As subvencións públicas supoñen o 60,5% dos ingresos dos colexios privados galegos

Evolución das subvencións públicas recibidas polos centros de ensino privados galegos Dominio Público Praza Pública

Os centros privados de ensino non universitario recibiron no curso 2014-15 un total de 243 millóns de euros de subvencións públicas, unha cantidade que representou o 60,5% dos seus ingresos totais, segundo os datos feitos públicos este mércores polo INE. O peso das achegas públicas no financiamento dos centros privados en Galicia está por riba da media estatal, que se sitúa no 54,5%. En Galicia existen 287 centros de ensino non universitario de titularidade privada nos que estudan ao redor de 100 mil alumnos e alumnas.

É a cuarta vez que o Instituto Nacional de Estatística publica esta enquisa. Se comparamos os datos máis actualizados cos de entregas anteriores, observamos que a importancia das achegas públicas na estrutura de ingresos dos centros privados galegos apenas variou dende os anos 90, movéndose entre o 59,5% e o 64%. A cifra total das subvencións si experimentou un crecemento sostido entre 1994 e 2009, descendendo lixeiramente nos últimos cinco anos.

Porén, a vindeira entrega desta enquisa probablemente recollerá un novo ascenso, pois a partida que os Orzamentos da Xunta de Galicia destinan aos concertos educativos con entidades privadas incrementouse nun 12% entre 2015 e 2017. Para este ano son un total de 266 millóns de euros, 30 millóns máis que o destinado en 2015.

Así pois, as subvencións públicas son a principal fonte de ingresos dos centros de ensino privados (un 60,5%), moi por riba das cotas pagadas polas familias usuarias (o 25%, 100 millóns de euros) ou os cartos xerados por outras actividades complementarias (12%).

En canto ao gasto por alumno, no curso 2014-15 este situouse nos 3.414 euros, por riba dos 3.260 euros do curso 2009-2010 e dos 2.685 euros do curso 2004-2005.

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.