Os sindicatos cualifican de "éxito" o seguimento da folga feminista

Aulas baleiras pola folga feminista do 8M CC-BY-NC-SA CIG

"Milleiros de mulleres están a secundar a folga feminista desde primeiras horas da mañá", segundo asegura a CIG, convocante de 30 mobilizacións nesta mañá e dun paro xeral laboral de mulleres “para reclamar a igualdade de oportunidades nas condicións de traballo, na esfera social e o dereito a vivir sen violencia”. 

O sindicato nacionalista, que convocou o paro de 24 horas ao igual que CUT, CGT, SLG ou SF-Intersindical, cualifica de “éxito” a xornada. Tamén a cualifican así CCOO e UGT, que falan de seguimento “masivo” dos paros parciais que impulsaron, “especialmente en empresas e administracións públicas” e que se congratulan do “apoio maioritario” da sociedade galega á convocatoria. 

O Goberno galego cifra nun 11,27% o seguimento da folga feminista no ámbito da Administración xeral da Xunta; a CIG eleva a porcentaxe ao 50%

O Goberno galego cifra nun 11,27% o seguimento da folga feminista no ámbito da Administración xeral da Xunta. Por sectores, sitúa nun 9,55% o seguimento no Ensino, do 10,14% na Sanidade e do 18% na Xustiza, cun máis apoio nas delegacións territoriais de Pontevedra e Vigo ca no resto. 

A CIG, pola contra, asegura que na sanidade pública só se están a cumprir os servizos mínimos e que a folga “está a ter unha especial incidencia na Atención Primaria malia os servizos máximos decretados pola Xunta”. Ademais, alcaran que “nos sectores máis precarizados e feminizados da Administración, como nos centros dependentes do Consorcio Galego de Servizos de Igualdade e Benestar, o paro é masivo e un éxito rotundo”. 

Segundo a central nacionalista, no conxunto da administración xeral da Xunta o paro foi desigual pero eleva o seguimento a arredor dun 50% de traballadoras que secundaron o paro de 24 horas na quenda da mañá. En canto ao ensino secundario e universitario, “produciuse unha paralización”, mentres que a participación de mestras e profesoras “superou a do ano pasado”. 

Mobilización pola folga feminista no Hospital da Mariña CC-BY-NC-SA CIG

“Esta folga é a ferramenta que temos para denunciar que, malia ser ilegal, a fenda salarial continúa sendo unha realidade moi frecuente nas empresas; ao igual que o chan pegañento ou o teito de cristal, os atrancos na conciliación ou o acoso e as agresións sexuais ás que someten as traballadoras, entre outras situacións discriminatorias e machistas”, dixo Margarida Corral, secretaria de Mulleres da CIG. 

O sindicato nacionalista destaca o impacto da folga en moitas empresas da área de Vigo, en tendas do grupo Inditex ou nos centros da administración local da Coruña

Por comarcas e sectores, o sindicato destaca o “elevado seguimento” na área de Vigo malia os “moitos intentos de boicot por parte das empresas”. Así, destacan o impacto dos paros nas escolas infantís, na recollida de lixo, no mantemento de parques e xardíns, no Hospital Álvaro Cunqueiro ou en empresas como Denso, GKN, Alonarti, Marsan, BorgWarner, Plastic Omnium, Grupo Copo, Asientos de Galicia, Viza, Alymosa, TRW, Domiberia, Carchidea, Frigolouro, Cerqueira, Valcárcel, Orbe, Fandicosta, Mascato, Conservas Rías Baixas, Bimba y Lola, Pili Carrera, Paz Rodríguez e Selmark. 

Na Coruña, o seguimento notouse bastante na administración pública ao amencer pechados todos os centros cívicos da cidade, a Casa Casares e a Casa María Pita e tivo impacto en zonas comerciais como a da praza do Lugo ou tendas do grupo Inditex que tamén pecharon, aínda que o seguimento foi desigual nesta cadea. “O comedor de Zara Loxística non puido prestar servizo porque a maioría das traballadoras están en folga”·, di a CIG. En canto á industria, a folga notouse moito en Celsa Atlantic (A Laracha), en Ferroatlántica (Cee) ou na conserveira Calvo de Carballo, onde o paro foi case total. En Extel e Atento o seguimento superou o 80%.

Mulleres piquetes ante unha oficina de Abanca, pola folga do 8M CC-BY-NC-SA CIG

En Compostela, pola súa banda, a folga deixouse sentir no sector servizos, en moitas tendas de Inditex e claramente no Hospital Clínico ou noutras empresas industriais. Ademais, arredor do 90% das empregadas do Concello de Santiago secundaron o paro. En comarcas achegadas, o éxito do paro foi evidente em Cortizo, Frinsa, Escuris ou López Soto. 

En Ferrolterra, a folga deixouse sentir nos estaleiros, em Einsa, em Indipunt ou Arteixo Telecom, ademais de na administración local e em Correos. No caso de Pontevedra, foi importante nas empresas de frío industrial de Marín, em Treves ou concesionarias de limpeza, mentres que na comarca do Salnés o impacto foi claro em Thenaisie Provote (O Grove) e Pérez La Fuente (Vilanova de Arousa), cun 100% de seguimento, ou Serpeixe, Roma, Friscos, Cefrico, Atunlo e Isabel. 

En Ourense, notouse tamén nas tendas de Inditex e en Desigual, así como en en empresas do sector dos centros de chamadas como Unitono e Contacnova ou en compañías da industria aeronáutica como Coasa. En Allariz, a práctica totalidade dos centros de traballo e comercios amenceron pechados. 

Por último, en Lugo, a incidencia foi importante no Centro Comercial das Termas ou nas residencias de maiores de Outeiro de Rei e Castro Ribeiras de Lea e en Abeiro Gold ou Abante BPO, empresa do sector dos centros de chamadas. En Monforte, a folga sentiuse amplamente no servizo de axuda no fogar e entre as traballadoras do Concello.

Despece

  • Persoal da CRTVG denuncia novos atrancos para facer visible a folga feminista

    Mobilización de persoal da CRTVG nun dos venres negros CC-BY-SA Praza Pública

    No pasado mes de setembro, o TSXG condenou a CRTVG por vulnerar o dereito á folga na xornada de mobilización feminista do pasado 8 de marzo. Fïxoo cun decreto de servizos mínimos que o tribunal considerou froito dun "comportamento malicioso" do Goberno galego que lle mereceu un "rotundo rexeitamento" e que atrancou o exercicio deste dereito fundamental en, cando menos, tres departamentos da Administración autonómica e mais na Corporación Radio Televisión de Galicia (CRTVG), onde a obstaculización da mesma folga xa dera lugar a outra condena no mesmo tribunal o pasado abril, naquel caso pola substitución por un home da presentadora do informativo Galicia Noticias, que secundara o paro. A declaración da xornalista afectada provocou, segundo denunciou persoal da Corporación, "represalias" a esta traballadora, que viu reducidas as súas funcións habituais na televisión pública. 

    Neste ano, é outra xornalista da CRTVG a que denuncia que foi cominada a formar parte do persoal de servizos mínimos e locutar informacións durante a quenda de tarde malia os acordos aos que chegaron a representación sindical e a dirección da empresa para que se priorizase o labor masculino na xornada do 8 de marzo no caso destes servizos mínimos. 

    Unha xornalista da Radio Galega denuncia que foi designada para cubrir os servizos mínimos malia que sindicatos e dirección pactaran que serían homes os que os realizasen

    "Convocarase para a cobertura destes servizos mínimos a homes e non mulleres sempre que a quenda e as funcións habituais o permitan", di un dos puntos da acta da reunión coa dirección que foi feita pública polos sindicatos. "Co obxecto de darlle visibilidade á folga do 8-M, os espazos informativos da TVG e da Radio Galega serán presentados por homes. Nos casos en que só haxa unha presentadora ou locutora para un informativo procederase do seguinte xeito: O Galicia Noticias emitirase sen presentador e na Radio Galega porase a un home en servizos mínimos para locutar os espazos informativos aínda que non sexa a súa función habitual", di un dos acordos. 

    Malia estas disposicións, a traballadora afectada denuncia que recibiu a "designación para a cobertura dos servizos mínimos" do venres 8 de marzo "na quenda de tarde", lembrándolle ademais a obrigatoriedade de levalos a cabo. A xornalista asumiu a orde pero amosou o seu "desacordo" logo de que sindicatos e Corporación "se comprometesen a cubrir os servizos mínimos con homes co fin de facilitar o exercicio da fogla ás mulleres".

    A traballadora afectada encadra a decisión da dirección nun conflito laboral que mantén coa dirección e na súa activa participación nos venres negros

    O argumento, segundo di, que lle deron desde Recursos Humanos é que non había posibilidade de colocar outro home no seu lugar na súa quenda. A afectada asegura que foron moita as veces na que na súa ausencia un redactor cubriu o seu posto, normalmente persoal que xa conta precisamente cun plus pola súa dispoñibilidade.

    A afectada, en conversa con Praza.gal, asegura que mentres na quenda da mañá dous redactores realizaron os boletíns informativos, un deles coa devandita dispoñibilidade, ela tivo que locutar catro boletíns. 

    A xornalista encadra esta medida nunha decisión meditada da dirección contra a súa persoa por un conflito laboral que mantén desde hai tempo, así como pola súa activa participación nos venres negros convocados polo colectivo Defende A Galega, que anunciou nun comunicado o seu apoio á folga "por uns medios públicos de calidade e con perspectiva de xénero". 

Grazas ás socias e socios editamos un xornal plural

As socias e socios de Praza.gal son esenciais para editarmos cada día un xornal plural. Dende moi pouco a túa achega económica pode axudarnos a soster e ampliar a nosa redacción e, así, a contarmos máis, mellor e sen cancelas.
Quero ser de Praza