo como nunca houbo. Ten que haber un total e rotundo éxito en contra deste proxecto de lei".

 

Os Comités tamén convocan folga para 9 de maio

“O vindeiro 9 de maio teremos unha nova oportunidade para rexeitar masivamente este golpe de estado no ensino coñecido como a LOMCE e os recortes no ensino do PP” resaltou Daniel Candal

Os Comités tamén anunciaron este martes a convocatoria de folga para o 9 de maio, tanto no ensino medio coma no universitario, baixo o lema Na defensa do ensino público, nin un paso atrás. Non á LOMCE. Os Comités rexeitan o que consideran "unha auténtica contrarreforma educativa do Partido Popular". “A mal chamada Lei Orgánica para a Mellora da Calidade Educativa) só é a plasmación do modelo máis sectario do PP no ensino, pretenden debilitalo ao máximo para ser menos público, menos democrático, menos galego e cunha menor calidade” indicou o voceiro desta organización estudantil nacionalista. 

“O vindeiro 9 de maio teremos unha nova oportunidade para rexeitar masivamente este golpe de estado no ensino coñecido como a LOMCE e os recortes no ensino do PP” resaltou Daniel Candal tras valorar positivamente que esta xornada sexa respaldada tamén por convocatorias do conxunto da comunidade educativa galega.

Despece

  • CIG, CCOO e UGT denuncian a intromisión da Xunta na contratación de profesorado das Universidades

    As seccións sindicais da CIG, CCOO e UGT denuncian un escrito que chegou ás tres universidades galegas, procedente da Xunta, no que se estabelece un procedemento para tramitar as prazas de profesorado de carácter temporal someténdoas a unha autorización autonómica. Denuncian que a pretensión da Xunta “é gravísima” e que se trata dunha intromisión na autonomía universitaria carente de amparo normativo.

    Denuncian que a pretensión da Xunta “é gravísima” e que se trata dunha intromisión na autonomía universitaria carente de amparo normativo

    Segundo explicou a representante da CIG, Alba Nogueira, a Xunta pretende facer un control das prazas temporais estabelecendo os mecanismos para a súa autorización e entra en cuestións “tan surrealistas” como pedirlle ás universidades que fagan unha previsión das mortes, embarazos ou baixas por enfermidade que se poidan producir de aquí a 2015. 

    A representante da CIG afirma que se trata dunha “intromisión total” na autonomía das universidade, porque “unha cousa é marcar a marxe de orzamento para políticas de persoal e outra é intervir cada unha das prazas e decidir se saen ou non”. Considera que se constata así o descoñecemento do funcionamento destas institucións e entende que a mostra de que isto “é unha barbaridade”, é que somete todo isto a un único prazo.

    No primeiro semestre non podería haber o profesorado necesario, nin asociados, nin coberturas de baixas. Sería un semestre perdido”, denuncia Alba Nogueira

    Deste xeito, a 30 de abril de cada ano hai que enviar a previsión que existe. Pola súa banda a Xunta dáse tres meses para autorizar as prazas. Isto implica que en 15 días as tres universidades terán que comunicar que previsións de contratacións temporais, asociados, baixas, etc pode haber nos próximos anos e até finais de xullo a Xunta non contesta. “Tendo en conta que agosto non é hábil, a universidade convocaría no mes de setembro e abriríase o prazo de solicitude, habería que convocar as comisións, os concursos e no primeiro semestre non podería haber o profesorado necesario, nin asociados, nin coberturas de baixas. Sería un semestre perdido”, denuncia Alba Nogueira.

    As organizacións sindicais xa solicitaron á universidade que se presenten alegacións a este escrito e non se sometan á intromisión da Xunta na autonomía universitaria. Na xuntanza mantida co vicerreitor da USC este xa anunciou a súa intención de presentar alegacións e agardan que das outras universidades se faga o mesmo. Para Benjamín Rey Sanjurjo, de UGT, a situación na que se coloca á universidade é realmente grave xa que este ano hai que renovar todas as prazas de asociados de Ciencias da Saúde e das outras carreiras, o que supón que arredor de 250-300 profesores/as teñen que ser renovados.

    Nogueira conclúe que o obxectivo é “levar á asfixia a universidade, provocar o colapso de certas titulacións, ter unha desculpa para favorecer a fuxida de alumnado e pechar certas titulacións por incapacidade para prestar a docencia”

    Nogueira conclúe que semella que o obxectivo é  “levar á asfixia a universidade, provocar o colapso de certas titulacións, ter unha desculpa para favorecer a fuxida de alumnado e pechar certas titulacións por incapacidade para prestar a docencia”. De feito lembra que en moitos ámbitos xa se está cuestionando a posibilidade de deixar de ofertar másters, "porque non é posíbel cubrir os graos co persoal que hai neste intre" e que se está provocando un deterioro da calidade e un descenso das opcións que se ofertan porque en titulacións máis masificadas, como ocorre no ámbito das ciencias sociais, "hai unha incapacidade real para asumir a docencia". 

  • A comunidade educativa concentrarase ante o Consello Escolar de Galicia

    A Plataforma Galega en Defensa do Ensino Público e a Plataforma en Defensa do Ensino Público chaman a protestar este mércores, ás catro e media da tarde, coincidindo coa xuntanza do Consello Escolar de Galicia (rúa San Roque nº2. Santiago de Compostela). Nesta xuntanza debaterase o decreto de comedores co que a Xunta busca incrementar nun 40% o que as familias deben pagar por cada menú e limitar os alumnos e alumnas exentas do pago.

    UGT salienta que o novo decreto de comedores escolares "é ilegal e arremete contra o dereito á educación como servizo público, gratuíto e universal. Impacta contra a compensación de desigualdades e resulta absolutamente intolerable para a xestión dos servizos complementarios da escola". O sindicato acusa a Xunta de faltar á verdade cando afirma que "o goberno de coalición de Galicia que presidou Touriño implantara o copago. O que fixo foi estender o servizo para conciliar a vida persoal, laboral e social, que como é alumnado non transportado na súa maioría non ten dereito a beca de comedor".

  • Peche na Costa da Morte

    Nais, pais, alumnado, anpas, representantes de CIG-Ensino e profesorado participaron este luns no IES Alfredo Brañas de Carballo nun peche contra a LOMCE e os recortes en educación, no marco das mobilizacións organizadas pola Plataforma Galega en Defensa do Ensino Público, "unha lei anti-educativa, involucionista, regresiva, agresiva, antidemocrática, recentralizadora,  españolizadora, elitista, clasista, mercantilista e reaccionaria", segundo os organizadores da protesta.

    A LOMCE "prexudicará notablemente ao ensino público, impedíndolle á maioría social do noso país o acceso aos estudos postobrigatorios"

    Despois da concentración realizada no exterior do centro celebrouse unha mesa redonda no salón de actos do instituto, onde a comunidade educativa manifestou que a LOMCE "prexudicará notablemente ao ensino público, impedíndolle á maioría social do noso país o acceso aos estudos postobrigatorios". A protesta rematou polas 9 e media da mañá, un pouco antes do comezo das clases. Apoiaron a mobilización, coa súa presenza, o alcalde de Carballo, Evencio Ferrero e os concelleiros Xosé Regueira, Marcos Trigo, Mar Eirís, Miragres Lantes e Xoán Sande.

    Peche no IES Alfredo Brañas de Carballo © Suso Bermello

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza