Milleiros en Compostela contra os recortes dos servizos públicos

Cabeceira da manifestación Dominio Público @CIG

Varios milleiros de persoas manifestáronse este sábado en Compostela en defensa dos servizos públicos e contra os recortes e axustes levados a cabo polas administracións. A Plataforma na Defensa dos Servizos Públicos, onde se inclúen unha morea de sindicatos como CIG, CCOO, UGT ou CSIF, entre outros, foi a convocante dunha marcha que concentrou unha morea de persoas malia a calor e o día soleado co que amenceu a capital galega.

"Chámanlle democracia e non o é" ou "a culpa de quen é? Do Goberno do PP!" foron algúns dos lemas máis coreados nunha marcha que ateigou as rúas principais de Santiago desde as 11.30, hora na que saía da Alameda compostelá e baixo un lema claro: “Na defensa dos servizos públicos. Non ao recorte dos nosos dereitos". A concentración coincidía en espazo e tempo coa proclamación de Alberto Núñez Feijóo como candidato do PP á Xunta de Galicia.

Segundo os sindicatos, unhas 10.000 persoas participaron na manifestación, na que se puido ver o candidato do BNG á Xunta, Francisco Jorquera, ademais do candidato do PSdeG, Pachi Vázquez.

"A Xunta está a criminalizar os empregados públicos", quéixanse os sindicatos

"É escandaloso como a Xunta está a facer ofertas a empresas privadas para a xestión de servizos que ten que facer o Executivo autonómico directametne", denuncia a coordinadora da área pública da CIG, Carmen López, que asegurou que todo o mundo sabe a situación de "precariedade" na que se atopan os servizos "sociais de saúde e de educación".  O seu homólogo de CCOO, Ramiro Otero, rexeitou os recortes "encabezados por Núñez Feijóo" e censurou a "criminalización dos empregados públicos". "Estas políticas axudan a que, cantas máis crise haxa, máis posibilidades teña Rajoy de poñerse aos pés de Merkel", engadiu. Para o representante da área pública de UGT, José Manuel Vázquez, "en oito meses, o Goberno terminou coa arquitectura do dereito laboral xurdida da transición española e que fixo posible no seu momento a Constitución".

A marcha rematou no edifico administrativo de San Caetano, onde se leu un comunicado en nome da Plataforma Galega en Defensa dos Servizos Públicos e no que se pediu o "freo" aos recortes levados a cabo pola Xunta de Galicia.

Cabeceira da manifestación Dominio Público @CIG

Despece

  • Pachi Vázquez promete que "non haberá despidos" de funcionarios e Jorquera propón "poñer dique" aos recortes

    O secretario xeral do PSdeG e candidato socialista á Presidencia da Xunta, Pachi Vázquez, denunciou o "ataque ideolóxico" que, segundo dixo, fai o presidente da Xunta, Alberto Núñez Feijóo, aos servizos públicos e comprometeu que cun goberno no que estean os socialistas "non haberá ningún despedimento de traballadores públicos".

    En declaracións aos medios antes do inicio da manifestación en defensa dos servizos públicos, Vázquez sinalou que acudía á protesta para "estar cos homes e mulleres que lle dan servizos públicos a Galicia". "Vin aquí a comprometerme con eles, a estar con eles, a acompañalos e a garantirlles que cun goberno no que esteamos nós non haberá ningún despedimento de traballadores públicos", aseverou.

    "Estamos a defender a Galicia do maior inimigo dos traballadores públicos e do maior inimigo que teñen os servizos públicos de Galicia", aseverou. Neste sentido, Pachi Vázquez insistiu en que non se poden atacar aos servizos públicos" porque "é atacar aos cidadáns", segundo subliñou, "e atacar ideolóxicamente un modelo público que nos fai iguais con outros".

    Pola súa banda, o candidato do BNG á Presidencia da Xunta nas próximas eleccións autonómicas, Francisco Jorquera, avogou por "poñer dique" ás políticas de recortes co fin de evitar que "o que pasa en Grecia e Portugal pase en Galicia".

    Tamén antes da manifestación, Jorquera subliñou que estes son fundamentais para asegurar a cohesión social" e "para protexer aos sectores máis desfavorecidos". Neste sentido, o candidato nacionalista sinalou que, nun contexto de crise, os servizos públicos "son xacementos para a creación de emprego". Así, recalcou que "apostando pola defensa dos servizos públicos xérase emprego e dinamización económica".

    Ademais, reprochou que "a dereita" emprega "como pretexto" a crise "para cambiar o modelo, para desmantelar progresivamente os servizos públicos e para crear situacións de exclusión social".

    Pachi Vázquez e Francisco Jorquera CC-BY-NC-SA PSdeG/BNG

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza