A Plataforma en Defensa do Ensino Público denuncia o "escurantismo" e as "mentiras" da Xunta

Representantes de FETE-UGT, Confapa, CCOO e Sindicato de Estudantes CC-BY-SA Praza Pública

Ao igual que o mércores facía CIG-Ensino, as organización que compoñen a Plataforma en Defensa do Ensino Público (FETE-UGT, CCOO, Confapa e Sindicato de Estudantes, entre outras) analizaron este xoves de forma moi crítica o inicio do curso escolar e anunciaron meses de mobilizacións, aínda non concretadas, no marco do debate da Lei Wert e en resposta ás medidas xa adoptadas polos gobernos galego e central. 

A Plataforma centra as súas críticas nos recortes de profesorado e de bolsas, os concertos educativos con colexios segregadores e a supresión dos comedores gratuítos e denuncia o "escurantismo propio doutras épocas" amosado por ambas as dúas administracións á hora de facilitar os datos que dende estas organizacións lles solicitaron sobre xubilacións de profesores, ou número de alumnos matriculados. A este respecto José Manuel Fuentes Fariña (CCOO) constatou que a información oficial do Ministerio de Educación, que recoñece que nos dous últimos anos hai 1.300 docentes menos en Galicia "vén subliñar unha vez máis as mentiras de Núñez Feijoo e Jesús Vazquez cando negaban que houbera recortes de persoal".

"A fórmula que establece a Consellaría constitúe un intento de saltar a sentenza do TSXG e seguir mantendo os concertos cos centros segregadores á espera da aprobación da LOMCE"

A Plataforma tamén denuncia que a Xunta "fai caso omiso" da sentenza do TSXG que impide o concerto con centros que segregan o alumnado por cuestión de sexo. Para estas organizacións, "a fórmula que establece a Consellaría constitúe un intento de saltar a sentenza e seguir mantendo estes concertos á espera da aprobación da LOMCE".

"Serán os nenos que paguen os 4,5 euros os que sosteñan o que a Xunta chama 'becas' porque o que achega o Goberno non é suficiente para dar de comer nas escolas públicas"

Mentres, Helena Gómez Vecino (Confapa) cargou contra a supresión do servizo gratuíto de comedor para o alumnado usuario do transporte público e o incremento nun 40% do seu prezo. Explicou que cos cartos que achega a Xunta, ao redor de 30 mil euros mensuais por centro (333 euros por día), non se pode pagar o servizo nin sequera para o alumnado que por cuestión de renda (aquelas familias cuns ingresos totais anuais de menos de sete mil euros) aínda ten acceso de balde ao comedor: "Serán os nenos que paguen os 4,5 euros os que sosteñan o que a Xunta chama 'becas' porque o que achega o Goberno non é suficiente para dar de comer nas escolas públicas". Gómez Vecino tamén destacou a iniciativa do banco de libros posta en marcha polas Anpas, que vén paliar a falta de vontade do Goberno popular de regresar á gratuidade dos libros de texto que puxera en marcha o bipartito. Estes bancos de libros supoñen "un aforro de máis de 200 euros" por familia e achegan tamén un beneficio pedagóxico: "eses libros vanse coidar e os nenos aprenden desa reciclaxe".

Pola súa banda, Pablo Álvarez (Sindicato de Estudantes) destacou que "os alumnos con máis necesidade ven como as medidas do Goberno constitúen un obstáculo insalvable para acceder ao ensino" e cualificou de "ideolóxicas" reformas coma a do sistema de bolsas, que dificultan que os alumnos procedentes das clases baixas poidan seguir estudando, "eliminando a igualdade de oportunidades.

Representantes de FETE-UGT, Confapa, CCOO e Sindicato de Estudantes CC-BY-SA Praza Pública

Despece

  • Protestas no inicio de curso universitario

    Os órganos de representación do persoal universitario, centrais sindicais e organizacións estudantís concentraranse este venres en Compostela coincidindo coa celebración do acto de apertura do curso académico. Ás 11 horas porase en escena unha tesoirada no Obradoiro, e ás 11.30 a protesta chegará ás portas do Pazo de Fonseca, onde se realiza o acto oficial, e onde se pretende que as autoridades presentes escoiten as críticas da comunidade universitaria.

    Ás 11.30 a protesta chegará ás portas do Pazo de Fonseca, onde se realiza o acto oficial, e onde se pretende que as autoridades presentes escoiten as críticas da comunidade universitaria

    Denuncian que a rebaixa orzamentaria no Sistema Universitario Galego é do 20% nos últimos catro anos e que o financiamento estrutural, que cobre os gastos de persoal e os gastos correntes básicos das universidades, pasou en 2013 de 290,06 millóns de euros a 250,74 millóns. Tamén alertan da "intromisión na autonomía universitaria" que supón a Lei 6/2013, do 13 de xuño, do Sistema universitario de Galicia busca un cambio de modelo que pasa polo afogo económico e a privatización das universidades.

    Tamén se sinala que "a suba de taxas, pero sobre todo, a reforma Wert do sistema de bolsas expulsan do ensino superior os estudantes de familias con menos recursos". E lémbrase que "o persoal das universidades galegas leva varios anos sufrindo recortes salariais cunha perda do poder adquisitivo do 25%" e que paralelamente "a non reposición das vacantes provoca unha grave descapitalización das universidades e unha atención cada vez máis deficiente ás actividades docentes e investigadoras".

    Chaman a acudir "cunha tesoira na man (de papel ou cartón)" e a construír entre todos os participantes unha silueta de tesoira

    Para a devandita tesoirada as organizacións convocantes (CIG, CCOO, CUT, FETE-UGT, Comités, Liga Estudantil Galega, Sindicato de Estudantes, Comité intercentros de PAS USC, Comité de empresa do PAS UdC, Comité de empresa de PDI da USC, Comité de Empresa de PDI da UdC, XPDI USC, XPDI da UdC, Xunta do PAS da USC, Xunta do PAS da UdC, Alternativa de PAS Asemblearia, Asemblea pola Defensa da Universidade de Vigo, Plataforma de anulados USC) chaman a acudir "cunha tesoira na man (de papel ou cartón)" e a construír entre todos os participantes unha silueta de tesoira.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza