Finalmente a Facultade de Socioloxía da Universidade da Coruña non acollerá as Xornadas sobre traballo sexual que estaban previstas para os vindeiros 19 e 20 de setembro, coa intervención de mulleres que exercen a prostitución, profesoras e membros de ONG, entre outras intervencións. Tras semanas de controversia, a UDC decidiu cancelar a súa celebración nas instalacións académicas por "non poder garantir a seguridade do debate".
"O forte rexeitamento, fustigación e crueldade que estamos a sufrir, as falsas informacións e os comentarios recibidos fannos prever a imposibilidade de garantir a seguridade do debate nin a súa calidade académica", subliña a UDC
A polémica en torno ás xornadas desencadeouse a través das redes sociais, cando colectivos abolicionistas iniciaron a acción #UniversidadSinProstitución, que incluíu reclamacións ao reitorado da UDC para que vetase o encontro ao considerar que favorece o "proxenetismo" e é favorable ao exercicio da prostitución. Mentres, as organizadoras das xornadas e a propia universidade as encadraban no "debate académico" sen que isto implicase apoio á prostitución, destacaba a UDC.
Outras voces dende o feminismo e o mundo académico desmarcáronse do que observaban como un acto de "censura". Estoutra postura manifestouse tamén a través das redes sociais e mediante un manifesto de mulleres do mundo académico baixo o título Polo dereito a debater na universidade e en todas partes.
As xornadas continuaron na axenda da Facultade de Socioloxía da UDC ata este mércores, cando a institución académica emitiu un novo comunicado anunciando a cancelación. "O forte rexeitamento, fustigación e crueldade que sobre este tema estamos a sufrir nas redes sociais, as falsas informacións que distorsionan a realidade e os comentarios recibidos fannos prever a imposibilidade de garantir a seguridade do debate nin a súa calidade académica", lamentan a respecto dunhas xornadas "propostas por unha alumna do Mestrado Oficial de Políticas Sociais na especialidade de Xénero".
"A Universidade -di a UDC- é un espazo de libre circulación de ideas, foro natural para o debate, libre de censuras e prohibicións" e o equipo reitoral así o "defende". Pero "nesta ocasión non se reúnen as condicións necesarias" e por iso "nos vemos obrigados a rexeitar, conxuntamente coa Facultade", a realización das xornadas, confirma. "Esperamos -agregan- que no futuro se poida debater sobre este e calquera outro tema co respecto que merece unha institución de educación superior".
"Rexeitamos calquera tipo de discriminación e explotación da muller, en especial a prostitución como clara expresión de explotación sexual"
Como no primeiro comunicado ao respecto, a UDC destaca tamén neste que o conxunto da institución se "aliña plenamente cos obxectivos do Pacto de Estado contra a Violencia de Xénero". "Rexeitamos -evidencian- calquera tipo de discriminación e explotación da muller, en especial a prostitución como clara expresión de explotación sexual" e por iso "os feitos demostran o compromiso da Universidade da Coruña co feminismo" mediante un "compromiso incuestionable" canalizado a través da Oficina para a Igualdade de Xénero e o Centro de Estudos de Xénero e Feministas, salientan.
A organización non desbota celebrar as xornadas noutro emprazamento
A UDC, enfatizan, considera "sempre a prostitución como unha forma de violencia de xénero", e tamén considera que "a universidade debe ser un ámbito de liberdade para contrastar distintos puntos de vista, cómpartanse ou non". "Esa é a postura que adoptamos e adoptaremos na Universidade da Coruña" e por iso "todos os debates deben ter cabida" coa "necesaria serenidade e respecto ao discrepante".
No caso concreto da prostitución, "o debate da regulamentación ou aceptación como traballo sexual (a ONU e Amnistía Internacional recoñéceno como tal) e de como se protexen os dereitos das persoas que, lamentablemente, sobren esta explotación sexual está no movemento feminista". "Este debate -conclúen- non é exclusivo da universidade, senón da sociedade, e debe ter un foro aberto no que poder tratalo co acougo que agora falta". A organización das xornadas, pola súa banda, non desbota seguir adiante con elas noutro emprazamento.
