ADEGA reclámalle á Xunta políticas e recursos para protexer o lobo e favorecer a coexistencia coa gandaría

Explotación gandeira caprina en Pol © O-Xan

ADEGA vén de facer público un informe sobre a presenza do lobo en Galicia e os prexuízos que causa nas explotacións gandeiras. A entidade ecoloxista busca desmentir as informacións que nos últimos meses se veñen difundindo sobre un suposto incremento nos danos á gandería e o suposto crecemento das súas poboacións. E aposta pola coexistencia: "Defendemos que a coexistencia entre o lobo e a gandería non só é posible, senón que é moi necesaria para manter a saúde dos nosos ecosistemas, e preservar un legado natural único e ecolóxicamente moi valioso", destacan.

"A desatención da Administración ante este problema xera unha frustración e desanimo que se acaba cebando co lobo"

A asociación lembra que a poboación do lobo se mantén estable nas últimas décadas e destaca que "o feito de que se rexistren máis danos dende o 2015 responde máis ben á mellora e optimización do sistema de recollida de avisos disposto dende a Xunta, e a publicidade e que se triplicaron as axudas dos pagos (aínda así, de modo insuficiente)". "Compartimos as reivindicacións dos afectados que padecen ataques de lobo, son lóxicas e lexitimas, no sentido de sentirse desprotexidos ante unhas perdidas económicas", sinala, engadindo que "a desatención da Administración ante este problema xera unha frustración e desanimo que finalmente, case sempre, acábase cebando co lobo".

ADEGA denuncia "unha situación caótica na atención que a Xunta presta a este asunto", cunha "insuficiencia importante" na dotación de recursos. Para o ano 2017 o alcance total dos danos tivo un custo de case 500 mil euros (496.150 euros, máis da metade na provincia de Lugo), pero o Goberno galego só cubriu a metade deses danos (279.958 euros) e mesmo reduciu as axudas en cen mil euros con respecto ao ano anterior (379.958). 

Para o ano 2017 o alcance total dos danos tivo un custo de case 500 mil euros, pero o Goberno galego só cubriu a metade (279.958) e mesmo reduciu as axudas en cen mil euros con respecto ao ano anterior

A asociación amosa a súa preocupación porque a Xunta aínda non ten disposto para o 2018 unha liña de axudas para proporcionar a incorporación de dispositivos que favorezan un pastoreo e vixianza asentada na filosofía do manexo preventivo. "A prevención pasa por ser a acción fundamental dende a Xunta para abordar este problema e, sen embargo, non se aposta decididamente por esa estratexia", engade. De igual xeito, denuncia que "certos sindicatos agrarios cargan máis contra o lobo que en poñer o grito no ceo na deficitaria actuación en esforzos e recursos da Administración pra remedialo".

A asociación amosa a súa preocupación porque a Xunta aínda non ten disposto para o 2018 unha liña de axudas para elementos de prevención

Diversos estudos publicados veñen a demostrar a inutilidade absoluta das batidas como mecanismo para reducir ou acabar cos danos ao gando e mesmo conclúen que os danos poden chegar a incrementarse. "Despois de décadas vendo como se matan lobos e lobos, o problema persiste inmutable, mentres que os afectados finalmente continúan desasistidos. Sábese que en zonas onde o lobo ten provocado danos, tense probado de todo, velenos, lazos, caza de noite, batidas, etc, máis os danos esporádicamente reprodúcense", explica o informe

Diversos estudos publicados veñen a demostrar a inutilidade absoluta das batidas como mecanismo para reducir ou acabar cos danos ao gando

Finalmente, a entidade ecoloxista alerta de que "un dos elementos que menos están axudando a establecer medidas de coexistencia son as informacións e novas que se publican sobre a especie, na maioría, imprecisas, alarmistas, xeradoras de maiores tensións, e na que predomina unha falta de rigor e contraste científico preocupante". E reclama que se activen campañas de divulgación e sensibilización sobre a importancia do lobo no medio natural, algo previsto no Plan de Xestión do Lobo, pero que non se puxo en marcha.

 

ADEGA denuncia que nos últimos anos varios animais foron cazados ilegalmente na Serra do Cando © ADEGA

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.